mutos...isperaglias Vitzichesas

Isperaglias Vitzichesas (mutos)

Numen de padre Luca
l’an cambiat in Solle
in sos saltos de Bitti

In sos saltos de Bitti
ancora si b’ incolle
sos versos de Juanluca
comente est fitti.

L’an cambiat in Solle
che sos passos de rucca
chi mai si nd’ essiti
e niune l’imbolle.

Numen de padre Luca
Isse tando l’ischitti
los an postos in molle
sos versos dae ‘ucca.

Ballos de s’Annossiada
pro incantare a tie
a passu ‘e una danza

A passu de una danza
leadu coro a mie
a sa prim’ aparada
frigura e s’eleganza

Pro incantare a tie
ballos a sa torrada
sa manu mi l’aganza
e mi solvo che nie

Ballos de s’Annossiada
si faghene inie
pro gosu e isperanza
pustis de s’incuntrada.

Oghes de Mialinu
Si cantan a tenores
e nde ogan sos sinnos

E nde ogan sos sinnos
lontanu e vicinu
mannos e minores
fatendesi sos zinnos

Si cantan a tenores
sonos chi paren ninnos
tessende s’oro finu
de prejos e amores

Oghes de Mialinu
tancan serras e minnos
odios e dolores
che ogan dae sinu.

Su situ romanzesu
Est de monumentu
Che a Giorgio Asproni

Che a Giorgio Asproni
su regnu sardu at presu
tottu s’Italia tentu
eccomo nos remoni

est de monumentu
Meraculu ispesu
a chie su cor’ imboni
Madonna e Sagramentu

Su situ romanzesu
pro passizeri atentu
lu leat a s’indoni
bellesa a coro presu

Sos  disizos de coro
Benin  a s’ improvisu
Cando no ti l’isetas
Sos disizos de coro
No dan mai s’ avisu
finas abbas chietas
Lean  su log’ issoro
Benin a s’ improvisu
Finas abbas chietas
Lean su log’ issoro
Ne dana mai s’ avisu
Cando no ti l’isetas
No dana mai s’ avisu
Lean su log’ issoro
Finas abbas chietas

Unu bellu saludu
A bois cantadores
Chi m’azis azetadu
Unu bellu saludu
E bos nde rend’unores

apenas so’ intradu
In custu grup’ e judu
A bois cantadores
In custu grup’ e judu
apenas so’ ntradu
E bos nde rend’ unores
Ca m’azis azetadu
In custu grup’ e judu
E bos nde rend’ unores
Apenas so’ intradu