Pasca 'e Nadale

pro pasca ‘e Nadale 

Ocanno su Nadale in Casteddu

eo lu passo impare a sos custrintos,

sos cuzolos de domo sunu pintos

de pinzos chi m’ammentan su Piseddu.

S’amenu pessamentu ch’ est a chintos

de filos de lanedda e oltijeddu,

est pienu su logu che furreddu

pro iscaldire  bios et istintos.

Amus a cogher  finas s’anzoneddu

b’an a restare sos piatos bene lintos,

eppoi pische de ‘ozu onu intintos

acumpanzadu dae inu nieddu.

Apo a pessare a cussos chi sun bintos

dae sa mala sorte e in su faeddu,

no nd’ana neghe,  e custu rueddu

si lis illighet, no los lasset avvintos!!

Ma su penseri altu e pius grasciosu

l’apo a riservare a Gesù Cristu,

chi in die ‘e festa abbrazat su pius tristu

isventuradu ,omine a mancu ‘e gosu.

Tott’ apo a giaru e mi so abbistu

chi coro ponet conca a reposu,

si peldet pro s’ateru su ‘elosu

e benes suos ponet in caistu.

Pregadoria pro s’Immaculada,

pro animas chi paran in sos chelos,

finas pro cussas ch’ ana pagos zelos

Misericoldia las at peldonada.

Passadu annu de bonos imbelos

bos mando augurios de Die amorada,

de su Nadale apedas ammentada

che bona die ‘eneita dae sos chelos.