Ojos de prata
Ojos de prata mi sun isperiende
it’ est chi mi cheren dimustrare,
no b’at nudda in su chi so pessende
chi potat a issos rigualdare.
Mi fissan chi mi paren trafigende
sa carre, inie paren chelfan intrare,
de cuss’ ojada frimma in coro meu
apo disizu iscrier totu intreu.
No chelzo mentovare in anneu
su fagher de nois depidores,
ma su chi si leat a impreu
pro che ogare tristur’ e dolores.
Comente in sos renes s’ozu seu
lis dat vigore ma finas sas rejones,
de tropu pesu grave corporale
chi faghet in su tempus meda male.
Ojos De prata sun chei s’istrale
paren acutados in su molle,
intran totue che su maestrale
e si pasana intr’ e una grolle.
Unu caligh ‘e oro chena male
inue libertade est in folle,
totu b’accurrin pro s’alimentare
de poesia pro poder cantare.
Intr’ e inie chena mancu pessare
s’aunit sentidu chi sa mente,
pro poder poi menzus musicare
sos versos siat fritos che caente.
Misciados in su variu rimare
nd’ essit a fora isteddu lughente,
allumat s’aera tota canta
allegra sa natura si nd’ ispanta.
Ojos de prata su coro m’ammanta
de telos tessidos a fil’ e oro ,
chin d’un’ orizu e broccad’ in aggianta
mi d’at su bellu et eo mi nd’onoro.
Comente cando tocco s’abbasanta
s’animu e sos melmos mi ristoro,
ebbai ojos de prata isperiende,
narat : “abaida como a mie fatende” .
A unu tratu la ido ballende
in lebiesa chi paret una fotza,
tantu lezera , a terra no tocchende
sunu sos pes che una nae ispozta.
Faghet giros ebai lorumende
mi leat a giogu e bennit sa otza,
de ponner fatu che istella luminosa
a issa in sa danz’ armoniosa.
Ojos de prata incantat onzi cosa
In sos disegnos chi faghet in aera,
dat colore che dulche mariposa
e totu su chi tocat s’avvera.
Che a s’essida ‘e cheja un’ isposa
allegra miran ,a bider s’ est vera,
ojos de prata chena perun’ isetu
mi narat: “beni innoghe chin afetu”.
Cando m’aculzio in brazos a su letu
che la deponzo chin grascia e dilighesa,
aite tue como a dispetu
tancas sos ojos e finis in bellesa?
Unu destinu culzu fat’ eretu
t’at leadu a tie onzi pretesa,
a mie un’ ijone m’at donadu
e in s’ iscuta unu valzer balladu.
Ojos de prata a s’iscuja m’at nadu
“mamentos bellos cheren custodidos,
chi siat un istante ch’ as amadu
finas si bonos frutos no coglidos.
Meda est sa grascia chi m’as dadu
in cust’ istante de bonos sentidos
no b’at nudda de pius importante
de aere pro un’ iscuta a tie amante.”
Como in fide t’assiguro zelante:
ojos de prata no as a morrer mai,
ca su coro e sa mente che aliante
mi curren in olvidu de guai.
Tue m’ ispinghes a che eo cante
in donzi logu e mamentu est gai,
ojos de prata ses s’ispiru meu
no ti pot’ impitar’ a mal’ ispreu.
