S’ anade fea
Naschidu che incantu d’ aurora
in sue Ales as postu primos passos,
ma de Sardigna as connotu sos zassos
ei sos lamentos nd’ as coglidu otora.
In Ghilarza as bidu chi sos rassos
de sorte ‘ona e bona dimora,
no che a tie, chi pares dae fora
malu che peste chi faghet fragassos.
Cando, però, sa conca in su pessare
pesat ‘olu che abila rejna,
faghes de s’ingiustiscia una chejina
fuida dae sa braja in su sulare.
Tue chin ‘oza e chin sa mente fina
pones a conca a s’istudiare,
brillas che lughe chi paret brujare
sa mala sorte ch’ as apidu a istrina.
Dae Casteddu brincadu a Torino
leas connotu de vida e de diritu,
sa soziedade est solu apitu
a sas ideas tuas, che oro fino.
Tue ti pesas che agos de eritu,
finzas si semper eo no bi cumbino,
in sas ideas mias m’ incamino,
zeltas cunvinziones ponent fritu.
Ma de a tie su c’ apo in sa mente
est cuss’idea de sa libeltade,
“onore a Isse, sa conca abasciade !!”
amus innanti esempiu balente.
Chi’ est sa pessona, a mie nade,
chi pro ideas suas e atera zente
lassat totu in terra pro niente
ei sa morte leat in veridade?
Su sinnu tou olat in su mundu,
in terra anzena est ‘e bon’ aficu
solu innoghe no at passificu,
est ancora assente e vagabundu.
Non b’at peus de unu cherveddu sicu
chi peldet sa memoria dae profundu,
dende isetu a su machine in tundu,
destinu e isperas sunt totu apicu.
Nessun commento:
Posta un commento