cando iscrio...

Cando iscrio…

A bias sas paraulas currende

intran in conca chena las pedire,

ateras  mancu s’isto isconchizende

resesso  a ponner  fatu  in su sighire.

Est beru..  che cando arrejonende

s’ annuit  sempre  pro prestus  finire,

si  sa pessona   nudda at  ite narrer

menzus ch’ agatet ater’ ite fagher.

Cando iscrio..in su menzus aberrer

si pesat ‘entu  chi mi  dat  ispintu,

no isco  mai ‘ue  ch’ ap’ a ferrer

ne   cal’ ijone ap’ a fagher dipintu.

Totu paraulas chi chilco ben’ e tenner

oltan in tundu e intran in rechintu,

poi las cumpro  ponzendelas in riga

onzun’ e issas  mi nde  fat’ amiga.