sa note de santu Larentu

Sa note de Santu Larentu

In not’ e oe de Santu Larentu

su deghe de austu  fin’ ocanno,

idimus  lughes  lestras che a bentu

chi da’ u’ enin ancora mi dimando.

Passadu mesanote pius atentu

un’ ojada  mirada che lis mando,

chelzo  avereguare  si est diai

comente naran : disizos e guai.

Sa prima ch’ ido est un’ ischintidda

ch’ aparit  fuende che coete,

falat lestra aculziend’ a bidda

che pische ch’ est fuidu dae sa rete.

Poi l’ido  in sas giura de Osidda

comente cando mai mi l’isete

morit inie  apena poi  naschida

‘ue si falat  bi brotat una vida.

Difatis prima de si cossumire

ojos apo tancadu pro un’ iscuta,

e in su mentre  su meu  pedire

at fatu prima ch’ issa si ch’est ruta.

Apo pessadu  de poder ischire

si   terra  est subra o es t suta,

chi  nos  dat  alimentu  e briu

“inue sa foza  nd’ essit dae su chiu?”

De custa cundiscione  sa natura

nde faghet  regula prezisa.

no l’interessat  de ponner pastura

‘ue  mala pianta b’est assisa.

Su ramine  si faghet cobeltura

de terra chena  idea prezisa,

‘ue  s’ omine  seminat su ‘entu

coglit  tempesta  e in coro trummentu.

Semene ‘onu d’at  bonu frutu

cando  in terrinu ‘onu est piantadu,

comente criadura  ‘e late sutu

fin’ isse leat su ch’at imparadu.

Ma si pro casu in pelcia ch’ est rutu

abias  resessit  pius  de semenadu,

dipendet  dae sa sorte o sa fortuna

si naschid’ est in mala o bona luna.