Cando bellesa…
it’ est chi nos faghet ispantare
in donzi die chi naschet e chi morit?
Folzis s’ aurora impare a su chi frorit
su manzaneddu a sole iscampiare.
Cando sos pes alcio pro andare
inue su disizu mi favorit,
sa die de bellesa mi colorit
e montes poto a bolu iscalare.
Estetica est unu sentimentu
chi no si podet a giogu leare,
in vida est beru b’at de imparare,
ma bellu devet essere s ‘ammentu.
Su zelu no si podet ispijare
in abbas chi no an sun coro tentu,
lassendebi de imagine isgumentu
perunu nudda de poder toccare.
Cando in coro pasat sa bellesa
a nudda alen sos inforcadores,
chi chilcan de ispalgher dolores
‘ue sa vanidade leat presa.
Cando a boltas chin megus ti doles,
eo no bi ruo in sa trapula tesa
est fadiga peldida s’impresa
de apizigare inue tue no bi roes.
Est fazile de mata godimentu
sos lichitedos chi propones tue,
no est chi como lee e cras rue
pro poder dare a tie cumprimentu.
Etando naro a tie restache cue,
lassami in pasu chena pensamentu,
isco chi como gosu, poi trummentu
est bentu ‘e piaghere chi che fue.
Eo sa bellesa la ido in totue:
in ojos de pizinnu sufferente
chi dat su ch’at in cambiu niente,
ma coro gighet lezeru che a nue.
Ateru est cussu mal’ avilente
chi leat bellesa che ambesue,
no ti nd’ abizas cando ses tue
leadu dae cuss’ ascia perdente.
Nessun commento:
Posta un commento