divescios

Divescios

Su mundu naran est che una serra

bi semus intro, no b’at ateru mediu,

sa meighina est peus de su remediu

cando pessamus de salvare sa terra.

Su chi presentan comente un impediu

lu lean sempre pro sa cuntierra,

mai chin paghe e sempre pro sa gherra

sas ziviltades las ponen in assediu.

Tontos che napa e ilvassellados,

naschidos male,fatos e lassados.

Su chi apo  imparadu  e connotu

dae s’istoria e in vida mia,

chi s’omine ispesso a chilvia

curret cuntra a cosas ch’at a notu.

cando sas rundines in chelu idia

in beranu enzende a fiotu,

a bidda pro muntennere su votu

fatende nidos  pro sa noa cria.

Como invece  taculas nieddas

onz’ istajone inie sun a cheddas.

Aite in natura e  istirpe mia

at semper duas  caras sa medaglia?:

una  de oro paret fat’ a maglia

s’atera  inveze  che la ogat de ria.

Medas sa vida lean a trancamaglia

ateros  bene chilcan bia – ia,

eo no sempre sigo custa  bia

ma mancu custu mundu fat’ a raglia.

Folzis  d’onzi cosa in  movimentu

cambiat  ‘essu a segundu su ‘entu.