de gioventura..e sabia bellesa

..de gioventura e sabia bellesa

Un’ omin’ ezu, ap’ idu a manu tenta

chin criadura ischid’ e ispibiglia,

su sabiu teniat sa briglia,

minore de dimandas lu trummenta.

Che in su pannu ilde, cussa biglia

lorumat, semper una si nd’ inventa,

como crabistu lu tirat e l’allenta

in armonia, che sonu  ‘e ischiglia.

Chin  aisetu  de bona pessone

a un’ isteddu isse  li pedia:

“ est menzus una conca sabia,

oburu coro modde che anzone?”

L’ at preguntadu proite lu cheria

ischire,  si pro casu o leiscione,

cando l’annuat,  cominzat sermone

et  isse chin incantu  iscultaia.

“tue mi pedis cosas tropu  notas,

ca si ti giras a tempus passadu

in lughes de su chelu isteddadu

sun  torradas  a bia cussas lotas.

De sa dimanda chi tue m’ asa nadu

meda nd’ ap’ idu  de cruas e  cotas,

zeltos  pessan de fagher a rebotas

pro de mannale leare unu ladu.

Atere restat chin poveru concale,

impare a ungias e tuddas  de sirbone,

no est bonu ,a fagher no si pone

ambu  che ludu, paret chena sale.

De impoltu est chi sa cosa s’atone

chi siet frimma, sa mente sia tale

ei su coro che criadura uguale

potan istare impare a cumone.”

Allalgo ojada a su firmamentu,

paret  sinfonia  a son’ e cannas,

totu istedas minores e mannas

in armonia, nebidu pessamentu:

“Proite  de pessone sas intragnas

pius fungutas, pienas de trummentu

nd’essint a fora ispintas dae entu

e punghent  a bisera che sas sagnas?

De gioventura e sabia bellesa,

su mundu nd’ at bisonzu cada die,

sa vanidade e imbidia sia presa,

disamistade si solvat che a nie.

Como che sun in fundu a caminera

palas a mie, cara a ruj’aera;

s’ omine mannu li ponet manu in palas

che puzoneddu, li carignat sas alas.