AUSTU

Austu.

Arrivadu puntuale ses'austu
mese de sole e de vacanzias,
sos turistas longas distanzias
faghene pro las godire cun gustu.

Chie in mare cuddu o custu
chie a sa muntagna importanzias
li dada, godindesi sa bundanzias,
pitorescas mancari su trambustu;

s'intendet in so lidos isolanos
limbas istranzas cale babilonia
cun emigrados de logo lontanos,

poi tanta fadiga a domo insoro 
rientrana in sa festosa cerimonia
a fuire de nou pianghinde in coro.

PEPPE PINTORE

Totu acudin impare a custu grupu
Pro lis passare su sidis de Sardigna
De custa terra chi est su menzus putu
Chi nos isfriscat su coro a carapigna
Mai perunu intr’ e inie ch’ est rutu
Ca sa cuscescia e sa vida nos signa
Leade in libeltade custu gustu
E passadebos unu bon’ Austu.

LUSSORIO CAMBIGANU

Sinzeramente prefferzo s'izzerru.... ;)

Eppuru no semmus mai cuntentos
de su tempus chi Deus at mannadu...
Si disizzat su sole canno proet
ma si su entu nue no ne moet,
pregammos chi torret chel'annuadu
a nos cazzare sidur' e turmentos...

... Gai si che passant sas istajiones
po tribagliantes e po mandrones...

Paola black

Su tribagliante e no pro su mandrone

Est de impoltu su tempus  benzende

Ca pro su primu  tribali bi l’impone

Ma su segundu  lu idet passende

Pestantu  chi  nde oghet su tupone

S’ampulla  atere si sun bufende

Onzi  istajone  l’amus a disizu

Ma su mandrone  lu gighene a dizu

Lussorio Cambiganu

Intant'ambos duos si ne lamentant
ca donzi tempus li paret tirannu,
a su mandrone paret dannu mannu
chi cun s'abba sa tazza li pienant,
eppuru si cheret in bin' infustu...
A su tribagliant'invez' in austu 
li falat suore pius bunnante
si tiat cherrer in mare bagnante
ma li cumbenit a s'alanzar' 'ustu...

...Ne s'un' e ne s'atteru godint vida:
fortuna, narant, est zeg'o drommida...

PAOLA BLACK

Fortuna est de chie in coro  pasadu

No isperiat mai su piatu ‘e su ighinu

Austu, ijerru  o Deus chi l’at dadu

Buafat siat abba che su ‘inu

Mai a tempus malu frastimadu

E leat  lamentosu pro mischinu

In donzi casu no b’at paragone

Tra bonu tribagliante o imbreagone

Lussorio Cambiganu

ussurz' eo no fatto paragone
anzis los ponz'in mattessi pianu,
ca mi abbizzo ch'ambos fittianu
sonan sa battarall' 'e mammuttone...
No fatto zertu part' a su mandrone,
ne tribagliant' appo cundennadu
solu c'appo innogh'iscumbattadu
ch'ambos portant arreschid'un'uccone...
.... Tottu po narrer chi su tempus bonu
a bortas podet fagher malu sonu...

PAOLA BLACK

sos tempos sun malos  sos passados

in disaogu, lastima  e pispinzu

no b’intrat nudda  si frittu o suerados

si est madrigadu o laghinzu

ma de sos duos ch’ amus faeddados

unu no coglit linna a su foghinzu

etando si  unu non nde chirrias

s’ateru tribagliat  pro duas bias

Lussorio Cambiganu

Tue forzis galu no m'as cumpresu
o forzis no mi so cumpresa deo 
partes no ne dao e no ne leo
ma mi piaghet a bistar'in mesu...
Ca narant ch'in mesu b'istat su zustu
e podet esser po cummodidade, 
ma est debiles' 'e s'umanidade
sa lamentel' in frearz'o austu...
...E ti rinnovo grazias innoghe
c'as azzunt'a sa mia atter' oghe...

PAOLA BLACK

Sa oghe tua de bona cumpanzia

Mi dat sulenu  in d’onz’ istajone

Pienat sa nella de armonia

Et eo chilco  solu chestione

Cando  incrocias sa tua chin sa mia

Semus in tempos de bon’ unione

Etando ti ringrascio  Pauledda

Ma  no isco si ses beru niedda

Lussorio Cambiganu