mercoledì 10 agosto 2011

Poesia in "erva"


Poesia in  erva

Meda nde ido de bella poesia
In donzi limba e donzi faeddu,
abias la cunfronto chin sa mia
fatendemi dimandas a tambeddu.
A b’est una rejone chi bi sia:
“proite  tue  nd’essis dae cherveddu?,
b’at  motivu  in su particulare
oburu  est  cunsessu generale?”

No est fazil’ e imbucare su canale
de una risposta  chi faghet faeddare
filosofos  dae tempos chissà cale,
chi naran  menzus  prosa de rimare.
Ateros  como,  in tempus atuale
naran  de  poesia  pro liberare
s’animu dae  su  vanu e dae su male;
cuntra sos chi la lean a ripica
nende chi  issa est erva sicca. 

Chie pagu  'e sintasse  isprica
cumprendet  chi  dae  versos  sicos
nd’ essin  penseris  de una mente rica,
chi  ‘ogat  festa  ‘ona  dae ficos.
Rendet   totu in paraula  amica:
sos pensamentos  in penseris friscos,
faghet narrer   a donzi bon’ umanu:
“Est su ch’apo pessadu eo invanu”

Sa menzus poesia mai nada
est cussa chi nos restat in su coro
chi mai l’amus nois declamada,
niune nos da fama  ne decoro.
Abias mi paret  de l’ider cantada
dae atere  e tando  eo l’adoro,
sa poesia est su ch’apo nadu:
su chi poeta iscriet,  ch’est  cuadu!!

Nessun commento:

Posta un commento