A “leonida” Cossiga
Ite b’at a restare ‘e sa figura
de custu ingombrante Presidente?
De zeltu no s’essida a continente
e mancu sa chi paret abiura.
Unu notaju meda eloquente,
unu ch’ at seberadu vida dura
Ca pro s’ignotu leadu no at paura,
at cufidadu menzus chin sa zente.
At dadu folza a sa sinzeridade,
chilchende ‘e ponner sas cosas in jaru,
ogadu s’at ‘e conca foza ‘e laru
e postu s’at berrita ‘e sardidade.
Lead’ e maccu e no pius de faru,
timidu che peus disamistade,
nende chi fit gulpa ‘e s’edade,
amigos e inemigos , unicu garu.
Est beru no est fazile s’aboju
a sas ideas chi ballan sa dassa,
ma fini solu contra a mala trassa
e contra a chie nde ogat s’oju.
Ma finzas s’arrenegu poi li passa
che ‘ona abe rejna in su moju,
su mele ‘e s’Italia in su poju
a totu at dadu in fide, a totu lassa.
Nessun commento:
Posta un commento