lunedì 31 dicembre 2012

‘e grascia ‘onzi domo siat piena.














‘e grascia ‘onzi domo siat piena.

Adiosu  annu  luego ilmentigadu
Pagos t’an a muntenner in su coro
Forzis  sa gulpa  chi t’ an riselvadu
No est propiu sa tua, ma s’ issoro
Restat memoria de malefadadu
Ch’ at bendidu de vida su tesoro
Sas artes, sas isperas de sa vida
Totu  soltas  che nie bianca nida.

S’ est beru chi pustis torrat calore
A segus de sa note  tempestosa
Iseto chi cust’annu benidore
Nd’ oghet  lughe bona dae sa losa
Chi siat  d’ onzi bene trazadore
A chie pius  bisonzat   sa cosa
de  connoscher   sa die mai bida
naschid’ in  paghe e serena cumprida.

S’ isetu  no at peruna pretesa
D’ aer  su chi disizat sa vista
Nudda chi diat  sa vana richesa

A  mastru de carriera e arrivista.
Unu pagu de briu a sa carena
‘e grascia  ‘onzi domo siat piena.

sabato 29 dicembre 2012

benes immateriales











Benes  immateriales.

De bidere s’ anzenu  m’ acuntento
Chena  magone e su sorris’ in laras
Pustis  lu sigo  e sa trata li tento
Finas  si no paramus  sas caras
Custu est su chi naro e chi sento
De poder biver  sas  bellas e raras
de zente chi de grascia nd’ est piena
finas si no est prinzip’ in s’ arena.

Est  de sa vida  regula fissada
De’ sempre  forte in sa nobilesa    
 Barata, ma est sa  pius prejada

Ca  de valores nde faghet richesa
Est chie de sa vida nd’ est cuntentu
D’ aer apidu  tot’ a coro tentu.

venerdì 28 dicembre 2012

2013











BON’ ANNU NOU….a donzi cristianu

A finas .. cust’ annu  ch’ est passadu
doighi meses e bator istajones,
cumpridas  festas e delusiones
siat in caldu che tempus  astragadu.
Dies  e nottes  chi sas cundisciones
de custu tempus nos at  cussignadu,
sempre sa luna, su sole e sos isteddos
an dadu lughe  a mannos e piseddos.
Idim’ innanti a su tempus benzende,
etam’ a palas  onzi  cussideru
siat malu, siat falzu o siat beru,
totu passadu  si ch’ est olvidende.
Giae s’annu nou so leende a seru,
mi paret  de lu ider  arveschende,
impare  a custa notte pigurina
ogache  dae su mundu  onz’ ispina.
Duamiz’ e doighi sun sos annos ‘idos
dae cando  Cristos  at postu  pè in terra,
tempos de paghe ateros de gherra
totu peroe sun istados   cumpridos.
Chie at trampadu a s’afferra-ferra,
chie de onestade  sun dechidos,
a totu como istringo sa manu
bon’ annu nou.. a donzi cristianu.

martedì 25 dicembre 2012

amade












Amade

Ojos chi ischin su mundu abbaidare
Comente una mama  affetuosa
De totu sa  familia premurosa
negat  a issa  pro sos fizos  amare

Gai  apat  bisur’ umanidade
Pro chie  no at pasu  in custa terra
Inzegados de’ odiu de sa gherra
Negat  paghe,  seren’ et  amistade.

Custu  est su cunzet’ e ziviltade
In die ‘e Nadale.. amad’..amad’… amade..!!

domenica 23 dicembre 2012

NADALE 2012


      











  B U O N   N A T A L E
B  -  os  tio cherrer dare unu fiore
U  -  nigu, de colores  naturales
O  -  lfanu dae tristu e chena males
N  -  ebidu  che- a su prim’ amore

N  -  ados in custu modu verticale
A  -  ugurios  chi essin  dae core
T  -   antu  bos porro  rendende- bos onore
A  -  totu cantos  de  Pasc’ e Nadale
L  -  eadelos  comente   prenda siat
E  -  onz’ ateru bene Deus  bos diat.

giovedì 13 dicembre 2012

versos










versos


^^^^^^^^^^
Sos versos andan a su ‘ola –‘ola
No pedin  a niune s’ assimizu
De poesia no b’at  sol’ un’ iscola
E no   esistit siat  babbu che  fizu
Paraula in cumpanzia o a sa sola
Chi  tocat su cor’ a  prim’ aizu
Est cussa  chi coglit  su mamentu
siat in gosu  o puru in patimentu

pustis brincan e lean su 'olu
ispintos dae sa forza 'e su sentidu
a caddu 'e duas candidas alas

si pijan siat su nadu che su bidu.
dae altu nd' etan paraulas malas
su bonu in sos versos restat.. solu!!.




tempus passadu...(poeti improvvisatori, Pintore, Masia, Cambiganu)











tempos passados

Lussorio Cambiganu

Sa terra ‘ue pones raighina
est solu pro un’ ora passizera
su tempus de abbasciare s’ ischina
pro ti l’ asare che a mama vera
pustis t’ aceras a sa sort’ edrina
chilchende de cumprender sa manera
comente menzus poder ‘istare
in tempos chi che deven colare.


Inizio modulo
Su bisonzu, mover faghet sa zente,
su 'etzu, narant chi fatat cùrrere:
e no est dadu a ogni vivente
chi 'ue naschet bi devat mòrrere.
Dognunu at destinu diferente
e mai est su chi diat chèrrere:
siat in logu sou o istranzu
un' istat bene 'ue b'at balanzu!

Gai est.. comente naras tue
In versos de poesi’ e Uthieri
Sighidos sempre dae sa nue
Chi faghet istranzu e furisteri
‘ue si siat in su mundu chi ruet
Pessat a cras.. isperiend’ a deris
Pro cantu in sa conca si lu cuat
In mente restat terra mama sua.

Sa vida s'afronta cun coraggiu,
pro cantu siat su terrinu rude.
Ca innoghe semus de passaggiu,
siat curtzu o longu non bi dude.
Sighire lu devimos su viaggiu,
menzuzs coronadu de virtude.
Solu chi aboltas cussa mancada,
e tando a so viscios s'afiancada.


 Si tempus che devo passare
cà mi restat curza caminera
andende si ch’est primaera
e mi restat solu su poetare
cando tzovanu podiu tribulare
m’arrangiaio in cale siat manera
como decrepitu e antzianu
tribaglio solu cun pinna in manu..

Lussorio Cambiganu ^^^^^^^^^

Peppe, Franziscu e s’ improvisadore
Dae Codaruina amiga Teta
de su tempus passadu e benidore
impitamus chin s’ anim’ e poeta 
tot’ a s’ indonu damus su valore
de sas ideas e nudda nos isetat
si no cussu chi est su cossolu
de no esser ‘istadu mai solu.

Mai lu semus solos in sa vida,
chi non ba zente bes sa natura.
est'issa chi nos curat e guida
est'issa chi nos guidat e cura.
cando cuntentos cando in tristura
a donni die damos sa benennida.
Tra passadu presente e futuru
de colare vida ona e s'auguru.

lunedì 10 dicembre 2012

sa 'idda









sa 'idda


Chie dae sa mente e su coro
Chelfidu t’at chin su sol’ in cara
A palas de su bentu de Limbara
Isperiende montes de Nuoro

Tantu ses ispeciale chi ses rara
e restas tue su menzus tesoro
Chin sa limb’ antig’e Logudoro
Allegras de sorrisu onzi lara

Sa poesia, s’arte t’ an pesada
Impare a sos bonos artigianos
Su cantu ‘e su pastore recuende

Su sero chi sa die est ninniende
Totu ‘essidu dae ment’ e manos
Creschidas in sa sedda de Patada.

domenica 9 dicembre 2012

sa merula














sa merula


S’ aera  s’ est abbelt’ e ilgianta
Custu manzanu  isperiend ’ a sera
Intendo  merul’ a su canta-canta
Chena disizos e perun’ ispera
Com’ a su fritu de boza nd’ at tanta
De giumpare lueg' a primavera
Festas d’ ocanno  chena perun’ isetu
Totu paret frimmu e chietu

si cambiat  su cantu cras manzanu
est ca  tempus li benit  occannu
divesciu  siat  in isetos d' ispera

che in benidore chi siat vida  'era

cussa  pro totu  chi no siat de dannu
ma solu  su cominzu de s' eranu.

giovedì 6 dicembre 2012

bon' anghelu
















bon' anghelu


Solu cando ti chilco,  apo presente
su chi m’ istat a faca e no lu bido,
pesso chi  solu sia ..e tue assente
cando chena sulenu mi nd’ ischido.
Ma  ite   cosa  bell’ e  atraente
s’ intras in coro e de te  mi fido,
giumpo sos  lamparigos  connotos
semper presentes dae tempos remotos.

Tempos chi torran cando in sa mente
s' azendet cussa lughe chi atis tue,
t' ido riflessu  in ojos de sa zente
e in donzi logu..presente   totue.
Sighende s' arcu  naschid' in oriente
mi paret  d' esser cun tegus in cue,
a sero dae ocidente in su   reposu
mi torrat su serenu impare a gosu.

E puru b'at mamentos chi ti lasso
e torro a sighire  ateras modas,
cussas chi  mi  traighen frecuente

rendendemi  de mundu dipendente.
Est tando  chi dae sulciu ch' esso foras
e dae sa veridade atesu passo..









mercoledì 5 dicembre 2012

cantu a tenores





cantu a tenores

cantu a tenores

cando musica, art’ e sa  bellesa
in terr' an postu pè e sun naschidas,
lacanas no b'at chi la tenen presa
totue sempre intesas  e bidas.

Cantone chi  sirena l’at intesa
pro l' impitare e fagher  muinas,
Cant’ a tenores paret uguale
A cuss’ istint’ antigu et animale.

Cando si pesat s' antig' armonia
de  Bitti, Orune e tota sa Barbagia
falat impare a rios  a su mare

pro poder su mundu atraessare

pustis  in donzi cost' e ispiagia
lassat  de sa Sardigna  poesia..

martedì 4 dicembre 2012

marcinelle










Marcinelle
^^^^^^^^^^^^^
Ammentos  doverosos de disterru
De chie chilcat in vida s’ ocajone
Dadu lis han unu picu ‘e ferru
Pro  solver su  suore chin calvone
Isciaos  valorosos  in  s’ ilferru
Falados   pro  nde coglir’ un’ ucone
De pane  chi sa belga  miniera
Lis at torradu a mala manera

Su pane  che-i su crastu fit duru
E puru  l’ an devidu mastigare
Una vida de poder mezorare
E domos de nde pesare muru
Pro cantu mannu  in su tribulare
Tant’ est  ‘istadu su tempus  iscuru
Peroe  no est bistadu pro niente
S’ an fat’ unore e unu Presidente.


Italianos b’ at in parlamentu

De su pallone b’ at campiones
 fizos issoro chi no sun mandrones,
an dadu a sos babbos  su cuntentu
de miniera nd’ apan sos unores
e no connascan pius patimentu
peleas passadas  e tantu sufrire
siat   pro un’ Europa de  aunire

  

lunedì 3 dicembre 2012

unigu penseri











unigu penseri



Chie  pessat  d’ aer rejone solu
Narat  chi sa  vid’ est  regulada
Ponet   onzi duda in su cuzolu
Pessende chi  siat  una  s’ intrada
Pustis   totu faghet a corriolu
De chie at un’ atera pessada
Che finit   sempre  pius frecuente
Chi restat solu  isse  chin niente

Penseri solu est  tot’ un’ ingannu
Ca nudda atit  a s’ arrichimentu
A  sa cumone  meta  intelighente

chi dat  cuncoldu lalgu  pro sa zente.
Chie  creet d’ aer  su mundu tentu
no dat nudda e faghet solu dannu


domenica 2 dicembre 2012

ijerru taldajolu









Ijerru taldajolu

^^^^^^^^
Ijerru che ocanno  taldajolu
ite pessas  de poder  garrigare?
Subra  ‘e tie semus in oriolu
Chi potas  totas venas astragare
Intendo sonu de su pipiolu
Chi  paret  in sonnu acumbessare
Siat piantas  e sos animales
An postu pilu russu  a t’ isetare

Francu ‘e Sale mastru ‘e Mammujada
Est in sa janna  ch’ ispizat su bruncone
De alinu  nde faghet caratzada
Pro bestire  a nou a malmutone
A fine li dat  una pinzellada
Niedda  che colore de titone
E tue ijerru  chi mustras sa fatza
Occanno cale pones de caratza???

Forzis   nos dias torrare  su favore
De t’ aer  meda tempus isetadu
Isperiende   colores de s’ aera

Chi   tantu amus  bidu et isperadu
Comente cussu ruju ‘e tarda sera
Chi  dat  ispera  e illuminat su core

sabato 1 dicembre 2012

versos binnidos

















versos binnidos



Chie pro  gosu o pro allegria
Si proat  a cumponner’ un’ otada
Est  pius bravu de chie si siat
Pessat  de l’aer  sol’ iss’ imbentada
Mere  no est de sa poesia
Si no est sua  ma l’ at copiada
D’ esser  innida  est su ber’ impoltu
Et d’ aer  nessi  unu nod’ isoltu.


Francesco Fruianu
 
ma itte cheres chi copie poesia.
e dae e chie la tia copiare ?
no sò inoghe a faghed balentia
sa cosa anzena la lasso istare
si sas bostras bettera tottu a pare
no n'de faganene una de sa mia
atera poesia no mi abbisonza 
e a lu narred faghedinde sa isgonza



De su chi naras mi faghet ispantu
Ti pessaio ‘e sinnu bonu mastru
Si leges bene no apo nadu tantu
d’ esser leada pira pro pirastru
in cuss’ otada eo nde fato bantu

de chie d’ umilidade faghet astru
a diferentzia de su chi naras tue
no do votos ne innoghe e ne cue

si pustis pessas de t’ aer chilcadu
su diciu est betzu ..no est cosa noa
onzunu bidet mundu a modu sou

e a bias brujat de paza sa coa
ma si tantu ti pessas offesu
comente so intradu ‘esso de nou.



titulu e mastru no minde meritò
ca no appo poesia in facustade
canto solu si b'ada amistade
chi sia tardu o chi sia chito
però a nisciunu lu permito
chi si dubited sa mia onestade
e de so poetes chi inoghe sunu
deo mai offesu appo a nisciunu

Inizio modulo
Lussorio Cambiganu ^^^^^^^^^^

Si tantu mi dat tantu est un’ isbagliu
De sighire arrejonos connotos
Cando cheret s’ agatat s’ incagliu
Pro fagher d’ abbas frimmas abbolotos
Cand’ in su late b’ etan tropu cagliu
‘ essin ranchidos casos e regotos
Etand’ est menzus de nde la finire
Prima de narrer , menzus est midire.

Francesco Fruianu 

oii gesù maria, eite impiastru
ada suzzessu custu manzanu
una frase e s'amigu gambidanu
ada iscatenadu unu disastru
pared che su ch'iscuded a crastu 
e poi che remonidi sa manu
deo li ripondo e l'aisetto
ma poi che poete lu rispeto

tue ses poete de sa sarda zona
e asa bella rima e bonu tragiu
asa in coro poesia e rima ona
no asa bisonzu e faghed oltragiu
però su poete de coraggiu 
mai su campu e gara l'abbandona
mai si che essidi dai ia 
ma ripondede cantende in poesia
Nudd’ ite narrer de cust’’ argumentu
no apo manu de che remonire
Paraula de crastu ‘edad’ a bentu
No faghet che tempesta regoglire
Si cheres leadi gos’ e cuntentu
E sas rejones puru as a pedire
Pro cantu apo post’ a s’ incominzu
As postu fogu tue chin s’ allughinzu

 lea sa rima pro su chi ale 
no ti chezzo lassare abolotadu
deo retiro sughi appo nadu
tue che a mie faghe uguale
tantu, o deo appo cumpresu male
o tue no ses bene ispiegadu.
gai ogniunu restada cuntentu 
si è sa gupa a su 50 pro 100

Lussorio Cambiganu ^^^^^^^^^^

Su nadu restat in cue repostu
E nudda lu podet cambiare
Fat’ istat chi meritat su respostu
Paraulas chi si poden olvidare
Ripito pro alu una ‘ia e bostu
S’ otad’ a tie no cheriat chilcare
Torral’ a leger chin atenzione
est bantu e no zeltu leiscione.

cheria assicurade custa zente
chi no c'ada ne gherra ne cunflitu
e gambidanu sughi ada iscrittu 
è securu no lu pensad veramente
a cheffidu allegrare s' ambiente 

creende unu pagu de atritu
gai s' attenzione s'alimentada
ma poi ogni collega si rispettada


Lussorio Cambiganu ^^^^^^^^^^^^^

De tanta gherra e tanta matana
Nde poden faeddare sas puzones
Ca mancu sos poetas campiones
De ponner malumore aian gana
Contan mamentos chi lassan valores
E chi nde ‘ogan sa limba dae tana
Pro cantu pesso eo nudd’ est suzessu
In poesia totu cant’ est cunzessu

e parte mia no bessid lamentu
damus a peraula giustu valore
sas peraulas che la bolad su entu 
e poi no s'inde ada piu sentore
sos poetes nde naran e ogni colore
tottu difenden s'issoro argumentu
poi finin si toccan sa manu
gai faghimus noi gambiganu

Lussorio Cambiganu ^^^^^^^^^^^^^

Sa vid’ est custa a s’ alciali fala
Chie la cheret cota e chie crua
Ma poesia ischit ponner s’ ala
Cumponet totu in jaru dae s’ acua
Passat pro bona sa paraula mala
Chi siat bistada mia o sa tua
Contat chi su penseri restet sanu
Siat iscriende che dendesi sa manu

Pro cantu apo post’ in poesia
Nudda mi poto de issa pentire
In casu no mi sia ispiegadu

Cunfrimmo cant’ iscritu e tantu nadu
Sa manu illongo pro ti la porrire
Chin saludu cantare atera bia
Fine modulo

Francesco Fruianu 

a li dade valore est illusoriu
peraulas bonas o essidas male
su valore issoro est irrisoriu
i s'iscunfinada rete virtuale
como serro e saludo puntuale 

ringraziendelu s'amigu lussoriu
poesias isostas iscrittas a brazzu
e lu saludo cun fraternu abbrazzu