tempus fuende

Tempos chi fuin

Aue curres tempus castigadu?

Aite leas totu custa presse?

No bides chi sa lana ‘ona intesse

bene,  solu si est de bonu cardadu.

Lassalos currer cussos a s’imbesse,

no an cumpresu nudda  chi siddadu

In tempos d’oe est cambiadu,

si pasat in su coro ‘e chie s’arresse.

Idu los apo  sos fagher  de manizu

sempre parian s’aere gioghende,

parian chi su mundu fin betende

a subra ‘e palas dae babu a su fizu.

Oe lu bido chi est franculende

fatu sos bicos no instat mancu rizu,

at dadu totu anima e lizu,

nudda li restat  in  tempus andende.

Alet sa pena de ponner fatu a tie?

Chi pedis  pius de cantu ti dana,

ses chei  su pirone in sa campana

pius atapas  e pius sighis asie.

Ses chei s’aba frisch’ e funtana

aue curren  feminas rie rie

pro ispijare sa belles’ inie,

che ruen intro  de una tambullana.

Tempus ti frimmo como  a ti mirare

ca cras est taldu  pro mi nde godire,

mancari chilches de bi la sighire

eo  mi nd’ atato  de custu rimare.

Isco chi tue t’as  a indispettire

e chilcas de mi fagher  cambiare,

ma t’aproendo finas a bulluzare

ti nde pieno  sa conca e su sentire.