tres ainos

Tres ainos



tres ainos divescios de colore:
unu nieddu, murinu e biancu
de cust’aizu eo nde fat’ ammancu,
fini a lorumos olende su piore.
Custu mi paret un’arrejonu francu,
fattu tra divescias pessones,
si tratat solu ‘e malos barones
chi s’arte e su pedire no l’est mancu.

Cust’ est un’assomitzu atuale
poleddos de colores uguales
cobeltos de piore no isco cales,
sunt igrassados totu che mannale.
Molente in sa maghina ti fales,
pessend a tie e solu a fagher male,
impare a su burricu chin s’istrale
truncas su onu, su restu est pro canes .

Setzis totos ‘e colore grogu
cando manigadolza est a cumone
faghides cara ‘ona chin sermone
e pro sa zente inie no b’at logu.
Si s’aligalza unu pagu cumpone
a borridas cando si pesat fogu,
sa giustiscia bos leet a giogu
cando manu lassas in su turrone.

No ponides ne sedda ne seddone,
su garrigu lu dades a letranga,
no idides su chi riet o pianga,
setzis che juda amigos fiaccone
No atzis istima de sa cara infanga
chen’ assomitzu, est chei su caltone
est arrugada chi paret de eldone
e su profilu est falzu che losanga.

Cussos tres ainos de piore cobeltos
no nd’ ana gulpa lu sunu de natura,
no faghent male e de arte no fura,
no isco mancu dae sunt affeltos
De tzeltu isco chi a bois no dura
custa cuccagna de fagher libeltos,
chircade ‘e cambiare pius isveltos
si no sa pena est pronta e segura.