domenica 26 giugno 2011

In tribides













In tribides

Comente est istadu cust’ inventu
de  pinzu  tundu , forte e generosu,
in fogu passat vida sempre in posu
subra sas brajas e chena lamentu.
Idea ‘ ona ‘e fagher  zeniosu
at’ apidu in su bisonz’ atentu,
pro coghere impare a s’ alimentu
s’anima tua, ‘e ruinzu a reposu.
Si podet  fagher finzas chin tres pedras,
o puru una furrazza  a fossu leas.

Tribide tue proite nd’ as  tres
de ancas  ferrosas e pienas?
Podian esser  ateras   pius medas
inveze impitas solu cussos pes.
forzis pro te isgarrigan sas penas
a modu chi de issas tue nde ries,
a cussu modu tue colas sas dies
fatende ‘e mediu chi sien pius lenas .
Pro vida istentiosa tue t’allenas
sambene faghes currer in sas venas.

Abbaido menzus, mi paret s’alenu
chi sulat  como ch’ est a reposu,
dae meda faghet jogu o puru in posu
labiolu subra  d' urgogliu pienu.
At  un’aspetu fieru e vanitosu
e' su coro pasadu chin serenu,
su fagher  paret a modu sinzeru
est chin totu cumpridu e calurosu,
paraula nde bogat  animosu
sempre chin totu si parat  donosu.

In tribides bi ponet sos males
Intro ‘e ramanedda sas virtudes,
a bias currispunden a sas rughes
e a sas tribulias paren tales.
Si fato piscadura tue tenes
folza ‘e concale chei sos mannales,
sos peuncos  fatos  a ’ istrales
chin almurata impare atin benes,
asolu  ‘e s’ololche si nde tenes
etabi meda, sun chei s’abba a renes.

No fatas manc' etare fumuderra
intre' o  mesu s' est manna sa perra,
e sa chebudda pius mann' e intrea
b’ istat  bene , sa mata ti recrea,
si no ti bastat, agiunghe laldu russu
finzas s’ingrassas, su male siat cussu.
Cando nde piscas totu in ajonedda
poddine ilfunde in brou ‘e ramanedda,
impare a binu folte e nieddu
passat totu e annuat su chelveddu.

Ammentadi  d’ettare sale a punzu,
de cussu russu li dat pius vigore.
Est comente a tie, cando s’amore
at fatu in sa vida bon’ incunzu.
Cantos ammentos mi dana calore
idende a tie cobelta  de ruinzu
no ti lu tocco, ca guasto su pinzu,
si  c’ogo  a isse restat su malore.
E tando bi mantenzo su colore
chi est de  tempus,isse  su valore.














Nessun commento:

Posta un commento