A sa puzone murina solitaria
Dae maistru e innanti sun sos bentos
chi moven paris a sa travuntana,
su ponentinu enit a s’incuntrada
e tot’ impare si moven atentos.
Ite det esser sa rimpatriada
de fizos de natura in sos ammentos,
chi moven como totu manutentos
e lean totu nois a s’ispessada?
Totu de sa natura elementos
nos naran “ ‘ue azis sa falada?”
Mancu ischides chie l’at nada
de sa tiria in poesia e versos.
In su Vesuviu che l’at collocada
Giagheddu de sos pispinzos tentos ,
at de s’umana ispeme sentimentos
inie s’isperanzia fustigada.
Cantu “s’umana sorte progressiva”
est de vanidade carrulante,
Isse “Leopardi” che unu zigante
narat de sa tiria ch’ est passiva.
Abaidat su mundu topigante
issa est forte in ecuilibriu viva,
no cheret chi sa difesa atriva
de s’omine chin su pesser’ errante.
Eo de Tie so massimu cultore
no poto intrare in meritos fundados,
dae una conca chi los at generados
chi dat finas a s’aba su colore.
Però cussos disizos no amados
chi t’an med’ impedradu su core,
t’an leadu su frutu dae s’arbore
e solu in poesia sun restados.
Dae su campanile, pufurinu
abaidas solituariu sa vida,
d’eranu e gioventura l’ as olvida
trapassendela male poverinu.
Su pastore e sa luna tue l’as bida
in cantigu as postu meda sinu,
ma de s’amore nd’ as malu destinu
Silvia tue l’as in coro e mai l’as bida.
Nessun commento:
Posta un commento