colores antigos

Colores   antigos

S’ ispiru chi mi dan  custos colores

est  su mantessi ch’ idio a minore,

fatu   sos montes e cussos masones

cobeltos  a restuju  de laore.

Iscultende  sos contos de pessones

poberas si,  ma riccas de amore,

m’ ammajaio  a cussu faeddare

paraulas   chi parian  pintare.

Totu coglian  de su tempus nou

sas novas,  sos isetos de s’annada,

no lassaian nudda a bonu sou

onzi paraula fit bene nada.

A mesudie una padedd’ e brou

pariat   grascia ’e chelu falada,

a sero   tot’  in tundu a su foghile

chin d’ un’ iscampiad’ a s’antarile.

Sos bezzos in contos de gherra

de gioventura  brujada in s’ilferru,

feridas  chi mai pius  si  serran

ligadas  a  ispinosu   filuferru.

Sas feminas  chi pulian in terra

coloridas  e fortes che su ferru.

naraian :  “finimi custa  lana,

sempre solitos  sonos de campana”

Pustis  a prima de mi che colcare

andaio a fagher su bisonzu,

foras de domo  a isaerare

su sero chi si faghiat taldonzu.

S’ intendiat su cucu cantare

e cando su tempus no fit isconzu,

istellas contaio una a una

eppoi saludaio sa luna-