sa taschita

Sa taschita

Una taschita m’apo a comporare
a su mamentu solu in simpatia;
la cherzo aere presente e chi bi sia,
cando bisonzos si potan presentare.
Bi cherzo ponner impare a una labia
paritzas cosas de poder impitare,
pintzoso bonos pro poder regulare
sos pessamento chi m’agato imbia.

Unu nde leo e basta a bia ‘ia,
ca poden dare a medas fastitzu
e tando trato totu che unu lizu
fatende ‘e modu chi b’istet ebia.
Pro poder bidere menzus dae pitzu
abaido totu chin malinconia,
ispero solu s’ ammentu chi bi sia
e chi s’onore siat ancora ritzu.

Leo s’aneddu c’apo in coro meu
pro fide eterna c’amus impignadu
“ti cherzo ‘ene”, ca eo t’apo nadu’,
pro dare a tie unu bonu recreu.
Su male chi pro te no est passadu
e fintzas si no la pasas chin Deu,
as tue a torrare a modu meu
a creer in su gosu disitzadu.

Ite est custa mutria niedda?
faghel’ olare chei su pessamentu,
faghel’andare impare chin su entu
e torra sa carena che pisedda.
Como chi a iscrier so intentu,
nde ogo pro a tie ramanedda,
girende duos vessos che aminedda,
pro dare anima e coro e a tie caentu.

Mi paret chi sa chitza est cambiada,
chi potas fagher cosas disitzadas,
no lees tratas a como già passadas,
comintza totu ‘e nou in s’imbiada.

no ponzas fatu a ideas balzanas,
maniga solu su chi in tasca b’ada,
assigura chi siat bene imbucada
e tando torran bonas aparadas.

Che ponzo torra totu in sa taschita,
fatende ‘e mediu de cumponner bene
s’istelzu impare a su chi tue tene
meravitza e incantu e sa perita.
Dae custos sentimentos tue bi chene,
manzanu faghe ‘e totu no cuntrita,
sos canes a su male tue allita,
e tzene nostru faghimus crescher bene.