su tratu 'e s'anima

Su tratu ‘e s’anima

Cando coglio paraulas de su ‘entu
e las isterro in dulche poesia,
no iscriet sa conca ma sa mia
anima lebia, chi apo a coro tentu.
Sunu mamentos chi no b’at maja
che curro chin sa mente a Gennargentu,
no isco in cale modu ne s’ammentu,
fat’ istat chi cue subra mi peldia.
M’ aparin sos calancos chi Larentu
nde faghet arte chin sa fotografia,
ischit leare dae sa mente mia
comente sos segretos de aposentu.

Impare cussos verbos de altura
cosimus in d’una beste ‘e pannu,
sas bellas cosas chi dae occannu
amus a fagher chin massima cura.
A totu las donamus chen’ ingannu
a sola moda de giusta gosura,
impare a tzente de bon’ hermosura
intramus pro cumbattere s’affannu.
Diai fatas a bona saura
sas ideas no faghen mai dannu,
comente sempre in die de cabuannu
auguramus bona congiuntura.

Bellos amigos apo connotu aberu
in custa balla ‘e iscatula setzida,
ido chi tzente meda c’at sedida
de poesia , chi mi leat a seru.
M’ammento chi sa prima ch’ap’ estida
fit in piantos de ojos pro interu,
ma ite bella!! e lu naro sintzeru
est sa perla pius prejada essida.
Dae cando in sa conca pro imperu
apo chilcadu ‘e biver chida-chida,
sa vana gloria siscura l’apo ochida
in su ritratu e m’abaido su veru.

Ido s’astore chi olat pasende
alas a chelu paren a mancu ‘e pesu,
poi che raju a punta fica istesu
s’imbelghet che su ‘entu sulende.
Gai s’animu meu ben’ intesu
in paghe e in disizos pasculende,
a bias in fatu ‘e s’ ae ch’ est bolende
si puntat serpe e la leat a pesu.


Est de s’animu ‘onu in cuntrapesu
cando dimonios male sun fatende,
isse in difesa ‘e giustu ch’ est falende,
pro su sulenu o nessi pro su mesu.
Forzis una tzitade so chilchende
chi no esistit si no in coro ‘e Jesù
ma mi cossolo de su chi apo apresu
chi bene est bene e isse so cantende.