Isetos...

Isetos

Cantas virzinellas a reposu

restan in vida chena esser coglidas,

ite lastima  peldida ‘e gosu

onzi  lassada  in  domo custodidas.

Proite  mai dadas in isposu

si dae totu fini disizadas,

sunu sos bentos  chi oltan  su destinu

de  sas ideas  e su bonu caminu.

A su mantessi modu  sos  isetos

chi  murigan sa conca e  sa mata,

dae  sa prim’ edade  mai  chietos

poi a segus  a su rata rata,

comente s’aba dae sos rubinetos

da’ enas siccas mancu lutia agata,

est su fiore  chi donat su frutu

solu  si zene  'e masciu b’est rutu.

Sun cussas  nues  chi paren  a minetas

chi  s’ orizonte   che cuan a s’ojada,

sun prossimas, nieddas, pigurinas

s’isentana   pro noa semenada,

ma cando  in terra paren sien finidas

si  che ritiran dae sa terra arada.

S’iscuru su massaju  e su laore

finas occano  si siccat su fiore.

De  isetos bonos sun pienas sas tumbas

cando mancat custascia in su pessigu,

no ti deves frimmare si azumbas

pro arrivire a bon’ incunz’ e trigu.

Nudda  a s’indonu b’at si t’arrumbas

folza e disizu  bi cheret de amigu,

bonas ideas cheren contivizadas

e onz’ intandu issas cheren abadas.