Arrejonende chin sa poesia… prima parte
“Aite omine!! in sa mann’ edade
ti ses post’ a iscrier poesias?
Eo de poesia so sa mama
e tue no isco mancu chie sias.
Mai ap’ intesu dae intr’ e s’ama
chi pensare in versos tue podias,
isco chi no lu faghes pro sa fama;
etando aite cantones ponias?
Impitende paraulas che lama
paret chi timas chi su tempus t’iscade”.
-Giucunda s’arte tua ‘e umilidade:
sun sas musas de monte d’ Elicona,
Apollo las difendet dae su male
a mie azis leadu a sa bona.
In notte de ‘eranu, gai male
fio drommende, cando isveglia sona,
in conca unu penseri uguale
a sero prima chi pius no m’abandona.
Leo sa pinna in manig’ e istrale
e fato primu ‘olu de anade.-
“It’ est chi ti movet in realidade:
sa mata, su chelveddu o su sentidu?
Cal’ est su bisonzu e sa cura
chi a custu punto ‘oe t’ at battidu?
No creo siet s’oza e sa gosura
te t’ ider un’ incras riconnoschidu
dae populu ‘e Sardigna ‘e ‘ue b’addura
sas artes chi essin dae custu nidu.
Oburu su passadu tue abiura
chilchende de su mundu piedade?”
-De tottu b’at, francu sa viltade,
anzis curagiu est in primu postu,
no pro arrogu emmancu pro vindita
ma ti cunfesso chi de pane tostu
nd’ apo connotu una bella fita,
eccomo apo dizisu chi siat bostu
chin sa vida semus in paghe chita.
No timo su giudisciu ne su costu
ca ischina gito folte e dirita
no timet ‘unta ne disamistade.-
“ite sun cussa puntas de ispade
chi naras a carena an fatu male?
Comente faghes como al ilmentigare
cando in benuju t’an postu su sale?
Folzis como pensas de lu torrare
chin interessu oburu tale e quale.
Cal’ est sa cosa ‘e poder disizare
cando si torrat chin vida cabale,
est menzus ammentu ‘e nde ogare
oburu su chi s’ischit si cuade?”
-Est comente cando bois giogade
in mentes e sentidos de anzenu,
no at impoltu sa manu chi cumpone
ma cando bois abasciades frenu.
Unu mischinu in vida, campione
podides render dae paza in fenu,
ca poesia chin s’ ispirascione
olat in altu e curret che a trenu.
No est sa mente ne preparascione
ma su semen c’amus e bois ababe..
“ite mi naras tue, tue biade,
mi cheres narrer chi est su destinu,
chi semus nois musas e naiades
a bos dezider su ‘ostru caminu?
Eppuru tue comente bene ides
a su cuntentu bonu ses vicinu,
chie t’at dadu sa folza chi gighes
aite apollo a tie est ighinu?
Contami unu pagu de sas fides
e de sa folza tua ‘e voluntade”.
-A su manzanu cando bos ischidade
no ischides mancu a chie cumprire,
pro casu nd’idides unu passare
e no ischides si dare o pedire.
Cando istrobu pessades de lassare ,
s’isventuradu chilcat de nd’essire
dae su calancu chi l’azis fatu intrare
no est semper chi bi podet resessire.
Eo , mi preguntas ite m’at fatu ‘olare??
Sa fide, sas ideas e s’ onestade. -
----sighit---
Arrejonende chin sa poesia - segunda parte -
RispondiElimina“bellas paraulas ti essin dae coro
No so segura chi l’apas cumpresu,
su chi ti chelzo narrer est aberu:
su chi t’an dadu as semper resu?
As apidu a s’indonu, sias sinzeru!!,
sas cosas ch’as echi no as pretesu?
Narami totu como pro interu:
“l’ischis ch’istat male cane presu?”
Etando si mi sighis a su seru,
su chi mi naras tue no l’ignoro.”
-De impoltu tou e de te m’onoro,
chin tegus eo no chelzo difetare,
su ch’ ap’ e narrer , de su ch’ap’ aizu
a tie tottu ap’ a regontare.
Vida serena, chin pagu fastizu
apo passadu in s’abaidare,
su tempus mi pariat unu lizu,
cantu fit bellu idendelu passare.
In cuss’ edade ruio semper rizu
e cando mi l’ammento mi ristoro.-
“Como faeddami de cosas issoro,
de sos aneddos ch’aunin sa cadena
chi cando zocat faghet disacatu
e de lagrimas cara nde piena,
chi solu cando coglit su riscatu
s’animu allegrat e finas sa carena,
tue chi nd’ as coglidu calch’ iscatu,
contami coment’ est cuss’ iscena.
Cando totu parian a ricatu
e piata comune fit su “voro.””
-Si nde faeddo dae sa tul ‘ iscoro
ca sun contados solu ‘e mesania,
su ch’an chelfidu faghere an fatu
ma veridad’ issoro no est sa mia.
De medas veridades che Pilatu
an oltuladu eppoi coberia-n,
ma de giustiscia mancu unu ratu
an impitadu sa chi li selvia-n.
No ana pessighidu su reatu
ma sa pessona e sou decoro.-
“Anda innanti, a tie imploro
it’ est chi b’at ancora coidadu?
No nachi totu giustu fin fatende
cando cussa filossera passadu
est che mazzu dae continente
finas a sa Sardigna abojadu?
Ana ispainadu meda zente
su mundu ana totu triuladu
e como tue mi naras ch’ indeziente
est su chi nos ana propinadu
dae sos tempos de sa morte ‘e Moro.”
-Cussu cuadru como ti coloro
de cantu est toltu su podere,
finas si veridade bi nd’at puru,
si traighet Patria e mestiere.
Pro poder ponner fatu a su giuru
bisonzat veridade de aere
eppuru cando pesana su muru,
totu in sa cadrea si che chere-n.
Gai est istadu cando totu a furu
ana leadu s’istadu pro s’oro.-
“De su chi naras tue m’innamoro,
no timas de nd’ ogare tot’ a pizu,
su ch’ est istadu como ilmentigadu
cras est impoltante pro su fizu.
De sa naiscione chi t’at generadu
sa veridade est oro lizu,
ammentadi chi totu su criadu
de faulas nadas at leadu imbizu
e dae su chi paret ch’ as nadu,
sento connotu chi est in mezoro.”
-Chin cust’ ottada s’istoria isfioro,
nende chi gherra manna b’ est istada
tra sa giustiscia e su pentapartidu
chena sa legge chi’ isteret rispettada.
Sos unos chin manetas an oldidu
prozessu fatu solu a s’ispessada,
permissu a sa legge no an pedidu
pro in galera ch’esseret imbolada.
In base aparenenzia ‘e partidu
e su tel’ e s’ilgonza com’ ilforo.
---sighit----