OZASTRA

Ozastra

De cussa meravitza ‘e natura

chi apo iscritu pro sa idda mia,

chelzo riprender  un’ atera ‘ia

pro illustrare piantas de  altura.

Deris impare a zente andaia

a montes de Arzana  e de pastura,

in die ‘ona e de sana gosura

in camin’ e ozastra mi ponia.

Logos famados , a mie pagu notos

m’an fatu  respirare de bellesa,

chi finas sos chi sufrin de etzesa

parian  tundos chei s’ “O” de giotos.

A su manzanu chito at fatu presa

s’istazione  de trenos fat’ a botos,

de linna antiga e ammentos remotos

a sa frimmada si faghet s’ispesa. 

Cando sa cumpanzia incaminada

s’est de Gennargentu in s’intragna,

ap’ idu meravitza ‘e muntagna

chi coro m’at abeltu a s’ojada.

Su lagu e su riu che a sagna

segat  roccas  in cussa passada,

lassende ispantu in tota sa leada

 adornende in cornice sa campagna.

Brincos de abba, pischinas e calancos

s’arrancan a sas pedras  granitosas,

fatende isculturas  grandiosas

chi solu in natura bi nd’ at frantos.

Cando pigadu so’ a cussas seddas

idu no m’apo  cussa pedra a bancos

“Perda Liana”  chi gighen a ispantos

mi paret de sas cosas pius beddas.

Mancada m’est paraul’ un’ istante

cando  apo idu dainnanti a mie,

antigu logu  de fritu e de nie

“sas ruinas”de idda Cristus ante.

Nuragica  fortesa  ancora inie

chin ruderes de idda benestante,

pro valore mannu che diamante

lamento me, ca prima no l’ischie.

Dae cussa sedda  subra ‘e Gennargentu

ap’idu  logos chi mancu raffaello,

impare  a s’iscultore Donatello

an fatu in arte  che operas  su ‘entu.

Poi s’armidda, unu ratu nd’ istello

pro nd’aer  de cussu nuscu s’ammentu,

de menta unu matule apo tentu

ateras elvas  m’apo  cuadu..hello!!

Niberos b’at a perdida de vista

impare a tassos, ulumos e nanzola,

ma sa foresta paret fata sola

d’elighes mannos,  faghet una pista.

Sermentu de natura b’est totu

no isco pius comente decantare,

pro cantu eo chilche’e l’agatare

frimmo innoghe  su ch’apo connotu.

Poi ‘e tantu  gosu peregrinare

nos ana gitu a coile de notu,

de Arzana pastores  e regotu

nos an  donadu in su manigare.

Grascias a totu  amigos de Ozastra

apedas sa foltuna  sempre a mastra.