paradisu...la Sardegna

Su paradisu

Ite bos poto ancora contare
chi potat dare  lughe a su sorrisu,
de medas cosas ja lead’ a risu
no apo ‘oza  de ispamentare
Fio pessende  si su paradisu
podet a sa terra assimizare,
cando  in sa culcoldia at a torrare
sa zente, ei s’amore dat accisu.
No pesso chi si potat agatare
nudda de menzus  de su ch’ est  innoghe,
peruna nov’ arcana e ne boghe
nos gighet a lu poder   pessare .
Comente  s’armonia chin sa ‘oghe
musicat  melodias in su cantare,
eo a tie natura  in s’adorare
iscrio  lestru, comente chi bi gioghe.


Tue mi moves bonos sentimentos
allumas sas carazas  tentajolas,
totu su malandrinu tue che olas
cando faghes impitu ‘e friscos  bentos.
Torras sempre in cussas menzus oras
a nos atire a conca sos ammentos,
cussos chi  nos muntenen  manutentos
cando  sa vid’ e bellu nos coloras.
Cantu disizo a tegus simizare
chi ti rinnovas a d’onz’ istajone,
no mi  das mai una bona cajone
pro no ti dever  in coro  tancare.
Cando  manzanu iscampio balcone
t’ido  sos elementos  cumbinare:
colores, abba, terra  tot’ impare
postos parides  a sa perfescione.
Eh..si.. Omine mannu  est istadu
in bon' intentu de fagher cosa digna,
in assimizu ‘e Deus  la disigna
impare a issa 'e totu su criadu.
Su paradisu ido in sa Sardigna
finas si calchi cosa at isbagliadu,
sa  folza ‘e s’ unidade at mancadu:
cuntierras  tra nois, alu la signa.


Oh!! zente de Sardigna ispainada
dae 'onzi bicu de su continente
,nademi bois si a sa tucada
de che torrare gighiazis in mente?
Pustis de tempus bos l'azis pessada:
"su mundu est galanu similmente?"
O puru custa pedra in mes' e mare
sighides intr' e coro  at amare?