martedì 23 luglio 2013

peppinu Mereu

















Peppinu Mereu

Tue  cantende a Nanneddu meu
as isculpidu  versos in granitu
de Galusè  sas abbas tue Mereu
maniantales  in  poesia as  gitu

sos passos  c’ asa postu arreu-arreu
in chilca de giustiscia fin apitu
cant’ est bistadu mannu su piantu
como ti pesas  altu in su cantu.

sa molte t' at  furadu   gioventura
e   leppa  atalzada  dae sa mente,
sos  versos  de rebelle autore

cantados  dae su menzus tenore.

Totue  Peppinu notu ses presente
como e cantu sa limba che durat.






lunedì 22 luglio 2013

a bogh' e note















  a bogh’ e note
^^^^^^^^
Risposta ..  sa dimanda no ti dada
Si pedis da’ ue  enit  sa bellesa
Est  s’ arte antiga de sa nobilesa
Chi  coro e ojos l’ an bene mirada

Issa de’ totu  sorre est  ‘antada
Fiz’ e sa bogh’ e not’ a s’ orunesa
Su sentimentu chi li faghet presa
Comente  in poesia  sa  cantada

Tantu  si alet che  ricu tesoro
Chi no at  preju  de li poder dare
A totu dat recreu  a s’ indonu

Bisura d’ armonia e de  bonu

Si pintura s’at a poder   amare
Gai  totu nde gosan in su coro


sabato 20 luglio 2013

su feu.. bellu







su feu.. bellu

Si naras rosa.. ma rosa no este
Det esser una cosa differente,
Si  de cussos valores est carente
Li cheres dare  un’ atera beste.

Cando maseda  leas pro areste
Paret chi siat pius  atraente,
est su disizu chi leat sa mente
de render bellu .. su malu che peste    


su conte Ugolinu













su conte Ugolinu

Sa rocca de cummedia dantesca
‘ue est ‘istadu su conte Ugolinu
De sa familia toscana gherardesca
In s’ adde de Siliqua ighinu
Isse de carre ‘e fizos s’ addescat
E de conc’ e piscamu ghibellinu
Conte de Donoraticu est bistadu
Signore isse de su campidanu

venerdì 19 luglio 2013

sa rundine











sa rundine

Sa rundine torrada sut’ e runda
Ocannu no agatat su nidale
viagiu longu at fatu vagabunda
E como no ischit pius cale
In mesu ‘e tota custa baraunda
Cal’ est su bene e cal’ est su male
S’ agatat unu mundu divesciu
Chen’ aciapare su cab’ e su essu.

Elena .. sonetti (Austinu Nieddu..96 annos ... et ateros)


















--- A ELENA ---



Paola Black (sonetto de Austinu Nieddu 96 annos)



Sas oras pius bellas e serenas
passo s' ap' a issa in cumpagnìa
siat in cale logu chi si siat
pro me sun semper sas oras amenas
cand' a costazu apo sa Elèna
est su coro meu in armonia
cun sa mirada sua sol' ebbìa
su coro de amore m'incadenat...

...incadenadu mi restat su coro
a sos ojos zelestes de colore
chi possedit cussa Elèna dea

pienu de affett' e de decoro
no b'at atera femina ch'adore
solu issa mi restat in bidea...



Austinu .. a Paris as furadu
S’ idea de rapire a Elena
Ma no as bidu canta manna pena
At suffeltu populu troianu?
Pro istare chin issa.. menzus sena
Omine solu e mesu isconsoladu
Chie no amat .. no torrat amadu
Ma no tocat sa roba anzena

Paola Black ---Lussorio Cambiganu pro intantu ti respundo deo:

Giai l'ischis chi sa cosa furada
prus bona paret pro su mariolu
menzus in duos chi no esser solu
menzus ancor'a no l'aer pagada
est doppiu su gustu chi ti dada
mancari su mer'est in oriòlu...
...E Paris puru s'at fattu su contu
posca si l'at pagada sen'iscontu...

Una cosa la narrer faeddende
Un’ atera a la bider cossumida
Pustis chi fata est cuss’ atrivida
No s’ ischit si su sol’ est morzende

Pro lu torrar’ a bider arveschende
Cheret chi sa ‘oza siat famida
Ma si bi restat solu pibinida
A sue deris istat pessende

 feminas goi faghen palpitare
in s intragn'e somine donzi orgànu
a trettos chi si unu est forte e sanu
si non la tenet nde podet crebare
ma pesso puru chi nde la furare
siat unu gestu tontu e mezzanu
s amore giamat s amore a solu
e non devet s amore essere dolu

Paola Black ----- (Austinu Nieddu)

--- NOVELLA DEA ---
Sos ojos at chi lughen che istella
chi dae 'tesu s' ìet sa lugura
est issa de sas damas sa prus bella
chi fatu epat sa Mama Natura
a chie l'ìet su coro li furat
e si lu tenet cun manu ribella
est issa como sa dea novella
s'isperanzia de s'era futura...

...Issa in custa vid' amore paschet
li naro: "atera no bi nd'at ch'a tie
chi potat in bellesa superare,

ma cando at a benner cussa die
chi un'atera goi che nde naschet
cherind' a tie solu simizare?"

(de Austinu Nieddu)


E bravu, Austinu corimodde
a sa 'etzesa torrat sa bellesa
c'ancora preservadu at in su fodde
de sos sentidos sa passione acchesa
a cust'edade ancora fiores bòdde(t)
cantende sempre cuppas de dulchesa.
Est propriu 'eru ch'intro 'e coros restat
su chi sa mente cun su tempus sestat.

S'incantu luminosu de s'amore,
sa fura de su coro l'imprimede.
A unu in buca creschet su fiore,
a s'ateru in s'animu l'oprimede.
Gai Paris po Elena non timede,
a Menelau proite s'ardore;
c'aiat forte po chi l'istimede,
deg'annos at gherradu cun valore.

Cantos Paride bada cantas Elena,
e cantos sunu rutos che Menelau,
trazendesi sa vida in tanta pena.

E cantos felices in tanta brama,
de cando su coro li an furau,
atzesu es de imperitura fiama.

Sa pius ambida e pretesa
amante descritta dae Omero
calculada che umbra e mistero
fascinosa e intrigante sua bellesa
soa acheos affronteini manna impresa
e de Troia bujeni muros e battistero
de Paride si fid’innamorada
e cun Menelao dae pisedda cojuada

s’amore in s’Odissea bene descrittu
cun cura e passione ardentemente
chi pariada dae sos deos beneittu

Ulisse su pius furbu cumbattente
dae Itaca parteidi pro cuss’allittu 
e isse puru proedi de s’amore cumponente.


 Già la fatteit bona cuss'impresa
ca tanta gherra cuss'attrivimentu
pro vinti annos chentza nd'aer' resa
medas pattein pro cussu mal'eventu,
de Priamu sa fiza e sa bellesa
fiamas de amore aian tentu
intro su coro 'e cuss'ermosa Elena
ca Paris già suffreit amore e pena

Agamennone, Ettore e Ulisse
e Achille fizu de dea immortale,
sa fritza in cuss'àlchile 'occheit a isse .

E cantos mortos a lantza e 'istrale
sutt'a sos muros de sa bell' Elèna
pro s'amore furadu in bene e male.

Pro dare risposta a sa dimanda
cussa c’ at postu in laras Austinu
“aite su messazu alu mandat”?

d’ amore siat de terra che divinu
No s’ischit pro ite est capitadu
Pro cantu siat bellu e bucantinu

S’ ammore a bon’ edade l’ at leadu
Dae chelu folzis est faladu.
Fine modulo


giovedì 18 luglio 2013

unu soneto













Unu soneto

Fin’ oe.. pro mi poder cossolare
Iscrio  un’ ateru soneto
 rendende  in paraulas su ch’ iseto
chena poder  sas   cosas  cambiare
Amsicora  e balente Gialeto
An chelfidu su sambene donare
Pro terra chi  los at bidos gherrare
‘ue  vessos  d’ amore como  ‘eto.

Chie lu faghet e chie l’ isconzat
Su mundu semper gai at a restare
Pero  sos elementos de natura

Disizan d’ esser  leados in cura

Gai  s’ omine  pessat de mudare
In bonu .. finas  sas peus ilgonzas



domenica 14 luglio 2013

sole e luna .. Figari.. costume Atzara




















sole e luna

^^^
Ses tue che su cardu ispinosu
Chin fozas postas bene a cumone
Punghes a chie no ti dat gosu
Furendedi belles’ e passione
Das piaghere a chie amanitiosu
Ti sighit in ideas e bijones
Tue ses tue.. e che te mancuna
De die sole.. e de notte luna


apparis a sas oras pius friscas
cando su sole chilcat su reposu
e tue nd' essis pro mi dare gosu

paret chi de me, tue  tot' iscas

sos cantos,  nuscos e sos colores
chi dan bellu e abbacan sos dolores.

Emiliu Lussu




















ziu Emiliu Lussu

^^^
In su piave cuntra s’ invasore
At gherradu pro sa libeltade
Pustis torradu de log’e dolore
Pienu de sarda identidade
De sa trincea soldad’ e iscritore
in Sardigna omin’ e dignidade
pesende muros de bona difesa
s’ Isula pius libera l’ at resa.

martedì 9 luglio 2013

naschida (Sini) vida (Pintore) morte (Cambiganu)















Sa naschida (Sini)  sa vida (Pintore)  sa morte (Cambiganu)




Alè Pintò.. it’ est custu mudine?
Bogande dae bertula favella
Cussa chi su poeta de ‘Antine
L’ at rendida isposa reginella
Siat de cabu ‘onu o machine
‘etache totu intro de sa nella
Inie , pustis amus a coglire
Sa naschida, sa vida e su morire.


Inizio modulo
Salvatore Sini ^*^*^*

Sa naschida chi a totu dat cominzu
cundida est de amore e de dolore
sa mama chi pro istintu faghet fizu
già suffrit pro chi nascat su fiore
pro lu contivizare che unu lizu
ca pro issa est su bene pius majore.
No timet su travagliu dolorosu
pro dare vida noa e nd'aer gosu.

Chi Barore difendes sa naschida
ispero sias forte in cuss'impreu.
No isco la das tue o la da deu
cantare la deves a mente ischida.
Tando deo prosigo cun sa vida
cussa mi la leo a contu meu.
Difendo sa vida a bratzu forte
e nudda m'importa de sa morte.

Lussorio Cambiganu ^^^^^^^^^^^

Cando su tempus giompet a finire
No b’at de si fagher mannu meda
Su chi b’ est pustis tio cherrer ischire
Inutile est chi a bois lu peda
Mi restat su peldonu de pedire
Prima chi onzi folza poi zeda
Est su congruu de dolu ‘e gosu
Giustiscia est pro totu e riposu

Salvatore Sini ^*^*^*

E a sa titta in presse che lu ponet
pro ch'sse crescat sanu, bellu e forte,
intro su laccu bene lu cumponet
chi biset sempre onore e bona sorte
e pregat su Segnore chi li donet
tanta foltuna fin'a cando morte,
E l'accumpanzat dai sos primos passos
sempre quidada a cuddos malos giassos.

Sa naschida sinna sa vitoria
ca s'aberit sa janna a su destinu.
Ancora s'omine no est in caminu
no s'ischit chi tene fama e gloria.
Ma e solu andende chi s'istoria
iscriet po chi bi tenza pedinu.
Pero Barore custu mi l'amita
no es tota vida atacadu a sa tita.

Sa parte mia est sa sorre morte
Chi totu paren cherrer timire
Unica zelta est in custa corte
Amiga chi no ischit traighire
Giusta pro totu et uguale sorte
Pro poveros chi cheren irrichire
Sos ricos chi che gighen a s’ interru
Timen su fogarone de s’ ilferru

Salvatore Sini ^*^*^*

Si sa fortuna no ponet incaglios
dai sa nàschida fin'a sa morte
in coddu che trazamus sos bagaglios
chi nos at reservadu vida e sorte.
Est tzertu no sempre sun'iscaccaglios
ma cun crianscia, zelu e coro forte
sa vida giusta podet affrontare
prontu a s'amore e puru a cumbattare.

Ma lassami sa morte a un'ala
gia l'ischis cussa no es preferida.
piusu es s'istima pro sa vida
ca sa morte e sempre cosa mala.
nudda bi at iscrittu in sa naschida
e perunu pesu jughet a pala.
Lussoriu chi siat giusta crese 
Barore sa vida giogu no lese.

Barore ses sa naschid’ e sa vida
tue de vida imbeze su Pintore
eo ambos bos pijo in dispeldida
fatendebos unu mannu favore
bos pedo si nd’ azis apid’ ischida
de cantu podet esser su dolore
c’ azis a boltas dadu o rezidu
ca totu bos benit restituidu

Salvatore Sini ^*^*^*

No crettas chi su tema tou, Pintore.
siat cosa de burula o de jogu
b'at in sa vida inciampos e dolore
ca no sempre nos ponet disaogu,
chie diventat ladru e chie duttore
e chie a donzi bene tragat fogu.
Cantas cosas bortulan sa vida
chi a sa bonura b'at puru ferida

Sa dispedida ati sa tristura
sa naschida da gioia Barore.
Ma de te atere nde tene cura
ti protezet in oras de dolore.
De sa morte totus tenen paura
cando sa vida sola es fiore.
In vida totu si pode tessere
siat su male che su benessere.

Lussorio Cambiganu ^^^^^^^^^^^

No b’ at cominzu chi no at a finire
Comente no b’at vida chena morte
Si naschida benit at aultire
No conneschet de sa vida su forte
Sa vida est prezis’ a su morire
Cando la passat chin su fog’ in corte
Sol’ eo so de su mundu zeltesa
Nudda bos pedo, so chena pretesa

Salvatore Sini ^*^*^*

Pro narrer de sa morte...Cambuganu
est cussa cosa chi de mancu timo
ca no t'abbizas chi da-e 'onzi manu
si ch'est fuida cun chizos in bancu
No timo ca che donzi cristianu
no chinnit mancu a colpos de parancu.
Sa morte no s'abbizat chi ses moltu
ca Deus donzi loru l'at isoltu.

Tue faeddas de mundos dirrutos
deo no ando a sa currente tua.
Ca apartenes a so rifiutos
de sa morte totus lean sa fua.
Lea s'esempiu de una frua
cando chi creschet atidi so frutos.
Ca es sa vida su bene de deu
e nde godit totu su mundu intreu.


Niune chi mi chilchet in su gosu
O puru cando viscios su binchende
Solu chie no connoschet reposu
Onzi tantu in janna est zochedende
A isse do sonnu armoniosu
S’ ateru lu passat pianghende
Sa morte ponet sos contos a postu
Finas chi su pentidu narat “bostu”

Salvatore Sini ^*^*^*

In carchi logu donzi naschimentu
a bortas est unu mannu problema
in logos ue b'at famin' e iscalmentu
e no b'at nudda a bustu ne a chena
ca sa naschida est cosa 'e pattimentu
già l'amus bida carchi dura iscena.
A bortas est mezus de no esser' nadu
pro no ch'essere in pelcias imboladu.

Ue b'es sa vida b'es sa festa
in'ue b'es sa morte be su dolu.
beru est in vida b'at oriolu
chie at vida longa non protesta.
A bias sa naschida es funesta
po chie enit a mundu solu solu.
Su disinnu de vida est iscrittu
ma totu dipendet de su meritu.

De vida so sa prenda donosa
Difatis benin fin’ a m’ agatare
Pro issos so sa dulche isposa
mi cheren totue comporare
eutanasia pro intrar’ in sa losa
e custu mundu poder abbandonare
s’ idet chi no so cussa majalza
chi naran.. ca no so sa faulalza.

Salvatore Sini ^*^*^*

Cando mamma fit prossima a su partu
fit tantu manna chi nachi fin' duos
e inveze in cussu mese de maltu
no finu duos cussos fizos suos
e cussu partu no l'andeit tortu,
pro fortuna chi no fin' sos giuos:
Ma fia solu cun sa rughe a pala
ma a pagu a pagu pasta l'ap' a un'ala.



No leo sa vida a manchincuru
a manchincuru sa vida no leo.
Ca po cantu su bive siat duru
chi siat gai malu no lu creo.
Lea sa filosofia de Epicuru
cando bes sa morte non bi so deo.
E cussa est una sententzia fissa
non bi so deo cando bi est issa.

Lussorio Cambiganu ^^^^^^^^^

Sa morte est eventu naturale
Comente sun sa naschid’ e sa vida
Totu benit .. totu est cabale
Finas si lassat in corpus ferida
Nois semus de regnu animale
De natura sa parte preferida
Pro cussu naro chi finas sa morte
Cand’ enit .. no est de malasorte.



Sa morte cun sa naschida e sa vida
già sun' sa triade de s'esistenscia
totu cominzat dai sa nàschida
e totus la trazamus cun pascenscia
dai sa prima a s'ultim' avreschida
impittende sia mente che cuscenscia.
Isperansciosos chi tot' andet lisciu
cando a favore nos est su giudisciu.

Comintzat e finit ca es normale
donni cosa chi enit a su mundu.
Su naschere es decretu naturale
comente es su primu su segundu.
Ma s'ora e sa morte es fatale
ca nisciunu si mori giucundu.
Cussu e semper unu eventu tristu
chi a timidu fines Gesu Cristu.

Lussorio Cambiganu ^^^^^^^^^

Dulche o mala issa cheret rispetu
Ca est s’ arrivu chi no podet mancare
Inie est dezisu su progetu
Finzas si totu cheren olvidare
Est comente unu trenu diretu
Chi paltit e si tiat cherrer frimmare
Imbeze cuss’ arrivu est fatu a posta
Pro cantas sian istadas sas sostas

Salvatore Sini ^*^*^*

Su sale in fronte est sa sabienscia
segundu cussu santu sacramentu
chi nos ponet de Cristos sa prudenscia
ca semus fizos de su santu eventu
a sa nàschida dat ondra e decenscia
pro nd'aer' in sa vida gosamentu.
Ma puru in manos de sa Dea fortuna
ca chena cussa no as cosa peruna-

Sa morte nono non chere rispettu
ma su mortu chere rispettadu.
Poi ch'es mortu enit amentadu
siat po opera bonas o difettu.
Si fu malu naran mai esse nadu
chi fit bonu fi che santu perfetu.
sa fama bona o mala no es peldida
est'iscritta in su libru e sa vida.

Lussorio Cambiganu ^^^^^^^^

Sa linna pro s’ ijerru preparadu
As oe de baranta cuintales
 
S’ ortu puru tue asa zapadu
Profetos nd’ as aer uguales
Tantu t’ impignas comente as nadu
Gai sos frutos an a esser tales
Sa vida puru in mala o bona sorte
Est s’ aparizu chi antizipat morte

Salvatore Sini ^*^*^*

Pensade 'e babbu e mama sos disizos
cando battidu t'ana in custu mundu
cantas isperas, pesende sos fizos
isperansciosos ch'apan in abbundu
onore e gloria e sa giaresa in chizos
e milli benes chi 'oltan' in tundu.
A bortas andat bene e dat cuntentu
ateras bias dat su pattimentu.

Tenes rejone barore ca es gai
donnunu chere su bene so fizos.
E de issos sunu puru so disizos
chi mama e babbu no molzan mai.
Cando arrivat sa morte es guai
ca restana orfanos cusso lizos.
Vida longa po issos es pregada
sa morte mai enit fentomada.

Lussorio Cambiganu ^^^^^^^^^

Pintore, cantu naras de vida
Est beru solu a lu contare
Ischis chi morte cheret timida
S’ in vida no l’ ischis preparare
Si tantu obera no l’ as finida
Tempus no bat pro ti nd’ impudare
Cando tempus abbaidas in segus
T’ abbizas chi nudda benit chin tegus

Salvatore Sini ^*^*^*

Jesus bambinu naschidu in sa grutta,
cantadu nd'an sa vida in s'evanzelu
e in chida Santa sa dilgrascia est rutta.
Che cristianu sighende su zelu
onoro totas tres no pro un'iscutta
pro chi mi siat diciosu cando in chelu
ted' aer acabbu tota s'esistentzia
isperansciosu in Deus..ch'apat clementzia.

Lussoriu a sa morte so istranzu
e no mi cantes como passu tristu.
Isco ca de morrere es previstu
siada s'omine rassu o lanzu.
Ma sende in vida donni acuistu
lu fato deo cun donni balanzu.
E no so po ennere vatu a tie
ca mi godio sa vida donni die.

Comente faghes a nde narrer male
De chie faghet de vida giustiscia
Sa morte bochit su criminale
Chi semper in vida l’at fata liscia
Ricos.potentes e sos caldinales
Inie totu cantos sun a miscia
Totu sos chi bi faghen presenzia
No mustran pius una diferentzia

Salvatore Sini ^*^*^*

Pattada cun Berchidda e Ortueri
pigados sun' in palcu pro cantare
no fimus tzertu in cussu 'e Othieri
ma nois pregamus de noll'atzettare
semus poetes che 'onzi banduleri
già podiamus nois menzus trattare
cust'argumentu tant'appassionadu
cun su terrinu pius apparinadu.

Poi e sa vida terrena a deu
torramos sa morte no at'ingannu.
Morit su minore morit su mannu
morit s'innotzente morit su reu.
Sa vida eterna a chie sena neu
dada,a su pecadore s'afannu.
Menzus morzat sa morte e su male
chi si nascat po bivere imortale.

Lussorio Cambiganu ^^^^^^^^^

Sa poesia d’ Elchidda e d’ Ortueri
Comente de Patada e donzi logu
Cantat sa vida che a passizeri
morte la malcan brujad’ a fogu
Totue est presente oe e deris
E ponet a pasare onzi arrogu
De custos tres fatos naturales
issa est sa chi c’ ogat sos males

Già semus nadas totos tres e bios
semus campende, sighend'a campare,
tue ch'amas morte e lagrimas a rios
s'ìstet in cue appitu e imbarende
Godimunos su ch'amus sempre in brios
apretziende su chi nos est dende_
Sa naschida che 'e termine est mortale
est beridade digna e naturale.

Lussorio Cambiganu ^^^^^^^^^

Dae sa foza morta naschet frutu
E pustis est de vida s’ alimentu
vida imbeze isetat su lutu
d’ omine ch’ est pius tristu de cuntentu
su naschidu dae su letu nd’ est rutu
e sempre cheret a isse s’ atentu
sa morte est logu ‘e veru pasu
cando dulche ti porrit su asu

Salvatore Sini ^+^+^+

Essende poeteddu 'e taulinu
versos a bolu ch'apo improvvisadu
chirchende rimas che unu pellegrinu.
M'iscujo si in feuras so incappadu
mancu s'essera cottu a vermentinu
ma creo chi tep'esser iscujadu:
Cunzo cuntentu custa, in bonumore
cun su saludu caru 'e Selvadore.