sas lagrimas abban su coro...e siccan sas intragnas

“Sas lagrimas abban su coro

e siccan sas intragnas”       

                                                      

‘Alu gito in ojos e in su coro                  

Una ijone bella e chin decoro                                 

chi tue m’ as sighidu a raforzare              

paritzas siguresas de abbare                                

                                                          

cherzo gigher abba a s’ onore               

e a sa dignidade ‘e su dolore,                

de cussu chi pessamus solu male                     

chi abias est de sa vida trigu e sale.          

E si l’ idimus dae su essu ‘onu               

fina Babbu Mannu dat perdonu,                           

dae s’orgogliu malu abia leados

bi pessat isse a nois malefadados.

Tue anghelu de numen e de fadu             

ses forte chei sas rocas de Cugadu,            

meda forte, chi pares prepotente                                                   

e rendes su dolore cummovente;               

leas su coro de chie est presente              

a totu leas logu in sa mente,                    

no lassas trimbu ‘e triste piedade               

tue ses solu vida e dignidade;                  

tue ses in sa note cuss’ istella                  

chi rendet s’aurora pius bella,                   

chi giunghende sa note chin sa die

dat a totu ispera e paghe a mie.