S’ojada…
Naran chi de s’anima est s’ispiju
su ch’ essit a fora dae s’ojada ,
in d' una conca atacad’ a su tuju
luzicat in pessona foltunada.
Si sos colores tenden a su buju
mischina est de vida iscossolada,
cando chin sa mirada est diretta
a sa dimanda, in risposta l’ isetta.
Si fuit issa e no istat chieta
s’idet chi no at pasu perunu,
de dassare arrejunu at preta
ca faulas e birgonza sun tot’ unu.
Cando cheret mustrare mineta
istrighet ojos , no bidet a niunu,
imbeze si li lughet su coro
finas sa vista brillat chei s’oro.
Natale E Ornella Tamponi ##
RispondiEliminaS'ogru no est semper un'indovinu
e no podet s'anima cumpidare
ma si portas cherbeddu po pensare
abbaida prus bene su camminu.
Est Deus su c'at dadu su destinu
de pòdere cun s'ogru osservare.
Si portas mente san'e ogru 'onu
est ca Deus t'at dadu cussu donu.
S'abbaidat de s'ogru sa mirada
ma no cumprennes 'itt' at piaghere,
dae s'ogru ischire meda cheres
ma s'idea tua est irballiada.
Si pro sorte l'asa indovinada
cheret narrer ch'in sa ment'as podere.
E si Deus cussu donu t'at dadu
cheret narrer chi ses già fortunadu. #
Lussorio Cambiganu
Natale..no so frate indovinu
Ma s’ojada la gitto sempr’ abelta
No apo nudda in megus de divinu
Ma mancu a carazza una cobelta
S’ ojada t’apo nadu che-i su inu
Ti faghet render sa cuscesci’ abelta
Inie nudda si podet cuare
Ruen mascheras de carrasegare…
Paola Black ---
Beh, piseddos, s'ogru no est su meu
e potto cun reson'intrar'in rogliu,
ambos no faddides in custu fogliu,
donzun' at fatt' 'e rima bon'impreu.
Tampone s'est invocadu a Deu,
Lussurzu narat chi no b'at imbrogliu...
...ca no cuat s' anima in s'ograda
mancari ch'issa siat mascarada...
Natale E Ornella Tamponi ##
M' aggradas ca su 'in' as fentomadu
e como ti merìttas su cumbidu,
ma veridade manc' in tazz' app' idu
ne in s'ogru limpiu o carazzadu.
App' a esser deo s'irfortunadu
chi porto s'ogru puntu a ispìdu,
ch' ammiro un'ograda goi bella
ma no b'agatto s'anima gemella. #
Lussorio Cambiganu
Duos cantores dignos in favella
Ap’ incuntrad’ in custa caminada
No isco cal’ otad’ est pius bella
Gaddura o de Lei o Patada
Zertu Paula est sa reginella
Ca nos fulminat totu a s’ojada
It’ at a esser cando l’ap’ a bider
Custa de poesia ch’ est sa leader