lunedì 1 agosto 2011

su firmamentu


firmamentu

Ite est chi b’at cando morit  die?
Sos astros  de su chelu lean lughe ,
sos cucos  ogan  bicu  fue – fue,
zovanos danzan a su rie – rie.
Eo  a taldu sero  abaido cue
chilchende  su chi ch’ est for’ a mie,
no mi dimando  comente ne chie
ma  si caminu mi gighete  aue?.

Poi   a pispinzu prima ‘e mi colcare
chilco  sa vida  de ponner  in bon’ usu,
dendel’ impoltu  e  abaidende in susu,
mi ponzo  firmamentu  abbaidare.
Sa luna risulana faghet fusu
chin marte paret  cherrer  figurare,
de totu faghet pro l’isperiare
dae  s’universu et eo dae unu peltusu.

Galassias  s’apoderan  in su chelu
fatende  frommas chi mancu  pintore
ispintu  dae s’arte e dae s’amore
resessit  a  las ponner in su telu.
Venus chin Pluto,  bi ponet ardore
pro dimustrare  de bellesa  su zelu,
ateros pianetas  ponen velu
in mesu  ‘e issos  pro ‘elos’  ischidore. 

Sadurru,  Giove  impare chin Uranu
sunu sos mundos  ch’aparin pius mannos,
chie chin  aneddos  o ateros ingannos
iden isteddos  comente  fog’ in manu
No isco si ancora pagos annos
poden  sa terra  iscultare pianu,
eo los bido dae sero a manzanu
chi los semus ponzende in affannos.

Cando a manzanu  los bido  recuende
totu mi dan  unu bonu saludu,
chie  pro  sa foltuna dat ajudu
e chie  sa bellesa s’est mirende.
Mart’  est chin s’ispada e s’iscudu
No pasat mai, ca est  sempre  gherrende
sa luna chi como si ch’ est cuende
abbaido a totu e m’ abbarro mudu




Nessun commento:

Posta un commento