domenica 14 agosto 2011

sette pandelas...


Sette pandelas

Bos tio cherrer  cantare una cantone
chi potat su coro allegrare,
chi che  tiat ogare su magone
chena cherrer su mundu cambiare.
Peleas  chi che sunu a muntone
si poden  tot’ a palas betare,
bastat de prestare atenzione
pro un’ iscuta, ca bos  cont’  un’  ijone.

B’aiat  sette   pandelas  a bentu
chi  adornaian   su mont’ e Gonare,
onz’ una  su  colore a  inventu,
no ischio a cale poder mirare.
Mi dimandio  aite cust’ apentu,
si no ch’at  nudda de poder  gosare,
a unu tratu  un’ e issas in allentu
m’at  cunvintu  de istare  pius atentu

Difatis mi che so aculziadu
pro li pedire aite fit trista,
no aiat pro nudda isventuladu
mancu  una tancada e pibirista.
A cussu puntu eo l’apo nadu:
“ti fato  goi male, eo turista?
A  segus  sa  postura at cambiadu
e  giogos chin su ‘entu at cumbinadu.

Proite?  Naramilu,  li dimando,
como as ripresu  a ’ttapare  s’aera,
eppuru  pagu tempus  a tando
 parias attitadora in disispera.
Narami  como, comente e cando
si podet mudare  in ispera,
su chi prim’ in malora eo ispando
eppoi  su sorrisu a totu mando.

“Abaida comente sun sas cosas”
Mi narat su vessillu  in mes’ issos,
tottu las gito a fiancu  pasadas
sas pandelas chi  rapresentan bisos.
Issas  impitan sas paraulas nadas
pro  mi fagher mancare sos disizos,
tue sinduncas  apena las as bidas
ap’ idu chi de issas no ti fidas .

Onz’ una  ‘e issas no peldet ocajone
de chilcar’ e leare su cherveddu,
chena mancu  pessare a sa cajone
naran  a tottu  “tue ses minoreddu”.
A mie ana fatu sermone
nendemi chi  pario unu malteddu,
isventulo  divescia  e no a cumone
e no azetan ater’ opinione.

Cal’ est de su contu sa morale?
Malefadadu chie  cuntra si ponet
a  un’ idea  de forza  generale,
ca sa comunidade  s’indisponet.
Nende chi  su chi faghet est male
 su  rispetu  in terra li reponet,
a bisu meu  a isojad’ e istrale
cheret leada s’idea tropu cabale. 

Este de pagos  virtude  ladina
de poder semenare trigu nou,
‘ue no  b’at  dolore ne ispina
no  connoschet  de atere su sou.
Ideas  divescias  pienan sa chentina
de inos  fatos  chin ‘ua de zou,
omine chi gighet dritta s’ischina
no  mudat  s’idea  in mischina.
  



Nessun commento:

Posta un commento