veridade ammesada

Veridade ammesada

Aite?..........pro ite l'est fatende?
meda sunt sas dimandas, totu chena risposta,
in sa zitad ‘e Dite che la sunt chirchende!
...eppuru, istende atentu la gighes  in s'imposta.

Sa ziviltade noa, la leat   ‘a birgonza,
chircat ‘e mentovare solu sa cumbenienzia,
pro aproendar' a issa, bi cheret pedde in conza,
a mantenner  in vida, meda forza e passenzia.

Leamus pro esempiu, su ch' est in custu casu,
fatende sun de totu, pro dare binu e pane
a sos poveritos chena paghe ne pasu,
pro los leare poi, a fune che su cane.

Aite?........pro ite l'est fatende?
dimanda frequente, pagu zelu in risposta,
si custu paradisu, semus arruinende,
dademi su motivu, chie ponet  lardu in costa?

Et eo cumbatende, pro impignu chi bi ponza,
dende, fatende 'e totu, pro li dare presenzia,
est chei s'atu niedda, su padre e sa monza,
chi cando ident a issos, si tocant pro esigenzia.

Issa, meda evocada, leada a cadapasu,
est forte, sana e bella, timid ‘e mariane,
est abba cristallina, pro ateros d’ intasu;
est  sa” veridade”, est troppu sale in pane.

In forza 'e sa rejone e de malos cossizos,
pro esser' in chelu  e terra padrones dominantes,
amus ligad' a issa, trampende in cumprumissos
e in s'indiferenzia sas faulas sunt costantes.