giovedì 31 gennaio 2013

sulcios in cara (scultura lignea di Antonino Ruggeri)


















Sulcios  in cara

Cal’ est  cuss’’ isetu
chi  alu  as in  mente
Femina  chi  de  sulcios  ses piena?
Ti pinghen su progetu
Chi tenes presente
Comente  t’  isculpin sa carena
In su tempus passadu
As  tue sempre chilcadu
Cussu chi  t’ at  batidu dolu e pena
Como frimmad’ in cue
e brota  frunzas noas finas tue.

amigu pretziosu











amigu pretziosu


Amigu chi  m’ ammentas  dies bonas
passadas  paris  in sa pitzinnia,
de cossolu  in sas dies malas
sempre presente bi fis ‘onzi bia.

Sorrisu e paraulas dae  laras
chi m’ an fatu  sentire in cumpanzia,
tue chi faghes palte de sa zente

chi  giamat e narat sempre “presente”.

Tantu est manna, cantu  s' universu
sa 'otza 'e ti bider un’ istante,
ness'  un' iscuta pro poder torrare

impar’ a tie e su tempus chilcare..
Bider  riflessu in d’ unu diamante
cuss’ atimu  chi est andadu persu.

mercoledì 30 gennaio 2013

sempre chin tegus ..













Sempre chin tegus

Un’ iscuadra sola
Mi  tocat su coro
L’ apo sempre amada e sighida
Dae sa prim’ iscola
De issa mi nd’ onoro
Siat  for’ e campu o in sa paltida
Cand’ iscriio evviva
In muros Gigirriva
E finas como intendo sa palpida
No cumprendo comente
Saldos chi  dan su coro a continente.

domenica 27 gennaio 2013

su mar' e su presumu...











su mar’ e su presumu
^^^^^^^^
In su  chi naras forzis b’at rejone
Ma eo creo in sa libeltade
Onzunu  est dign’  e opinione
Chi siat paga o meda calidade
che muntenzo atesu a Salomone
chi pessat d’ aer  sola  veridade
triuladore   et   padron’ e fumu
annegat  in su mar’ e su presumu 

a  bisu meu  in sa poesia
bi cheret  una dote naturale
su chi pessat e no sa calambria
finas  si no at nudd’ e zeniale
mi piaghet però sa fantasia
chi  sabore li dat comente sale
totu leadu chin bona manera
podet  apparrer una cosa vera.

Fat’ a  bona saur’ e piaghere
Sos versos  dan  suz’ e armonia
Frimman su tempus solu un’ istante

Comente faghet sa fotografia
si  pustis  de poesi’ est amante
la cumpridi e nde diventat mere

venerdì 25 gennaio 2013

oj' e rispetu


















Oj’ e rispetu

It’ est chi  cuat  a s’ oju sa vista?
E a su coro, chie lu rendet  duru?
Forzis  caratza  si pessat abbista
Cando  pesat  altu unu muru?
Ma cant’ est mala gai paret trista
Sa vida  chi s’ imbelghet  issa  puru
No dat contu e rejon’ a niune
Passada gai  ligada at una fune.

No b’ at impoltu ne una rejone
Pro  mancar’ onzi die sa veridade
Si  podet  ilbagliar’ opinione

Chen’ istringher nod’ a sa  libeltade
Tant’ est beru  chi s’ omine zeretu
Mirat  sempre    chin oj’ e rispetu.


giovedì 24 gennaio 2013

cuoca, mastru ascia e Literadu (Black - Cambiganu -Masia)







S'istracos sezis de fagher ispola
tra unu grup' e s'ateru, poetas,
provamos a torrare a iscola
donzunu su chi podede lu fetat
chi siat mastr' 'e linn'o de cassola
o litteradu cun sas manos netas...
... pigade una pinn' e unu fogliu
si sezis prontos a bintrar'in rogliu...


Inizio modulo
Lussorio Cambiganu ^^^^^^^^^

Eo mastru ‘e linna o de ascia
Bos fato oe una presentada
De versos bo nde porro una cascia
Pro dare a su mestier’ antada
Intro e bos salud’ a boghe bascia
In umilesa abberzo sa cantada
Pustis su laccu fatto in naschidura
e su baule pro sa sepultura.

Paola Black ---  

Tando mancu deo lu pig'a jogu
su tema mi sebèro de femìna,
affainada in forredd' e fogu
subìtu mi c'apparto in coghina,
in mesa e in bentre fatto logu
pro papare su pische sen'ispina...
...Da chi so coghineri talentosu
sa 'ucca li pien' a su gulosu...

Intrende in discussione onoradu
de istare in mesu peri peri
cun mastruascia e cughineri
fintzas si ischidu e letteradu
cun s’istudiu a tottu sò arrivadu
e iscriende fatto tzoronateri
non mi pontzo perunu problema
in s’ affrontare custu tema..

Lussorio Cambiganu ^^^^^^^^^^^^

Pro cantu dae disizu m’ iseto
Tio cherrer s’omine mezorare
Unu mamentu che mastru gepeto
Mancari in linn’ ozastru cufrommare
Gasie in cust’ otada mi ch’ eto
A fagher su chi mai s’ at a parare
Un’ omine fizu de su bruncone
Chi no ruet mai in tentascione.

Pro cant'ambos siedis cumpetentes
ca dognun' 'e boisateros s'impinnat
su famine no bo che l'ogat sa pinna
ma deo chi bos porto cos' a dentes
e no bos manigades mancu linna
ma su chi cogo deo zeltamente...
...est cosa prelibada pro sa 'uca
ca fatto 'ona fenas una tzuca...

 pro cantu ti movet sa tzucca
cando coghes velenu ti sinna
tue cun tribagliadore de linna
cando leas bottu ti tucca
si deves iscrier t’accucca
cun s’ ischire pagu ti ninna
cà non bi cheret meda professione
a fagher brou e minestrone...

Lussorio Cambiganu ^^^^^^^^^^^^

No si bivet solu de cultura
E mancu sol’ e s’ arte coghidora
Sa linna ch’ est don’ e sa natura
Benit cantada sempr’ a donzi ora
A s’ alimentu d’at sabor’ e calura
A su poeta su taul’ e sa dimora
Et eo chi so d’ issa s’ artigianu
Nde fato onzi pinzu chin sa manu

Mi nades no bi cherede talentu
pro fagher minestron' e brou
epuru s'iscarzu meu e tou
no est chi lu pienas cun su entu
cando chi batis famin'a cumbentu
so deo chi ti lu torro a nou...
... bos afianco de cosas lichitas
no de paperi o linna a fitas...

De aere istudiadu mi banto
iscriende dae manzanu a sera
descrio ierru e primaera
e de istiu e beranu nd’è canto
de su chi dada natura m’impanto
cumpontzende ottadas a trallallera
sa cultura appo alta e non bascia
che cughinera e mastru de ascia..

Lussorio Cambiganu ^^^^^^^^^

Franziscu campas de sa fantasia
Tue Paula faghes arte de sa trudda
Eo no manigo chin sa poesia
Tue paula no m’ imparas nudda
Cultura alet tua cant’ e sa mia
Fin’ eo frio sos ooss chin chebudda
Bois imbeze chin punza e su malteddu
Podides solu pistare su chelveddu

Biad'a Ziscu ch' est istudiadu
bonu Rinu chi frabicat mobìle
ma no mi cherzo chin bois jambadu
ca sa mia est s'arte prus nobìle
cogo bene tott'e so premiadu
connoschen su sabore e s'istìle...
...e si no bos dao deo sustentu
mancu pinna e ascia 'izis tentu...

Cughinera chi m’at ingozzadu
mastru ascia m’inserrada a morte
abbaidade itè mala sa sorte
mortu cà troppu ingrassadu
solu deo bo’sappo aggiuadu
cà cun s’iscrittu mi sento pius forte
e cando sue subra bos’ada a giamare
s’iscrittu meu bos’at’ ammentare..

Lussorio Cambiganu ^^^^^^^^^

Cantu istas a nues pessende
Eo peso domos e palafitas
E Paula ch’ istat isperiende
Su fumu chi si segat a fitas
In sa coghina chi tot’ est brujende
Afumigat su casu e sas peritas
Sol’ eo poto a bois cunfoltare
Dendebos torra domo ‘ue pasare.

Sena papare nad' ite faghides
cando chi bos curpit sa debilesa
e a bentre boida pianghides
cue bi cherzo deo ch'in lestresa
aparitzo sa banca e l'idides
chi dogna grascia pienat sa mesa...
...Ma si no bos satzo de bombòis
so deo su chi ch' interrat a bois...

Mastru de linna chi faghet listellu
cando intras a chito in buttega
cun pialla raspa e motosega
ndè pesat su peus burdellu
cughineri cun trudda e mestellu
lassademi custa mala reffrega
cà non b’at perunu paragone
tra s’ ischire ,s’asciutza e “macarrone” ...

Lussorio Cambiganu ^^^^^^^^^

S’ iscritu no at pius interessu
De manigu s’ agatat in abbundu
Cando su mastr’ e ascia s’ est arressu
Restadu for’ e domo ch’ est su mundu
Est custu su mesteri de suzessu
E totu a mie mi chilcan in tundu
De sa literadura e sa coghina
Restadu b’at de braja sa chejina

Eppuru mai no apo intesu
de omines chi produint famidos
c' a su papare dana zustu pesu
s'alimentu los muntenet ischidos,
sos lanzos cun s' oss' a sa pedde presu
lassant sos piatos biancos innidos...
...Sas forzas achistant che Sansones
ca papana cantu duos leones...

In lastra de marmaru biancu
bella frase m’invento e b’iscrio
mi giro cuntentu e nd’è rio
cando mi giro a s’atteru fiancu
cà linnaiolu mortu e istancu
e a cughineri dedica l’imbio
si cherides essere in tumba ammentados
rispettade in vida sos litterados...

Lussorio Cambiganu ^^^^^^^^^

Bos l’apo nadu a sa presentada
De primu letu pustis de naschida
Como ammento torr’ a sa serrada
De s’ abbitu pront’ a sa dipartida
Fin’ istasero l’amus acumpanzada
Sa mente prim’ e s’ or’ e sa drommida
Semus totu cuntentos e cabales
Pro poesia, manigu e manc’ e males.

Paola Black

Tand' eo puru tanco sa forredda
in custa gala bell' e zeniale
neune de su famine b' ispeddat
si bos appo ambos a cumensales,
chirramos un'anzone de sa ghedda
donzunu bi ponzat punzu 'e sale...
...no lu papamos in pagh'e amore,
salud' ambos, grazias de s'onore...

Si sò istadu unu pagu invadente
pedo venia a sos poetadores
a tottu sos virtuales ispettadores
chi an sighidu tema presente
a tottu canta s’attera tzente
lis naro de abberrere de busciacca cordones
cà bi lis propontzo e bi lis ripetto
ana letzidu chenza pagare biglietto

Fine modulo