a su primu ispuntare de sa die (P.Luca) .. cummentu Paola b. Lussorio C.

A su prim’ ispuntare de su die.. P:L: Cubeddu   (cummentu Black – Cambiganu)

Paola Black

No b'at de tempus prigas
chi pottant miminare
cussa ch'in tegus bido de bellura; 
nemmancu chentu brigas
lu podent annuare
su briu ch'as in totta sa fegura;
talentu naturale
e don' orizinale,
mi nd'attit che de frina sa frescura...
...chin ogros e ograda
c' a tie solu miro, prend' amada...

Lussorio Cambiganu

 Biadu ch’ as in coro
A sa tua ograda
Ca solu issu rezit sa friscura
Cussu tou tesoro
Sa tua prend’ amada
Ti siat de gosu e de mente cura
Gai apas saludu
semper su male mudu
bivas mundos galanos d’ermosura
‘ue frorit s’amore
Brincan caddos alados dae su core.

Paola Black

Cando Cupido jamat
respondere li teves,
in tantas frizzas ch'at una nd'iscocat;
e cand'a tie bramat
in d'un'istante breve
para su pettus c'a tie lu tocat
cussu cor' aparadu,
nd'abarras ispantadu
anzis guasi ses tue chi l'invocas...
..."beni, mir' a innoghe:
so deo chi ti 'etto custa 'oghe"...

Lussorio Cambiganu 

Cussa oghe ladina
Chi t’ istampat su coro
Cumpanza a manzanu e su sero
Su notte, tue mischina
In sonnios de oro
Ti pasas nessi tando, eo ispero
No drommisi o puru
E pensas a s’ iscuru
De ballare chin isse trallallero
Est unu mund’ a parte
Chi no connoschet sas gherras de Marte.

Paola Black ‎---

Ti naro chi a Marte
lu connoschent imbeze
et anzis in amor'est menzus gherra;
e ti nde ponz'a parte
chi su jogu lis rezet
cando lis segat cor'in duas perras;
ma dopo su judiziu
lis firmat s'armistiziu
torrand' umpare dae cuntierra...
...gai sunt amorados: 
prima brigant, posc' 'e mel' apagados...