ORIOLOS

Oriolos ..

Cando  si cheret toccare su chelu

s’omine a bias faghet olu mannu,

chena cussiderare a cale dannu

curret  cussu brincu de anghelu.

Proadu b’at,  in memorias d’annu

Icaru ‘e Creta ispintu dae s’anelu

de poder superare chin su zelu

sos  deos de s’ Olimpu,  in s’ iscrannu.

A sighire de Pindar’ autore

sos bolos  chi in mente  ancora ios,

de sinnu e de cabu sun atios,

in versos  ‘e in bucca ‘e cantadore.

Ma sun che sa frommija in mes’ e rios,

che in su film a mode  un attore,

lean sa fua  chena su condutore

peldendesi  che in  semena sos chios.

Meda  an fatu in s’arte militare

cucurumeddos   s’umana tzenia,

ca  pro s’unore issoro no tenia

de contu  su bonu amministrare.

Su ch’ an  dezisu  in issos  mania

sas  terras totu de poder leare,

eppoi  chin filuferru tancare

sa  libeltade  in trista litania.

De oriol' e  mente topigosa

bi nd’at  meda in s’umanu cunsessu,

abias  a dannu, ateras su revessu

atin  a fora noa meravitzosa.

De Galileu b’at apidu prozessu

pro teoria falza e  imboligosa,

chi nachi a sa terra  onzi cosa

in s’universu  fit in cussu ‘essu.

Napoleone, Cesaru e CarluMannu

sos liberos , s’istoria an pienadu,

no b’at dubbios si l’ana meritadu

finas si meda  fatos sun in dannu.

Dae su penseri grecu   an leadu

S’arte de guvernare chen’ ingannu:

Socrate, Plato  e poi  a un’ ispannu

De Aristotile   e Pericle,  s’ Istadu.

Ateros sun sos bolos  chena crismu

chi solu male lassan in  ammentos:

Hitler, Istalin  in annos noighentos

chin sos paltidos a coa  chin su ..ismu.

Calecunu  in custos ultimos tempos

salvat  s’onore e su sou carismu,

De Gasperi ,  de cheja in catechismu

nd’ at proadu sos laicos esempios

Unu chi proat in tempus de affanos

de ponner  sa miseria e sa virtude,

in versos  chi a sa conca l’iscude

devet prima samunare sos pannos.

Ma  cando s’oriolu  pius rude

mi torrat  che in cussos  menzus annos

leo sa pinna  chen’ abaidare a dannos

e torro a bider che in gioventude.