sos gregos... arrejonu tra mie e Peppinu Pintore de Ortueri (disterradu in Grecia)…

Sos gregos

Giuseppe Pintore

No bos poto lassare una sera
ca dades isfogu a sa poesia.
Sa pagine azis fatu a bisera
pro diveltire custa cumpagnia,
comente poto de parte mia
de rispunde chilco sa manera.
Chi no do versos a preferenzia
dimando perdonu cun passenzia.

Azis tratadu temas de importu
s'amistade Pissenti a sustentu,
Mariu a cantadu s'iscunfortu
de su babbu sa tristura ca tentu,
Lussorio contras de su parlamentu
donni deputadu chere mortu.
Paola puru comente at'a usu
in su carru ba ostu linna susu.

E deo umile e peregrinu
ite cherides como chi bos cante?
Chi no sa vida de s'emigrante
e de sos omines su destinu,
po faghe custu tema a puntinu
est'oportunu chi mi piante,
e giamo sa musas a s'appellu
cun Febo pro lu pintare pius bellu.

Tzeltu ca manna e sa suferenzia
pro cantu paret sa vida colorida,
su die tribagliende pro sa vida
su note s'ispera in sa providenzia.
Sa mente no reposat semper'ischida
su coro palpitat pro sa sentenzia,
d'esse custrintu in terr'anzena
hai destinu ingratu e dura pena.

Gai a sa die sighi sa chida
a sas chidas sighini so mese,
a so meses sos annos e sa vida
che colat chi mancu bi crese.
Betzu cando no arreas in pese
ti preparas pro sa dispedida,
passa totu sen'amparu ne ghia
bivende luntanu e sa patria nadia.

po como mi frimo innoghe saludos.

Lussorio Cambiganu 

Sos gregos lidos t’an dadu sulenu
Peppinu no la lees a rechinta
In conca e coro a disizu pienu
Cheres dare a Sardigna una linta
Ca bramas terra tua chena frenu
E che cuadru ‘e Giotto tue l’as pinta
Però ammenta chi cussa terr’ anzena
At dadu a ziviltade sa carena.

Giuseppe Pintore 

Tue li naras popolu tzivile
peroe Lussorio penza e cre,
ca custu popolu no es pro me
ca prefero pius su meu cuile.
Innoghe decadenzia de s'istile
che nd'at chi sunu fora de se,
e de sa tzivilidade chi nas tue
no nd'a restadu traza ne nue.

Lussorio Cambiganu 

De cussa ziviltade disterrada
Nd’amus trata in totu su mundu
De Aristotile sa filofosada
Est in occidente vagabundu
Eppoi Socrate, Paltone l’ana dada
Sa trata ‘ona che restat in abundu
Pericle at postu sa demograzia
Ancora oe..in grascias est ia…

Giuseppe Pintore 

Chi zitas so sette sapientes
Periandru Talete e Solone,
Cleobulo Biante cun Chilone
Biante Pitacu fin presentes.
Aristotele Plotino serentes
Anassimandru Fedro e Zenone.
Anassimene cun Anassagora
Agatone Misone cun Pitagora.

Lussorio Cambiganu 

De grega antiga virtude de pesseri
An insinzadu totu sa teorias
Talete, fidia , e Omero peri
De artes bonas de manu e poesias
Mai che tando ne gregu o furisteri
At tentu coro e concas sempre ias
Chena contare sos deos e Ulisse
Esempiu de curagiu est sempre isse.

Giuseppe Pintore 

Chi deo in Tebe esse naschidu
invetzes de Pintore Pindaru,
aere tentu pro lumene ma es raru
chi a tantu essera arrividu.
Tue puru de Omero in tonu jaru
sas imprenta suas aeres sighidu,
ma de cussos famados d'una ia
oe nde resta su piuere ebbia.

Lussorio Cambiganu 

Ammentos sun de Pindaru in su cantu
E de Omero in s’alta poesia
Su primu olat ancora a ispantu
Secundu est simbul e armonia
Como de issos che restat s’ammentu
E su piore intrat ue si sia
Nois a issos podimus decantare
Ca mai su signu s’at ilmentigare

Giuseppe Pintore 

Sa poesia de issos amus a usu
proite contan'issos sos eroe,
so versos chi tessidu ana susu
paren versos dettados de sas noe.
Peroe ti naro a tempus de oe
omines gai o nde naschi piusu.
Pro dare ispantu a sa zente futura
paret piusu avara sa natura.

Lussorio Cambiganu 

De tebe a Ceuta a su Peloponneso
Isparta chi Atene an aunidu
In sa tessaglia e s’isula ‘e Creso
Totu in un’ istadu an bestidu
Pro cust’ istoria m’iscabiddo e nde peso
S’istima mia pro su ch’ apo ischidu
Sas memorias bonas l’an in usu
Comente cobeltura ch’ est in susu.