sa morte.. a sa naschida e a sa vida

Sa morte.. a sa naschida e a sa vida

Cando su tempus giompet a finire
No b’at de si fagher mannu meda
Su chi b’ est pustis tio cherrer ischire
Inutile est chi a bois lu peda
Mi restat su peldonu de pedire
Prima chi ‘onzi folza poi zeda
Est su congruu de dolu ‘e gosu
Giustiscia est pro totu e riposu

Sa parte est de sa sorre morte
Chi totu paren cherrer timire
Unica, zelta est in custa corte
Amiga chi no ischit traighire
Giusta pro totu et uguale sorte
Pro poveros chi cheren irrichire
Sos ricos chi che gighen a s’ interru
Timen su fogarone de s’ ilferru

Amore ses sa naschid’ e sa vida
tue de vida imbeze su pintore
eo ambos bos pijo in dispeldida
fatendebos unu mannu favore
bos pedo si nd’ azis apid’ ischida
de cantu podet esser su dolore
c’ azis a boltas dadu o rezidu
ca totu bos benit restituidu

No b’ at cominzu chi no at a finire
Comente no b’at vida chena morte
Si naschida benit at aultire
No conneschet de sa vida su forte
Sa vida est prezis’ a su morire
Cando la passat chin su fog’ in corte
Sol’ eo so de su mundu zeltesa
Nudda bos pedo, so chena pretesa

Niune chi mi chilchet in su gosu
O puru cando viscios su binchende
Solu chie no connoschet reposu
Onzi tantu in janna est zochedende
A isse do sonnu armoniosu
S’ ateru lu passat pianghende
Sa morte ponet sos contos a postu
Finas chi su pentidu narat “bostu”

De vida so sa prenda donosa
Difatis benin fin’ a m’ agatare
Pro issos so sa dulche isposa
mi cheren totue comporare
eutanasia pro intrar’ in sa losa
e custu mundu poder abbandonare
s’ idet chi no so cussa majalza
chi naran.. ca no so sa faulalza.

Sa morte est eventu naturale
Comente sun sa naschid’ e sa vida
Totu benit .. totu est cabale
Finas si lassat in corpus ferida
Nois semus de regnu animale
De natura sa parte preferida
Pro cussu naro chi finas sa morte
Cand’ enit .. no est de malasorte.

Dulche o mala cheret su rispetu
Ca est s’ arrivu e no podet mancare
Inie est dezisu su progetu
Finas si totu cheren olvidare
Est comente unu trenu diretu
Chi paltit e si tiat cherrer frimmare
Imbeze cuss’ arrivu est fatu a posta
Pro cantas sian istadas sas sostas

Sa linna pro s’ ijerru preparadu
As oe de baranta cuintales
S’ ortu puru tue asa zapadu
Profetos nd’ as aer uguales
Tantu t’ impignas comente as nadu
Gai sos frutos an a esser tales
Sa vida puru in mala o bona sorte
Est s’ aparizu chi antizipat morte

Pintore, cantu naras de vida
Est beru solu a lu contare
Ischis chi morte cheret timida
S’ in vida no l’ ischis preparare
Si tantu obera no l’ as finida
Tempus no bat pro ti nd’ impudare
Cando tempus abbaidas in segus
T’ abbizas chi nudda benit chin tegus

Comente faghes a nde narrer male
De chie faghet de vida giustiscia
Sa morte bochit su criminale
Chi semper in vida l’at fata liscia
Ricos.potentes e sos caldinales
Inie totu cantos sun a miscia
Totu sos chi bi faghen presenzia
No mustran pius una diferentzia

Sa poesia d’ Elchidda e d’ Ortueri
Comente de Patada e donzi logu
Cantat sa vida che a passizeri
morte la malcan brujad’ a fogu
Totue est presente oe e deris
E ponet a pasare onzi arrogu
De custos tres fatos naturales
issa est sa chi c’ ogat sos males

Dae sa foza morta naschet frutu
E pustis est de vida s’ alimentu
vida imbeze isetat su lutu
d’ omine ch’ est pius tristu de cuntentu
su naschidu dae su letu nd’ est rutu
e sempre cheret a isse s’ atentu
sa morte est logu ‘e veru pasu
cando dulche ti porrit su asu