Brios noos
Como ch’ ido in d’una pelcia ‘e nue
unu raju ‘e sole ch’ est bessende,
paret calchi cosa cambiende
in su caminu chi nos gighet a cue.
Sun sos isetos mannos lorumende
chi paren chelfan andare totue,
sun che su caddu anniju ancora rude
chi est de brios innidos, salude.
Dae tempos carrulante passizeri
istracu s’est de Giobe passientzia,
non b’at pius peruna diligentzia
chi potat assuprire a su maneri.
L’an isculadu no b' at pius presentzia
mancu s’ammentu ‘e comente fit deris.
Sun sos afannos male ripagados
cussos chi nos an butones 'oltados.
De matzu chin fustiga 'ennida s’ora
paret che a cane arrajolidu,
mai che como in vida l’apo idu
podere totu andende in malora.
Su sinu paret chi apat finidu,
si mai 'istadu b’est, como ch'est fora.
Pijamus nos manigas de camija
ponimus los in brajas de cadrija.
Ateras mentes, ateros atores
bi cheren folzas noas in s’arena,
pro una politiga chi nd’ est piena
de malas artes e peus abbufadores.
Comente ido como cussa vena
chi abbat sas tupas de fiores,
gai puzones olan dae nidos
innidos fatos.. dae sos brios noos.
Nessun commento:
Posta un commento