giovedì 22 maggio 2014

malinconia de una femina














malinconia de una femina.

sa roca 'ue bi pasat sa rughe
remonit semper frimmos sos ammentos
sa vista 'e montes e sulos de bentos
in segus torrat et cue che giughet
feminas chin s' isciallu e sos lamentos
bessin su manzanu a prima lughe
a sero si che tancan intr' e nughe
chilchende sos disizos mai tentos

sabato 17 maggio 2014

malinconia










malinconia

Cantala.. canta sa malinconia
Cussa chi paret non passare mai
Sighende versos de su Dessanai
Lirica dulche.. et agra melodia
Issa cumponet penas arguai
Pro dare baga a sa maladia
Chi si presentat in mes’ e sa bia
E intr’ e coro s’ apoderat gai. 

Cantala.. canta tue sa poesia
Cussa chi faghet brillare su coro
Profumat rosa e cantat su grillu

sa gioventura ballat su dillu 

tottu sas dies e peleas issoro
iden mamentos de bon’ allegria.

giovedì 15 maggio 2014

gherrera











Femina  gherrera
^^^^^^
Famada  ses.. d’ esser  comente ses
De fatos e de cantu   ses bistada
Donosa,  gai balente che sos res
Gherrera   innanti a sorte fadada
Colores  chi ti pinghen totos tres
Posca  de nd’ aer fatu  sa misciada
de domo e d’ amistade,  s’ antarile

faghes  chie ponet passu in su giannile.

mercoledì 14 maggio 2014

s' ischidu







S’  ischidu..
^^^^^^^
A s’ iscultore  innanti a su Mosè
Deit   giudisciu unu  picapedreri
Nende chi nare fit che su paneri
A parrer sou .. manchelelì  Vostè!!
Umile..  ma de  grascias inzegneri
Su  Mastru chena  li narrer “pelchè”:
pro  finta faghet  gai de l’aconzare
manera  de  presumu  iscobiare.


martedì 13 maggio 2014

su lagu Lerno













su lagu 'e Lerno.

proite innoghe so' assupridu?
pro fagher de ispiju a sa bellesa
sa chiza de sa zente patadesa
de Lerron e de totu s' infinidu?
Innoghe s' ispera fit ben' atesa
d' esser funtana 'ona pro sedidu
tribagliu a sa bidda apo 'atidu
pro cantu b' est durada cuss' impresa

mi frimmo como, solu testimonzu
de tempos chi cuntemplo a ilmentigare
innoghe alu so, istend' apitu

risposta chi mi dien pro s' abitu.

"sas abbas mias, frimmas chelzo dare
a terras sicas e pro su bisonzu"

ite novas...?










Ite novas?

Ite  novas  b’at oe a cuss’ ala?
“pro peus, menzus goi” sa risposta
Tantu su mundu est  in ‘oromala
Sa vida  sempre dura e pius tosta
Sonnios  e disizos  in sa gala
Che finin  pustis de giros in giostra
Su bene,  s’ allegria dada in donu
Paret  finida siat in abbandonu

Ma si  pessamus  torra  a cantu  amus
A su chi  nos  preguntat  sa cuscescia
It’ est chi mancat  pro  sa cuntentesa

Si no d’ esser  amigos d’ umilesa?

S’ iscultu,  sa  cumpresa e sa pascescia
Pedimus ,  ma  a bias pagu damus.


martedì 6 maggio 2014

su puddu











Su puddu

Sa pedde de germoglios ponet tuddu
Abbada chin sas  francas  de suore
Brincat   subra  s’ ischina su puddu
Cand’  isse  cheret parte de s’ amore
Tando si  chilcat  custu.. posca cuddu
in presse  totu mudat  in  ardore
Non b’at    filu ‘e cabu ne rejone
Si  faghet  chin  afetu   e   passione

Totu  betad’ a unu  sa natura
Piantas, fiores et animales
Sa chilca de si poder  replicare
Chin tzenes  de poder assimitzare.
Umanos  istintos sunt naturales
si leados in giaru e no  in fura.