lunedì 22 dicembre 2014

Bona Pasc’ e Nadale .. AUGURIOS.











Bona Pasc’ e Nadale .. AUGURIOS.

A chie bido innoghe.. o non m’ abbizo
Uras  impare a istrinta ‘e manu
A chie  connoschet s’ errore umanu,
a isse  prim’ e totu cuntivizo
presumu, imbidia, astiu l’ assimizo
a chie Nadale passat invanu,
sos dolos  de su bonu   cristianu
carigno..  e che seda  los ispizo

ninnio .. penseris  de bonu prou
pro totu sos in bida  binchidores

ma prima cussos  semper  cumbatentes
chi  s’iden  fitianos perdentes

pro totu  naro   siat in congruos
Bona Pasc’ e Nadale .. AUGURIOS.



domenica 21 dicembre 2014

sa peltusita

















Sa peltusita

Sa mendula, sa nughe ‘e sa pabassa
Sa capa chin colores de  tragea
Lievitu pro dulches in sa massa
Posta a misciu  farina a purea
Oos friscos in mesu si acadassan
Accolla  chi peltusita si creat
Sos annos si che passan chin sa festa

Ma issa sempre a Nadale restat

mercoledì 17 dicembre 2014

puntu 'e vista

















puntu 'e vista

Est su puntu ‘e vista
Chi est de aconzare
Cando s’ idet male donzi cosa
Chie est arrivista
Si devet frimmare
Prima chi pè che ponzat in sa losa
Chie non li bastat mai
Sighit in arguai
Semper in pensamentu e mai reposat
Forzis pro la gosare
Sa vida bisonzat de la mirare.

a Mauru Puddori artista













a Mauru Puddori artista

Cussu raju ‘e lughe d’ oriente
T’ illuminat sa ment’ e su coro
Sos montes canos dae Lul’ a Nugoro
Los bides de s’ ispotzu risplendente
Lassa perder… e ponemi mente
Totu in vida est malu o tesoro
Peleas e paraulas issoro
Sun comunas bessidas de sa zente
Canta e pinghe de sa fantasia
De s’ omine virtude ‘e mancamentu
Nudda perfetu c’at in custa terra
Pecados, viscios e botza ‘e gherra
Picasso, Leopardi no sunt chentu
Ma totu amus sinn’ e galania.

a Brunu Agus

















a Brunu Agus


De palcu, fitzu e babbu
Nd’ as fatu sa dimora
Inue curren abbas cristallinas
Sos versos chen’ agabbu
Bi samunas donz’ ora
Cogliende de virtudes sas istrinas
Totu pones in cantu
Umilesa t’ est bantu
E rendes donzi ratu chena ispinas
Ti siat bona sa die
Comente benidore gai siet

sos deghe cumandamentos















Sos deghe cumandamentos

Sos pecados mortales
isculpidos a fogu
coglidos  in sa pedra dae Mosè
deghe  sunt virtuales
pro ateros  b’ at logu
francu in cussideru de su re
coment’ onzi fastitzu
b’ at fizastru e fitzu
su chi balet pro te no est pro me
fuende dae s’ Egitu
dae Sinai fin’ innoghe che l’ at gitu.

narat chi  a sa sola
unigu  Criadore
su beru  Deus in chelu, terra e mare
pro  s’ omine s’ iscola
‘ue fuit dae  s’ errore
invanu mai est de numenare
sa di’ e su Segnore
sas festas in onore
ammenta  prima de santificare
si non coglis su frutu
morit sa die passad’ in corrutu

no est d’ ismentigare
su babbu e sa mama
pro cantu dadu t’at  carena e mente
sempre de l’onorare
su mamentu ti giamat
su samben in sas venas currente
non  chilches su difetu
dae donos’ afetu
e  cantu podes dare eternamente
duos pro unu solu
t’ ant dadu vida, isper’ e cossolu

non fatas s’ atrivida
mancu de lu pessare
chi potas  ater’ omine bochire
su bene de sa vida
non si podet furare
sa prima cosa in naschida de ischire
si in cussu male rues
bides solu sas nues
in vida tua chi  faghes fuire
a sa mantessi sorte
ligadu ses in sa vid’ e sa morte

ama su ch’ est d’ amare
sa femina isposa
onora  cantu in fide promissa
zenia de pesare
restat  frisca che rosa
solu   cando  ti dedicas a issa
donzi alciad’ e conca
che ‘essis in birronca
e pones gherra tra pasu e rissa
uniga  sa regnante
muzere in coro e mente est s’ amante

non si podet furare
cantu  as in disizu
si nudda faghes pro  nd’ aer diritu
chena lu comporare
de dimoniu fizu
ti gighet a s’ ilferru dritu-dritu
de sa cosa furada
non s’ at mai gosada
non ses  mere de domo, ma in afitu
chie non l’ at cumpresu
finit  chin manos e chin mente presu

faul’ e testimonzu
contr’ a sa veridade
no ischit cantu podet fagher male
pro malu o pro bisonzu
cambiat sa calidade
ma semper cufundet  su chie e su cale
donzi  paraula nada
est una cantonada
s’ est falza ruet in conca che sessale
pro fagher cosa giusta
nara comente manigas e bustas

sa femina isposa
o puru fidanzada
est  una lugh’e  chelu che isteddu
chin ateru reposat
non cheret  pelcossada
no istes fat’ e issa che cateddu
de  mente faghe s’ usu
e non fates abusu
de debiles’ e coro o de chelveddu
chin su penseri netu
s’ abberin  aidos de su rispetu

in finis sos disizos
su totu ‘e rispetare
francu  d’ aer pro se, sa cos’ anzena
comente sos imbizos
ti faghen  marronare
nudda  ti poden dare a sa carena
si cheres biver bene
isperia su chi tenes
no istes apitende che sa iena
pro su menzus  istare
cossizo pius de  dare… che leare.

venerdì 5 dicembre 2014

abba serena










Abba serena

Sos lampos e sas lughes de s’ aera
Abberin  tempos e logos mezores
Sas  dies d’ abba  mudan sos colores
In terra  groga de sicagna bera
Si pesat  che sa neula  de s’ispera
De chie sempr’ at connotu dolores
Impare a sos disizos et errores
Resessit  a manera d’ esser  fiera

Passende  die chin die, onz’ istajone
Puzones emigrantes che sa zente
Su mundu  gai si movet  a sa sola

Totu  comente  s’ usu si che colat
Chi siat  in presse o puru lentamente
Che  finit che paraulas de sermone.



lunedì 17 novembre 2014

bisonzu umanu











Bisonzu umanu

Cando   pesat  in chelu che astore
 E lassat  alas a  botzas de  bentu
Sos versos  tesset  in  or’ e arghentu
Miscende  in armonia  donzi sentore
At esser  de  sa vida  odiu o amore
O d’ animu  su tristu  o su cuntentu
Tempesta   d’ amargura o sentimentu
Chi iscapat  dae  fungutu de su core  

Su sole  ch’ intrat a primu manzanu
Si  mudat  in colores  de  sa  domo
Luego, a s’ abbeltura  ‘e su balcone

Si  fuit su ch’ in sa note fit bijone.
Gai  s’ ammentat  chi deris che como
Su  versu  est  beru bisonzu umanu.


lunedì 27 ottobre 2014

faedda in sardu















faedda in sardu

comente s' abba carpit sa roca
gai intrat su sonu in sas orijas
abba suberat de sa terra pijas
sa limba intro 'e su coro zocat
cando non la faeddas non la tocas
sa cara 'e sa terra 'ue t'ispijas
fiore at esser de colcorija
chi non dat frutu e morit che  fioca.

venerdì 24 ottobre 2014

bon' anghelu














Bon’ anghelu


Proite nois  a bias Deus chilcamus
Cando a fac’ a nois est presente
Forzis de Isse nos ilmentigamus
Cando totu est bellu e risplendente
In coro lu tenimus si  l’ amamus
Bastat de lu render evidente
Dae sos ojos e dae su bisu
S’ idet d’ isse mirada e su sorrisu

Isse si mustrat in car’ e sa zente
Non tenet una fromma corporale
De padre Pio at pedidu sa mente
Nendeli ite fit bene et pustis male
Santu Franziscu l’ at giut’ a dischente
Ispozu l’at de su materiale
Ambos an fatu ‘e poberu s’ inchinu
Però a Deus an apidu ighinu

Fatende  pagu ‘e mente a su Segnore
Cando su mundu  pariat divinu
Si como torrat sa vist’ e minore
Finas su Ninnieddu  est vicinu
Presepiu chin lanedda et amore
 daian su sabore bucantinu
Como totu sos oros de sa terra
S’ impitan pro vanesiu o fagher gherra

Est beru chi como sa vid’ est dura
Gulpa de s’ uman’ avididade
Cando pessat de crescher fura –fura
E no fatende cont’ e abilidade
Sa cheja sol’ a Deus at in cura
Ma no est isse in sa realidade
Deus in terra est intro ’e sa zente
Parende  orijas  est elocuente

Naran  omine est dulch’ e ranchidu
A bias  tristu e pustis cuntentu
S’ est bonu, narant  tontu c’est naschidu
de abbistu nde  faghen su  monumentu 
ma forzis alu  nudda est peldidu
Si Deus gighet a su coro tentu
No est  s’esser de cheja fervente
ma d' ‘ider cussa lugh’ isplendente.

Non b’at de pelder  tempus in s’ isetu
De l’ider cando  s’ est recuende
Mancari in su balcone dirimpetu
Chi  paret, siat  isperiende
torr’ a narrer c’ abbitat in su petus
A faca de su musculu pompende
In sambene lu faghet navigare
de corpus chi l’ ischit  ospitare

pro cantu  si non si  fit  riveladu
Aite fit naschida sa terra?
Solu pro fagher paghe e pustis gherra
E lassare su mundu triuladu?
Gai tot’ in miseria fit restadu
su male  solu  inie totu  inserrat
Ma ischende de sa fide rivelada
Onz’ olta dae miseria s’ est pesada

 De onzi male nde faghimus rughe
E l’ ilfelchimus sempre fitianu
cando s’ iscuru che leat sa lughe
 damus gulpa poveru cristianu
disizos malos atesu nos jughen
de’ nos dare un’ istrinta ‘e manu
sempre  binchet sa forz’ e s’ egoismu
de  podère, avidu e narzisismu.

Populos sun de onzi continente
Sa cara, tratu ’ e s’ espressione
de unu Babbu solu de sa zente
chi pregat in divescia religione
sun modos de passadu e presente
chin dan una divescia opinione
ma totu isperian su chelu in pizu
chilchende d’ ider de Deus su fizu

De totu su chi legio o c’ ap’ iscritu
Nudda agiunghet a cuss’ evanzelu
Totu paret jaru, totu dritu
Pro arrivire a gianna ‘e chelu
No ti fatas dimandas ne cuntritu
A faca b’ est presente  bon’ anghelu
Cussu chi tantu nos paret assente
E puru  nos faghet de assistente.



mercoledì 8 ottobre 2014

triulende










triulende

Tot’ unu imbrogliu nos cheren passare
Comente meighina  pro sa crisi
Naran ch’ est tusciu imbetze est tisi
A gai  sighin  issos a festare
Inue ses bistadu.. inue fisi
Cando  su mundu as bidu derutare
nende chi lu cherias aconzare
e como de totu t'  impadronisi

a totu dias cherrer  sulenare
gioghende in sa rod' e sa foltuna
naras chi das su chelu e sa luna
bastat d' ischire tempus isetare
Cantu menzus  diat  sa cos' andare
Cogliende  disizadas  una-una
pro como  non si nd' at bidu  mancuna
de  totu su  c' as fatu ilgarrigare.


martedì 7 ottobre 2014

gherrera













gherrera

de cantu sorte bos at remonidu 
restades madrighe d' umanidade
sa vida in sinnu 'e dignidade
donades chin curagiu infinidu
omines de podere presumidu
bos naran de sol' una veridade
gai bos lean conca e libeltade
nende chi solu deus cheret timidu

mercoledì 1 ottobre 2014

in morte de su poeta Austinu Nieddu













in morte de Austinu Nieddu

Cando in terra morit su poeta
Si liberat unu prammu ‘e logu
In chelu si b’ atzendet sa cometa
Alluta e isplendente che fogu
Austinu as giumpadu sa meta
Comente siat unu bellu giogu
Paula fitza dicios’ e amada
Sighi sa poesia c’ as eretada


martedì 30 settembre 2014

piore cuadu














Piore cuadu

Semus  in d’ unu  mundu iscontriadu
E puru   d’ esser  primos nos creimus
De  totu  faeddamus  e  riimus
Pessende   d’ aer  su chel’ eretadu
Sos males  de sos ateros bidimus
de nostros non bi restat siddadu
Gai  comente sempre s’ est  nadu:
“piore chi non s’ idet, non pulimus”



in atunzu













in atunzu

Sa manu chi si tancat in  punzu
Muntenet sos rajos  de s’ istiu
S’ ammentu    si muntentenet biu
In dies chi  minorigan  s’ atunzu
Comente  abba  ch’ iscasciat su riu
Atapat  a sas rocas  a raunzu
Fatende  de su logu  un’ abbunzu
De  ludu e  tempus chi non b’ est pius.

sabato 27 settembre 2014

s' abboju a su Meraculu













S’ abboju a su Meraculu.

Partida fin’ ocanno est in bonora
Sa menzus gioventura patadesa
A chirru 'e Biti e Nostra Segnora
Pro votu a su Meraculu l’ est resa
Banderas e cadderis Iss’ adoran
Donende d’ umiltade sa richesa
Garrigos andan de pan’ e amore
Pienos torran de grascia in core.