Un’ ora
Un’ or’ e basta pro unu disizu
intrende in conca tua un’ iscuta,
a bider ite girat in sa gruta
de sos penseris tuos un aizu.
Cando che falo in sas pelcias de suta
eo mi rendo contu a s’abizu
su chi ti tenet coro in allizu,
inie sa fiducia ch’ est ruta.
Como los bido totu in cunpanzia
chin sas folchiddas e chin sos triutos,
idende los so totu farabutos
ti oltulan cascetas de s’ istanzia.
Dae su calasciu sun apena rutos,
ilfustos dae lagrimas d’infanzia:
amores chena cabu ne eleganzia
chi su destinu a muru at iscutos
Dae sa cascia ‘etza a fac’ a muru
ndì essin a fora totu rimpiantos,
de sas cosas chi nd’asa fatu ‘antos
chi poi t’an fatu su murru duru.
Tue los as leados pro incantos
no pessaias chi fit amore a furu,
finas ballende o cantende puru
ti’ ana leadu sa fide chin ingannos
Oe abaidas su mundu in s’isperaglia
dae domo tua chi nde faghes su nidu,
imbeze nd’ essit solu unu gridu
da cussa ch’est presone canaglia.
Cando dae coro abeltu t’est fuidu
su sentimentu chi nos tenet sa maglia
e chi amore cantamus che mitraglia,
totu ‘e sa vida tua est finidu.
Nessun commento:
Posta un commento