venerdì 15 luglio 2011

OLIA


Olia…

Dae unu zippu in mesu a unu roccalzu
b’at brotadu frunzas de ozastru,
teneras sun e lebias che nastru
dende signale ‘onu  naschidolzu.
Omine sabiu chin manos de mastru
l’at bidu in die frita de giannalzu,
chin d’unu  falzoneddu de atalzu
at seberadu  sas menzus dae su crastu.
De cussa tupa prima arrasolada
b’at como cambas noas a s’ojada.

Sa pius teneredda e nebida
est a manca ‘e trunzu  a sa forana,
già mi la ido cando  pianta sana
at a parrer de totu pius dechida.
Tando l’apo a dare ismuzzurrada
pedende poi iscuja  pro ferida,
chi  nezessitat  in cuss’ ilfelchida
a segus de piantu olia dada.
Totu  sa zente poi meravizada
at a narrer : “Deus ti beneigada”.

Cando  su caldu enit in s’istiu
tottu b’acurren a sas umbras tuas,
de cussas fozas  chi tue no cuas
donan recreu e friscu che a riu.
Si eo ti pedo sa linna tue annuas
e mi la donas impare chin su chiu,
mancu cando t’ofendo as astiu
e sempre a su bisonzu tue m’ajuas.
Tue olia donosa  ammuntonada
su menzus ‘ozu  mi das de sa leada.


Nessun commento:

Posta un commento