LIMBA…

Limba

Limba, no ses limba ilmentigada
finas  si meda ti  sunt  olvidende,
no ischint cant' e ite sunt peldende
in gangas ti mi ses  apoderada.
Dae manzanu a sero, eo pessende
si in sa gruta ti che ses cuada,
cantu  est nudda s’ ater' imparada
mi rendo contu a tempus passende.

Cando faeddo chin sa limba istranza,
isco e pesso sempre a bisu tou,
de ateras no nd’ isco  fagher tzou:
de itala, inglesa o de Frantza.
Lassamulas bìstare a bonu sou
chissa-ghi finas issa s' iscanzat,
sunt  che  musica in fora 'e  danza,
bona mancari.. ma guastat su brou.

Limba ses limba, si tue ses amada
lead' in bratzos e  in coa  totue,
mai  una duda, nemmancu una nue
in caminu de vida atraessada.
Innoghe, in continente fue-fue
t’apo  chilcadu che sienda bramada,
e como  in  edade  ch’ est andada
ti gito  'ue  s’amore b’est in cue.

Limba chi sonas  una campanella
das  armonia  chi leat su coro,
no perdas mai sa ‘oza d’esser bella
muntene altu  de tene su decoro.
De  virtudes restas sa virzinella
alu ses pura,  simile chei  s’oro,
tue no ses in fatu a niune
de sa campana ses pirone e fune.
.
Cando t' intendo ispalt’ in sa leada
mi paret d’iscultare   unu tenore,
boghes  ladinas de cussa cantada
de sa Barbagia  chi leant su core.
Su cantu in re e sa faeddada
colorit et t'adornat  che  fiore,
su sardu faeddadu  dae sa zente
in  donzi zassu  'e custu continente.

Sa poesia  pesada in Logudoro.
Sos cantos  betzos  in alta Caddura
Sos contos de  totu su Campidanu

Issos  de sa Sardigna sunt tesoro
Sunt  de vida  sabiesa e criadura
Sunt cussos chi nos  pedint sa manu.

De cant’ est bella, tantu mi nd’ unoro
ca mi faghet intender impoltante,
sa faeddad’ in limb’ e Logudoro
faghet tribulare fin’ a Dante.
Isse impar’ atere, cuss’ issoro
limbazu nos imponet custante,
annos chi nd’ at passadu setighentos
alu sardu s’ intendet in sos bentos.

Sa limba sarda est neolatina
ma forzis alu meda pius antiga,
no isco si est dama o rejna
de zeltu no ch’ essit fora ’e riga.
De faeddada est trunz’ e raighina
de sa cultura sa menzus amiga,
no at perun' istonu ne  difetu
comente sutammissu dialetu