giovedì 11 agosto 2011

FESTAS DE MATA


Festas de mata….

A duru duru  ballan in sas festas
de ‘onzi  idda e donz’ ighinadu,
chissà si  meda  d’issos an pessadu
chi  pro  disizu  ‘e  corpus  sun fatas.
Pagos sun cussos  chi an rinunziadu
a istralleras e pienare matas,
mancu  a simizu nd’ an  de preigare
a su santu  chi deven festeggiare.

Ite bisonzu b’at de disturbare
sos beados e  pios  chin reposu,
dae su chelu  istan  leende gosu
no an bisonzu  de su nostru  ballare.
Issos  no naran  chi est fastizosu,
ma mancu los devimus imbrogliare,
semus devotos solu in su pedire
e  in su dare tio cherrer ischire!!

Etando pro avitare de iscanire
sa  bona  fide  e finas s’intelletu,
namus sa veridade dae petu:
sa festa est solu pro diveltire.
Si no b’at pro sos santos su rispetu
est  solu pro a nois  cumpaltire
sa grascia de su corpus  e sa  ‘ula
de festa santa b’est solu sa faula. 

Nessun commento:

Posta un commento