DESTINU

destinu

Oh !! sardu, omine de onore

no apas  ateru pessamentu,

ide innanti  a faca de s’ammentu

de meravizas  e finas de  s’errore.

No apas pius ater’ iscalmentu

de cussos chi t’afligini su  core,

cando de su destinu tue atore

pelmitis  chi lu olet su entu.

Lea in manu tua  frastimada

su chi natura a tie at donadu,

impare chin s’ antigu siddadu

de una limba de verbos famada.

De su chi naran o chi ana nadu

subr’ e  atie  sempr’ olvidada,

paraula  falza  pro interessu nada

niune mai sinzeru  est istadu.

De antigos  sos populos bennidos

an pessadu solu de t’ isfrutare,

cando in seculos de dominare

nos an tratadu sempre che bandidos.

Nudda cufromma  su poder istare

in ziviltades  de sardidade innidos,

si  menzus forzas dae iddas partidos

aian  potidu  innoghe torrare.

Unu destinu ch’ amus solt’ in piantu

dae sempre leadu  chena briu,

Forza populu sardu!!, si sei biu

faghe cosas aberu, no pro vantu.

Si pessas chi in un annu, sol’ istiu

alfat pena de  fagher agguantu,

no as isperanzia , peldes totu cantu

torras  a tempos  de mal’ agadiu.

Ischidadi  populu, no istes mudu

nudda  de nostru pius che sun lassende,

a su mundu globale sun gitende

su pannu ‘e dignidade como est nudu.

Dae manzanu a sero intendende

a padre luca impare chin Limbudu,

pro los difender apo leadu iscudu

e giamo sos poetas  suplichende

Totos impare los bido pianghende:

a Araolla, Mannu  e  Murenu,

chin  Paulicu, Pesuciu  e Mereu,

Remundu  Piras in palcu cantende.

Baingiu Pes,  divesciu dae su meu

unu limbazu chin Lobina iscriende

totu chepare  mi sun meravizende

su cantu sardu lu leo pro intreu.

Cal’ est  chi sas musas d’Elicona

an  untu menzus limba  in armonia,

si no cussa naschida in terra mia

chi sonos e poesia nos dona.

Etando frades  aite l’aborria

sa sorre nostra, sia bella che bona,

nisciuna ziviltade nos  perdona

si palas  nostras a issa giraia.

Como  su bonu proe a  vida ‘ostra

abelzende su coro  a limba nostra