venerdì 31 maggio 2013

pasende

















Pasende.

Pustis de una manna passizada
mi so frimmadu  pro mi  reposare,
in mes’ e sa piata   cullocada
ap’ idu un’  istatua  front’ a pare.
M’ est palfid’ e bider manizada
comente narrer “beni a faeddare”;
Luego  innanti  che  so agatadu
in pes  suos mi  so acomodadu.

“Ite faghes innoghe  passizende?”
Mi paret de intender dae altu,
mi giro ma nudda si fit movende
timende  apo 'etadu  unu  saltu.
“Sezid' innoghe, ite ti ses movende?
Codumu ista , ponedi  tot’ ispaltu,
apo parizas  cosas de   contare
si pones cabu, chena mi dimandare.

“Eo so Garcia Lorca”  su poeta
chi  meda  declamades in Sardigna,
paret  chi de megus  siat a preta
sa  musa  chi  sos versos bos impignat.
S’ ammentu  est comente una carreta
chi andat  ‘ue  la gighes e l’ insignas,
pustis bisonzat de l’ilboidare
pro podere una  domo fraigare.

Gai   leende sas   bonas  ideas
chi passan dae conca  a su giaru,
poden  brincare fora sas peleas
chena  nd’ aer cumpresu  s’ imbaru.
A bias  sol’ a mesu e mai intreas
resessin  a fagher  centru in su garu,
penseris chi apitan  sa naschida
in  poesia  posta e mai finida.

Tantu  apo patidu, gai pessende
in versos los ponio  pro su bisonzu,
d’ animu pius  lebiu , chi creschende
de dolu e in disterru m’ at isconzu.
De me  in sos fungutos fio chilchende
su semene  chi  bi fit in s’ aronzu,
mai però, d' issos  apo messadu
si no d’ esser  chin megus sempr’ istadu.

Nemigos  sun cussos  c’ apo connotu
intro de me, cando  m’ an postu duda,
amigos sun cussos  chi apo a notu
chi  libeltade  a in fora m’ istudan.
Sun cussos  chi mi  dan de vida  motu:
“d’ esser in sa rejone  e  mai m’ impudan”,
‘alet pius  unu mamentu  zeltu
che  milli vidas  de  fagher imbeltu.

Sa folza  de  sa  ‘oza  d’ esser  bios
est paris a sa  roca  in fundamenta,
no bastat su piantu che  sos rios:
Furiu Camillu lu naraiat, ammenta.
Ap’ idu  sa tristura in ojos mios
de populu  chin sa cuscescia   isenta,
comente  su poeta  in poetare
gai  sa zente si devet liberare.

Naro de no, finas si  paret giustu
cando  ‘ido chi b’at  ite  gherrare,
s’ intentu de chie mi narat custu
est pro bider si podet  guvernare.
Isse promitit  de piatu s’ ustu
pustis ti leat  sa  ‘oza de pessare,
tando ti naro : “si faghes poesia
no dies  cara a falza   ipocrisia”.



 







  

sabato 25 maggio 2013

Sos versos













Sos versos

Si ponzo duos versos de rimare
Est  ca de issos  chelzo  ischire solu
Su mentres chi  an ispicadu  ‘olu
Intro ‘e me .. it’ an bidu  passare.

Penseris  de gosu  et  oriolu
Cuados,  chi si cheren acerare
Pro ‘ider  e poder abboigare:
“liberos .. nois ti damus cossolu”

Si cantu est lezeru  su  penseri
Gai  lu est su coro e sa cuscescia
Tando  sos verbos nd’ essin  luego

Gasi in rimas  nde rio  e prego.

Cando pesan  bi cheret pascescia
Pro  descrier   ‘ue dolet  e ferit.

mercoledì 22 maggio 2013

sas bator istajones (Paula Black - Eranu) = (Lussorio Cambiganu - Atunzu) = (Beppe Pintore - Ijerru) = (Cosimu Capra - Istiu)








sas bator istajones (Paula Black - Eranu) = (Lussorio Cambiganu - Atunzu) = (Beppe Pintore - Ijerru) = (Cosimu Capra - Istiu)


Inizio modulo
 Paula Black

Un'idea in conca mi si moe'
sas bator' istajones a cantare
s'accudit Pilisu deo bi soe
su cuartettu cheria formare
cun Cosim' e Pintor'a bonu proe
calch' iscut' in pasu a poetare...
...Atunzu e igerru manu manu
cun s'istiu; deo leo s'eranu...


Lussorio Cambiganu

eo che isse m' agato innoghe
chilchende sempre cussu briu nou
tando de s' istajone 'eto s'oghe
cussa pius atesu dae su tou
pro cantu in paraulas bi joghe
iseto chi mi diat dae su sou
isperas noas chi cuat in su punzu
pro cussu est chi mi naro atunzu


Giuseppe Pintore

Deo bi so e no isto a sa cua
proite sa cua est unu cuerru
Besso a campu timo s'inserru
bisto in campu e no leo sa fua
chi donnunu lea sa parte sua
tando deo mi lu leo s'ijerru
paret istajone de pagu contu
pero no es cun issa su tramontu.


Cosimo Capra

Paola su eranu si lu cantada
ca sos fiores tenet in podere,
Lussuriu s'atunzu si lu antada
ca de cussu at tentu piaghere,
Pintore in s'ierru non m'ispantada,
e de sighire ap'eo piaghere,
in motu jà la ponzo forza e briu
ca a mie tocadu mi est s'istiu.


Paula Black

De Floris diosa m' 'anto ancella
ube pass' 'eo su log' indeoro
ca bivo s'istajone pius bella
cuss' 'e sa gioventude chin decòro
tot' ube ponzo manu lasso prellas
e totu sos viventes innamoro...
... A mi cumbater nd'azis de asìu
no tim' atunz' ijerru nen s'istìu...


Lussorio Cambiganu

Est s’ istajone chi atit abbas friscas
Pustis d’ aer patidu sa siccagna
De piantas b’ at restadu liscas
E sa natura de istiu si lagnat
Pastore in s’ aronzu gai s’ arriscat
mudende su colore a sa campagna
semenat tando d’ ispera s’ aronzu
sas primas dies de su nou atonzu


Peppe Pintore

Totu bos paret brulla e incantu,
ma deo de ateru parere so'.
A su eranu tzeltu no naro no,
e cun s'istiu fato ateretantu.
Su atunzu ancora ite ti do;
ma so deo ch'istelzo nidu mantu.
Poi e sa fadigas nd'azis gosu,
ca so s'istajone de su reposu.


Cosimu Capra

Chi calcunu inamores jà l’azeto
Ma in s’istiu sun sos fortunados,
s’istiu dogn’annu da l’iseto
s’istajone ‘e sos inamorados,
sas copietas tando in su boscheto
s’apartan, ca sun fidanzados,
solu s’istiu a cussos est amigu
ateru che semenare ogliu e trigu.


Paula Black

No b'at frutu sena sos frores mios
Rinu no si la prenede sa chedda
Peppe tue lassas niàd' e nìos
ca las bato deo sas rundineddas
Cosimu su frutu in sa pischedda
pro sa sicagna ti dat sos adìos...
...So deo chi dispenso su surrisu
su logu tristu mud' in log' accisu...


Lussorio Cambiganu

dae cabidanni a pasch’ e nadale
tres meses chi pienan sas chentinas
innennas de uas e binos tales
chi dan ispantu a s’uca pius fina
sas tazas no agatan iguales
colore rubicante o cristallina
est istajone de nuscos coloridos
de ammentos bezos e noos mai idos.


Peppe Pintore

No isco cale entu chi bos curada,
faghinde totu custos paragonones.
No sezi bois sa bellas istajones,
s'ijerru gai nemancu si oscurada.
Sa notte pius longa si mesurada,
e sa familias sunu in unione.
Ca e s'istajone mia zentile,
chi reunit a totus in su foghile.


Cosimu Capra

Paola cun sos frores a vicinu
Sas rundines tenet po modellu,
In s’istiu t’osserva caru Rinu
Su prudone in binza cant’est bellu,
Cannonadu, Malvasia e Vermentinu,
Pascale, Zirone e Nuscadellu.
Pepe in su foghile est inserradu
Sa bona parte la faghet corcadu.

A mie m'an cantadu e mi cantan
sos poetas ca deo los ispiro
in dogna cantone galu m' 'antan
a mutos acorados e suspiros
ca in beranu sos ogros s'ispantan
pro me' sun armonias e ammiros...
...lassan a bois solos derellitos
chena cantone nen versos lichitos...

Cando su ‘irde colorat su logu
Est sa vida noa chi est naschende
Sas tancas coloradas dae su grogu
Paren chi a su tempus sian riende
Gai sos montes passados a fogu
‘ido chi beste noa sun ponzende
Cussa niedda chi l’at postu s’ istiu
Chi tristu at dadu comente un’ atiu.

Mirade cantu godit sa campgna,
cando in ijerru est a reposu.
Bestida de candore e sa muntagna,
su logu immaculadu e maestosu.
S'isposu chilcat a sa cumpagna,
e sa cumpagna chilcat a s'isposu.
Ch'est un'incatu pintadu de deu,
e totu custu est in tempu meu.


 Cando chi ch’est coladu su eranu
In sa campagna donzi cosa agatas,
b’at basolu, verdura e b’at patatas
fragolas, piberone e predinzanu,
zucas, zuchitas e tamatas,
sindria e melone fitianu,
Italia, Perlona cun Regina,
si las conto…bind’ada una duzina.

Atunzu ses umbros' e isfozidu
e binnennas pro sos imbreagolos
s'igerru mi ponet in oriòlos
ca m'infritat su sartu ispilidu
s'istiu cun cussu sole 'uddidu
arrustit sos turistas che corzolos...
... Totun' est sa suave frina mia
no b'at bentu, tempest' e bascarìa...

Posca chi torran abberrer s’ iscola
S’ intendet cussas boghes d’ istajone
Sos istudentes torran a sa sola
In sas garreras e ch’ essit su magone
Sas rundines atesu si che ‘ olan
Lassende siat sas biddas che masone
No est mamentu ‘e dolu ne tristura
Est su cominzu de un’ater’ avventura-

Bilduras de ijerru dan balanzu
caule de cupu e de fiore
Frutas bellas de cachi cun aranzu
cun mandarinu de bonu sabore.
Limone creschet de grogu colore
e pompelmu chi conta cumpanzu.
Sunu totus frutas chi agradan a tie
ma creschene in su fritu e in su nie.


 S’aranzu in s’ierru ti lu mira
E Rino aberila s’iscola,
 
ma in lampadas in campagna cola…
b’at mela, figu, pruna e pira
pessighe, cariasa…e no est sola,
marragocco, zinzalu e giuggiola
s’unu nd’assazas, s’ateru lu tira.
E Paola, si ti cheres abronzare
Solu in istiu falatiche a mare.

Pro sos iscolanos iscuminiga
l'est cando comintzada s'iscola
pro cuss'isettan sempre sa dominiga
ca issos sunu in sas menzus vola
ma cand'a mannos messan sas arzolas
est ca s'estru meu si los pìnniga'...
...tando si una femina abojan'
amoran e in maju si la cojan'...

Dae sant’ Aini a mes’ e sant’ Andria
S’ abberin sos dizizos de sa mente
Progetos mai cumpridos sempre in bia
Si lean torra in manu frecuente
Si chilcan modas noas e sa ghia
Pro dare unu mastru a su dischente
Buschende remediu a s’errore
Si dat impoltu a tempus benidore

Fruttu azis abberides s'iscola
chie leat e chie no leat gustu.
Ma in dies de frittu e de ranzola
e de abba pro no esser'infustu:
in domo istades a faghe s'arrustu
binu e sabores sa die cossola.
Sa zimineas isvelana su fiagu
e sunu bellas oras de divagu.

De Anna e Joachinu si bi crese
Sa fiza santa si l’as connoschida,
ammenta in istiu ch’est naschida
ch’at postu su dimoniu suta pese
 
De cabidanni s’oto de su mese
In istiu Maria at tentu vida,
a mesaustu cun biancos velos
che la leana a chelu sos anghelos.

S'in cabidann'at tentu naschidura
sa Mama, amenta su Fiz' est mortu
in beranu, e ponebei cura
chi a sas tres dies este risortu
e pro no Li faghere unu tortu
lu festamos e in s'amment' addura'...
...mortu est Issu in sa Vera Rughe
ma in beran' estidu s'est de lughe...

Comente de sa vida, istajones
Totu benin.. no bi nde mancat una
Peruna d’ issas est su campione
Si mancat sa salude e sa fortuna
S’ atunzu a cominzu s’ imponet
D’ annada, comente est pro sa luna
Chi dat lughe in notte serena
Ma solu cando est bene piena

Donn'istajone santos determina
arrivana a sa data puntuale.
Deo puru los apo a s'usuale
ca si estit a festa onni vitrina.
Proite nasche sa criaura divina
e totue lu festana su natale.
In ijerru sempre l'amos connotu
pro sa cale festat onni devotu.

Mi lu zessades cussu murmuriu
Mi non so galu pizinnu minore.
Jeo non bo lu nego su valore
Po bos risponder so ancora iu.
Ma in Nuoro b’est su Redentore
Nade puite lu festan in s’istiu?
Sa festa pius manna e pius digna
Chi bind’enit dae totu sa Sardigna.

Donzunu si festat sos santos suos
ca l'amustrades totu s'ispirìtu
peroe a bos dare sos azuos
a sas chimbanta dies de apìtu
pustis de pasca falat a congruos
s'Ispiritu Sant' 'e Deus beneitu...
...nademi como si no bi fit Issu
a cale sant'ìan sa die promissu...

De poesia est mese ‘e su bisonzu
De santos e de mortos su mamentu
Totu si movet su tristu e su cuntentu
In custu mese de pienu atonzu
Chie de festas puru l’ at aconzu
Paret isteddu de santu Larentu
Cando in altu paret bene tentu
Ruet a terra fragassad’ e isconzu

Cantas cosas ponides a su prou
chi serenu a iscultare mi setzo.
Sigomente ido sezis avetzo
e onnunu tene su piaghere sou.
Cun megus arrivat s'annu nou
e s'adiu apo dadu a so betzo.
A mesa notte s'isparat totue
nessi rejone mi dade in cue.

Ma puite dae me ti alluntanas
Rino cosa e narrere ti tenia,
Sas festas prus bellas paesanas
Pintore faghen in s’istajone mia,
in atunzu sa nue primidia
s’aba ti la mandada a funtana
in donu contr’a deus la protestas…
non b’andat prus bene a fagher festas


Paola Black ---


Pro dogna festa sa creja la mudan'
bidimos fioridos sos altares
e sas candelas mai no s'istudan'
in offerta pro gratzias a dare
dae sos ratos sas rosas che pudan'
pro poder mort' e santos onorare...
...ma si no b'intro deo cun s' 'eranu
no b'at frores in vasu ne in manu...


Lussorio Cambiganu ^^^^^^^^^^

Sas fozas chi nde ruen dae nae
Pasan subr’ e sa terra isfritulida
Saltizas e pancetas in sa trae
Isetan de su fumu s’ imprimida
Jannas abbeltas o a gir’ e jae
Totu apitu sun a cuss’ ischida
“Gosimu nara, si tue nd’ as gana
Est custa s’ istajone chi lu dana”

Gosamu a un'ala mi che pone
cussas bideas ca faghes festa.
Ma permiti chi feta protesta
ca sa mia est'atera chistione.
Cun sa caratza posta in testa
thurpos etirajos mamutones:
los bides isfilende in s'istrada
e tue puru sighis sa mascarada.


Cando sos campos de oro estidos sunu
Cun papaveros rujos de ammirare,
totu bi andan a los retratare
ma sunu meos no nde toches unu.
Non b’ad’amante in terra perunu
Chi no l’ada s’amorada regalare
Sos frores de Rino sun serenos
Nara si li regalas crisantemos.


Paola Black ----

Chi bos piaghen festas e caratzas
pro s' istire pedidemi permissu
ca pro sa robb' 'e bos bestire fissu
de cotone e linu si nd' ispatza'
gai su fritu dognunu si che catza'
duncas donzunu mi est sutamissu...
...ca si sa fibra no bos apo furnidu

no bos cuades cara ne cunnidu...

Tristu no est de s’ annu un’ istajone
Gai comente no podet esser s’ annu
Allegru e cuntentu est a cumone
Chie dat bene e no faghet dannu
Est bezu custu contu ‘e su sermone
“narat bene ma ponet s’ ingannu”
Su crisantemu no ruet in s’ ingannia

Ca est de ann’ e vida..pizzinnia.


Gia nde tenes beranu de fiore
in ijerru altare non ba lanzu.
S'atonzu tenet frutu licanzu
gai s'istiu nde tenet a primore.
Ma pessade cando b'es s'amore
si coronat cun fiores de aranzu.
In s'istajone mia tenen vida
simbulu e sa copia ch'est'unida.


 
deo no b’ando a carrasegare
ne a ue Rino bi ando a pedire,
ne de caratzas mi gheglio interessare
comente sò, a fora cheglio essire,
in istiu m’illepio su istire
e mesu nudu mich’ando a ballare,
salas de ballu sena lampiones
ateru che Merdul’e Mammuthones.

Cosim' in istiu godit su cardu
andat cun sa bella pro ballare
Pintore chi si cheret cojuare
portat de sa zàgara s'istendardu
Rin' a su crisantem' at riguardu
pessende sos mortos allegrare...
...Ma deo de sos frores so reina
mudo altares, losas e vetrina...
Faghet su sero una lughe umbrina
Chi atit sa mente a su reposu
Gai s’ atunzu ponet in bedrina
Chie de vida faghet arte e gosu
Ischit ‘ue pasare cuss’ ischina
Chi drita la muntenet dignitosu
Cominzat s’ istajon’ e su tribagliu
Pro chie sa vida no ponet isbagliu


 Cando idides sa domos biancas
chi parene pintadas de arghentu.
Cantas bias bettades farrancas
a su nie pro su divertimentu.
Donni piseddu idides cuntentu
s'idene immaculada sas tancas
Si bada de porcrabu calchi pegus
po lu cassare andades de segus.


Paola est a brincos e a bolos
Ca nd’at de su eranu sos disizos,
geranios, gerberas e lizos
ortensias, tagetes girasolos,
callasa, tulipanos gladiolos
ammenta totu sun sos meos fizos,
un’orchidea bella b’apo inie,
si b’enis, cussa est riservad’a tie.

Pintore a Dian'a banda lassa
no la suguzese pro caridade
chi no ses mastru in s'art' 'e sa cassa
astenidi ca no nd'as piedade
Tue Cosimu cuss'idea bassa
muntenedila ca mi ses che frade...
...e tue Rinu cun s'ischina ritza
mi paret ch'as arrett'atera fritza...

De polcos e polcrabos su raunzu
S’ intendet in su buscu pasculare
Lande, olieddu e frutos de autunzu
Chilcan fin’ issos pro los manigare
Massaju etat ranu pro s’ incunzu
De lampadas o triulas a lu messare
It’ est chi podet esser cuss’ istiu
Chena a mie no coglit un’ utiu.

Tzeltu in ijerru no andas iscultzu
comente in beranu e in istiu.
In sa tana sua si dromit s'ulzu
cun ateros animaleddos custoiu.
Ma deo bi apo su mese pius culzu
in solu vintotto dies es finiu.
De s'annu bisestile e su proe
donni battro nde conta vintinoe.


una cosa bos cheria dimandare
s’amantes sezis de sa cumitiva,
in istiu ch’andades a sa riva
bos bagnades in abas de su mare,
inie donzi atore donzi diva
totu nudos intrana a bagnare,
ma Pintore si pones ment’a mie
nudu, t’imbrossina in su nie.

E tando sezis in su regnu meu
da chi suerades pro su calore
che totu sos viventes in amore
ca est gai chi nos at fatu Deu
 
e pro cantu ch'in vida restat reu
su cristianu si godit su favore...
...de su 'eranu, puru s'est coladu
ca cheret a zovan'esser torradu...

Peppe chin Paula e tue Gosominu
Cherides istajones triulare
No bi nd’ at una chi apat determinu
Si una brincat s’ annu de ‘intrare
Est comente fogu in su luminu
Coitat meda in presse a s’ istudare
Si a linna o calvone no s’ acostat
Pro un’ iscut’ ebbia est fatu aposta

Donn'unu de bois es capacciu
ca bo lu naro in custa poesia.
In sa meighina narre bos cheria
chi su fritu e su menzus allacciu.
Proite faghen sa crio terapia
cussa la faghene cun su ghiacciu.
Pro chi su sole lu siat benignu
su fritu siguru no es malignu.


Su eranu est bellu jà bi creo
Jeo pro cussu no apo oriolu,
mi piaghet po una cosa solu
ca in beranu so naschidu jeo,
ma però una cosa penso e creo
in istiu fia andende solu…
e mai apo tentu maladia
ca godidu ap’e su sole s’energia.

Ma chi chircades curas naturales
tand'issas a su tempus meu benin
sos fiores de Bach ca bos sustenin
bos curana disturbos d'onzi male
e chi no bo los curan bo los lenin
boidu fit bistadu s'ispidale...
...donzunu cun sa meighina sua
pro bos sanare carculos e bua...

Saludos a bois de carre sorres
Ijerru cancaradu dae su fritu
A tie istiu caente iseto torres
21 e cadidanne a meu abbitu
Beranu in sa vida mai nde morzes
Ca totu in su mundu sun apitu
De lughe, de natura e de colores
Chi dian cuntentu .. comente tue fiores

Lampadas e giustu su mese meu
proite naschidu soe su noe.
Cosa es chi oldinadu a deu
chi deo tando naschidu soe.
Ma in s'isporto invernale peroe
fia semper'anende a buleu.
Pro cantu non baiat murrunzu
cun su eranu e cun s'atunzu.


Pintore a mi la finis custa lagna
S’isporto in ierru est fora d’usu.
Cando est arrivende sa sicagna
Sos turistas acudin de piùsu,
ca de su mare si che ghettan susu
o una gita si faghen in muntagna,
si andan in atunzu est in debadas
ca b’at donzi die temporadas.


Paola Black --- 
 
A Cosimu che furo una die
su tres de cabidanni so naschìda
e gai paregiamos sa partìda:
una deo, una issu nd' afìe';
Rinu ada in comunu a mie
su sinnu 'e sa Virzine innida...
...e a Pepe furare li cherìa
 
cussu Noe de rara poesìa...

Gosimu t’ apo dadu su saludu
Pessende de poder andare in paghe
Ma dadu su continu , b’ at impudu
Ca ‘e s’ annu tue ses solu tenaghe
De bator as pag’ oghe.. istadi mudu
Istiu est gatiu e nudda faghet
Est erighina de aterar’ istajone
Su pius istracu e su pius mandrone

Nara Gosamu no sias areste
ca ti rispundo liberu e francu.
Iscaladores a su monte biancu
bi pigana comente a s'evereste.
Est istiu e invernale sa este
ponen ca no nde faghen a mancu.
Chi no morini cue de su fritu
ca es semper'ijerru in cussu situ.

Mancu male, mi tratas de mandrone
Ello tue bi fisi a tistimonzu?
Sas mannas dies de cust’istajone
Las impito totu in su messonsu,
Ca si no messo po s’ocasione
Tando in atunzu intrat su bisonzu,
e tue cun s’ierru fritu fritu
mancu bo lu cazades s’apititu.

Ma no l'idides, tot' a manu tenta
semus sas istajones de s'annu
siat a ispron' o corrìa lenta
donzuna batit virtudes e dannu
tando a bite sezis in affannu
cand' 'onzuna tres meses si b'istenta'...
...e pustis pronta tevet tzeder passu
a s'atera chi mudat custu zassu...


Lussorio Cambiganu ^^^^^^^^^^

Cantu sun bellas .. gai sun cossarias
Sas istajones totu de sa vida
Sa pizzinnia s’atunzu mi daias
Pustis d’ ijerru sa gioventur’ ap’ ida
Isperas sun maduras alu ias
In su beranu chi bivo chida-chida
Cando s’ istiu s’ erva at a siccare
Fin’ eo che totu… m’ ap’ a reposare

Battoro nde passamos donni annu
e chi siana medas b'e s'ispera.
Atunzu istiu cun primavera
e s'ijerru faghe s'omine mannu.
Cando es fritu leamos caldu pannu
ma cando es caldu roba lizera.
Po gai calda tenimos sa gobba
a segundu su tempus e s'orroba.

Paola, de sa vida ‘e sa pessone
In istiu est sa menzus zoventura,
in beranu innossente che anzone
in atunzu arrivende est sa tristura,
ite dol’in s’ierru, disaura
ca est de vida sa conclusione.
Duncas s’istiu solu est c’at valore
De sa vida su menzus isplendore.


Paola Black ----

Occannu puru colat mes' a mese
s'istiu sighit sa mia istiga
s'atunz' ateros tres si nde los piga'
s'igerru totu ponet a magese
tando torro deo ateros trese
e gai si cumpletat sa fadiga...
...ca totus los passamos in rassigna
isettende sa prossima cunsigna...

Chin bois tres.. passados in rassigna
Los amus sos disizos de su coro
Siat in terr’ anzena o in Sardigna
D’ istajones bator eo nd’ assaboro
Una no b’ at de atera pius digna
In poesia mantessi las coloro
A bois totu nobiles poetas
Aguro chi “bos sian totu profetas”

Finimos in amore e in bellesa
peruna istajone si devet esclude.
Siana totu prosperas de richesa
de bundantzia e de bona salude.
Truinfet totu s'annu sa virtude
a manu tenta e cun cuntentesa.
Chi siat istiu ijerru cun beranu
in paghe fortunados a tenta manu.

 
Si la serras la fino jeo puru
E lu zessamus custu murmuriu,
ma ijerru, beranu cun istiu
paris cun s’atonzu so siguru
sun bator frades chi nos ponen briu
nos mantenen su chelveddu maduru.
Goi paret bellu su cantare
Cando nos abrazamus totu a pare.

Pepe cust' 'orta ti furo su postu
tue serras s'annu, deo sa gara
e chi nos siat resurtada jara
no l'isco, ma s'annu amos cumpostu;
a battor istajones sutapostu
ca dogna mese si jambat sa cara...
...Bos rengratzio sos amigos totu,
saludo chin affetu su fiotu...
Fine modulo