giovedì 28 luglio 2011

sa murra











Sa murra

Intendo boghes, comente  in  cazza
cando in posta passat su polcrabu,
no est zeltu in  musica su grabbu
ma che a cando in terra ruet sa  tazza.

che  fusiladas  chena perun’ agabbu
giannitos a s’issuldu  ‘e can ‘e razza,
 infora 'etados chin coro e chin azza
no si cumprendet su fizu chin su babbu.

'Olan sos brazzos, che palas de mulinu
podighes  chimbe si sun pro ambas manos,
deghe de issos a murra sun falados
“muzzu che trozza e betami su 'inu”!!

Ides piseddos impare a pilos canos
totos ammisciu istranzos e beghinu,
alcende sun solenne unu casinu
e-i sos lamentos sonnidos sunu vanos.

It’at a esser chi rendet gioiosa
una dioi calda cuntierra,
comente su soldadu in  sa gherra
in molte anzena bidet una rosa.

Como benujos sun tocchende a terra
numeru ses insistit in sa posa,
no bessit mai, paret chi bi gosa
comente cando cocoi si ch’ inserra.

Est unu fagher meda elementare
pro cussu pesso chi b’apet un' isetu,
chi una bia nessi apan rispetu
finas pro chie, nudda at ite dare.

Su chi a prim’abboju est a minetu
lu faghet pro aversariu acumbessare,
no b’at de malu in sa 'oghe alciare
che finit totu in binu ‘e fad' eretu.

A mie paret che cando pane ilfurrat,
prima si fresat e poi s’aturrat.





  

Nessun commento:

Posta un commento