"CIDDOI" Giuann' Anghelu Alcadu, naschidu in Patada su 29 'e triulas de su 1835, est mortu in su 1912..

leadu dae "SEMIDAS" su liberu de Anghelu Carboni Capiale de Patada.. ed Torchietto


"CIDDOI" Giuann' Anghelu Alcadu, naschidu in Patada su 29 'e triulas de su 1835, est mortu in su 1912.. 

Ciddoi est naschidu in Patada su 29 triulas de su 1835 e mortu in su 1912.

De sa vida no s’ ischit meda si no chi fit cojuadu a Bantina, chi aiat duas fizas e chi in sa segunda meidade de s’ 800, s’ at fatu 21 annos de tribagliu forzadu in galera, ca isteit acusadu de aer apidu it’ a fagher chin s’ irrobatoriu de su   babbai letore de ‘Antina. Paret chi Ciddoi nessi in cussu no b’aiat nudda a che fagher.

Si narat de duas feminas chi andein a batire s’ abba a sa funtana ‘e Paddeu, in su caminu pro ‘Antina, a puddiles, a trumbulu e a s’iscuru, pro no b’ agatare sa fila de sas ateras feminas. Cando arrivein a sa funtana bi aciapein bator omines, chin sas candelas allutas, partendesi s’ inari de s’ irrobatoriu de ‘Antina. Comente s’ idein connotos, li slein sos cadinos, che los iscodulein  in sa terema e las cherian bochire, massimu ca una ‘e sas duas fit una contaredda famada.

Una de custas feminas, tia Ziza Casella, si leet s’ impignu de fagher a mediu chi sa comare no aeret atrogadu nudda, Sou tando las lassein andare, no prima de las aer torrida a avvertire e minetare bene.

Nachi custa tia Ziza tenteit sa comare, fina in puntu ‘e morte, pro s’ assicurare chi no l’aeret bessidu mutu.

Ciddoi no fit in mesu ‘e custos bator omines,  e isse at sempre nadu de no b’aer apidu nudda a che faghere chin s’ irrobatoriu de  su peideru Altana de Antina:

Tentu m’an innozente che anzone

Postu m’an in cadenas che unu moro.

Dae su chi ischimus paret chi no fit pinzos de giungher a coas;

Cocera l’ improvereit:

Cocera furat unzas de tuttone

Ma no che tue sos boes domados

E in irrobatorios ti aponen..

E isse puru narat, a su ciasca – ciasca, chi in Patada, no fin totu sos chi lu podian bidere:

Prima ‘e Dante est naschidu Virgiliu

Ambas duas grandissimas pessones

Dae Patada m’ an dadu s’ esiliu

E che fato in Bantina abitascione

In Bantina no b’ apo domiciliu

Solu ap’ una inza e unu cubone

Dae Patada m’an esiliadu

Pro cussu a Bantina c’ apo dadu.

Fina in cussa ‘idda inue sa poesia fit de domo, Ciddoi no istenteit a si fagher fama e logu in mesu ‘e sos poetas, massimu in mesu de sos improvvisadores, chi in Patada, sun pempre ‘istados in logu issoro; no si podet ispiegare divesciamente, fina su depidu de Pisurci e Luca Cubeddu a sa poesia improvvisada.

In su tempus de Ciddoi, sos ateros improvvisadores pius mentovados fin Pedru ‘Ejana, Barore Pichizolu, Paulu Antoni Capiale, e Cocera. A Barore Pichizolu chi fit andadu a lu chilcare pro andare a cantare a Bultei:

Tiradu l’as in bagante su ‘olu

Dae mesu ‘e sas crabas ses bennidu

A sa bogh’ est Barore Pichizolu

Su chin monte Lerron ch’est naschidu

Sos bezos in bidda naraian pruru de a isse chi, una ‘ia, propiu in Buddusò, s’ agateit in mesu in una gara ‘e poesia:

Isculta caru populu festante

Custa solu ti canto e poi m’ arreo

‘ennidu so che un’ istella errante

Dimora, logu fissu no ch’ ap’ eo

S’ essera puru unu Ariosto o Dante

So seguru chi premiu no leo

Ca ch’ at beniaminos apogiados

Chi sun chena cantare premiados

Nachi, poi de custa ‘essida, si nde peseit unu ‘e su comitadu e, chin unu bonete in manu, li buscheit pius dinari de su chi devian dare a sos cantadores.

Zertu no fin garas de poesia de como, dae su 1896, in palcu, a lugh’e luna, tando fit poesia de zilleris, de carrasegare e de izadolzos, a lughe ‘e candelas o de su fogu ‘e sa ziminea.

Calchi ajudu  pro comprendere menzus a Ciddoi e custas garas improvvisadas, nollu dat Limbudu, in su “Izadolzu de Bore”, cando ‘enzeit a bidda “a fama anna” unu poeta maresu, Antoni Simula, pro catare chin Ciddoi.

Ciddoi benit puru mentovadu, in sa cantone ‘e su Barantinu inue, in una ‘e sas pius iscadenadas in sos ballos paret esser propiu sa sorre sua, Sanina. Limbudu si la ponet a sa beffe, cantu ‘e dare ite narrer a su frade, e faeddende ‘e unu ‘e sos divertidos, Barore Anzelu Canale:

“ma est Sabina Arcada

Sa pius ch’ isse protegit;

l’ avvertet e la curregit

si faghet ballende errore

e li frobit  su suore

totu pro more ‘e Ciddoi

Ciddoi puru, dae bonu divertidu fit in su ballu e cando sos ballos cominzan a s’ imbrutare:

Totu frundidas a unu tuturu

Chin sas coas in cucuru

A nadigas iscobertas

Chin sas butegas abeltas

A mercanzias paradas

Sas cambas isperriadas

Che cando abberin armadios

Mustrende sos relichiarios

A cantos bi fin bizende

E Ciddoi abbaidende

Pariat in ispijitos

Ca gighiat sos obito

Che su duos de oros

Bidende cussos tesoros

Mancu pro Sabina pesada

E subitu nde revessada

Cantu at bidu e manigadu

E Limbudu istat cagliadu…

Una ‘olta benzeni a Bantina, unu furisteri, pro l’ invitare a cantare in sa idda sua; cando intreit a sa domo, resteit ispanadu de su logu inue viviat, che pedidore in loza, Ciddoi chena restare pro nudda abbirgonzadu li neit:

Inue si bi avveran poesias

Bi girat su arriu ‘e sa canna

Ello atera cosa creias

Si no povertade e pena manna

Comente s’ ets bidu fit una pessoa divertida e de cumpanzia, sas festas fin mamentos de cufrontu e de brigas de paraulas:

Dominiga est sa festa Carmelina

Sa chi faghen sos doighi oberajos

Aposta alciadu so  dae ‘Antina

Pro mi leare gustos e isprajos

Chie tocat Alcadu tocat rajos

Finas sos montes faghet a chijina

Chie tocat Alcadu rajos tocat

E in chijina at a fagher sas frocas

De ciddoi si naraiat puru chi connoschiat sos rimedios e pregadorias pro curare sos males, comente istanzare su sambene e ateras cosas, eredados dae sos mazores.

Fit su mastru ‘e meda improvvisadores mannos, sos anzones de Ciddoi, los giamaian.

Cando fatein sas primas garas in palcu, in sa festa ‘e su Remediu ‘e Otieri in su 1896, Ciddoi che fit in galera.

Finas tiu Antoni Cubeddu, chi fit raza patadesa, e fina poi ‘e cojuadu isteit pro pagos annos in Patada, fit unu ‘e sos “ischentes” de Ciddoi.

A bezu lu invitat a sa festa ‘e  Santu Pedru a Banina:

Beni a santu Pedru ‘e sa giae

Chi b’ amus una festa divertida

A costu de olare chei s’ ae

Pro te b’ ap’ a ponner anim’ e vida

Dae me onzi gustu tes’ aer

Ei sos gustos mios mai s’ idan

Pro chi sos gustos tuos sun benzende

Passados sun sos mios e passende.

Trattiate bene meda di Zusepe Moritu, pro a isse est posta sa cantone: Pepe e sa seta Luterina.

Naran chi cando torreit dae presone, in Patada li nein chi sa muzere fit amigada.

Isse faleit a Bantina, arvi longu e bestidu ‘e poveritu, pro no si dare a connoschere e si ponzeit a passare in sa garrera ‘e domo sua. Sa muzere fit sezida in sa contonada, luego lu connoscheit e pianghende si l’ abbarazeit.

Una die, in mesu a sos amigos chi ‘enzein a li visitare, isse nandeit sos saludos a Moritu:

Tantos saludos dadelia Moritu

Nadeli chi Ciddoi già est torradu

Già cheret lastimadu poveritu

Cuddu chi an innozente cundennadu

Chena fagher mancanza ne delitu

Vintun’ annu ‘e tribagliu forzadu

Chi ‘enzat alu ‘ider in sa frigura

Prima chi siat postu in sepultura.

Moritu li rispondei:

Bene torradu Ciddoi a Bantina

Deus ti ardet de peus trabaglios

Su mundu est unu mare de ispina

Donzunu est suget’ a sufrire taglios

Solu s’ onnipotenza divina

No est sugeta a ruer in imbaglios

Omines semus de terra e de piuere

S’ umanidade est sugeta a bi ruere.

No sun meda sas cantones intreas de Ciddoi chi sun arrividas a nois. Ma bastan pro lu ponner impare a sos mannos de sa idda, e a nos fagher rimpiangher de aer perdidu  o de no aer connotu menzus su restu.

Sa cantone; “Eolo dispenseri de sos bentos”,  l’at posta sende in  presone, comente puru “so cojuadu e no apo muzere”.

S’a tera iscrita pro Zusepe Moritu, no s’ ischit si l’ at posta prima o pustis s agalera.

Su versu chi Ciddoi impitat est s’ otava, a sa moda ‘e totu sos improvvisadores, e sas cantones  e bessidas an totu su sabore de cussu tipu de poesia.

SO COJUADU E NO APO MUZERE

No so ‘atiu e vivo che batiu,
so cojuadu e no apo muzere,
de su chi so padronu no so mere,
e no poto disponner de su meu.
No so ligadu e so presu e reu,
pro pius martirizu e pius penas,
so isoltu e astrintu de cadenas,
e pro chi apa vida no so ‘iu,
nò so ‘atiu.

So in però e so che ispiradu,
mi agato e so che mortu in d’ unu saltu,
piango e de piangher soddisfate,
nò so ne m’ ido mai saziadu,
chena intrare in tumba sepultadu,
sos tempos m’ an cherfidu parare,
so in barca e no poto navigare,
ponzo vela e no andat su naviu,
nò so ‘atiu.

Sa morte m’ est lassende pro isteniu,
sa vida est pro chi viva tribulada,
parentes apo ne so imparentadu,
amigos tenzo e de zente so eniu,
sa fortuna no m’ est nudda a cumbeniu,
sa sorte mala est pro mi acumpanzare,
gito limba e no poto faeddare,
gito ancas però a mover no apo briu,
no so ‘atiu.

Se vivende e de viver no profito,
so sanu però apo ‘onzi dolore,
no devo e so totu depidore,
so continu paghende e mai chito,
apo dolu e si canto no abito,
piango e lagrimare no est isfogu,
no brujo e so continu in unu fogu,
no percosso a nesciunu e apo aziu,
no so ‘atiu.

Males no apo fatu e male spato,
piango e nesciunu su coro abberit
chie paret chi m’ amet pius mi ferit
si rien, de mi taighe contu fato
poi chi mi carignan mi nde ispanto
e benzo dae sa morte minetadu
si apo domo no apo ‘ighinadu
saludo a totu e mi negan s’ adiu,
no so ‘atiu.

Eo amo a totu e odian a mie,
cantos nd’ istimo m’ istan insultende,
no so gulpadu e gulpas pianghende
e deacomi no so una die,
so in fiamas e so fritu che nie,
inabile no so e so isentu,
manigo e no profeto de alimentu,
bio e morzo de sidis in su riu,
no so ‘atiu.

No so malu e pro malu m’ an connotu,
so in vista e m’an postu in totu olvidu,
no mi chircat nesciunu e persighidu
‘onzi istante e donzi ora dae totu,
s’ ando a fuer su fogu, pius so cotu,
sa libertade c’ apo ets pro disterru,
so in su mundu vivende in unu inferru,
pesso ‘e mi sullevare e perdo isviu,
no so ‘atiu.

Già mi poto de coro lamentare
Sende pius che tando sos turmentos,
sos chi mi braman morte, a mamentos,
mi pregan vida pro mi tribulare,
tantu chi pro me me est morrer su campare,
de ‘onzi modu de viver so brivu,
e chie nachi m’ amat est motivu
sicaremi su samben donzi ‘utiu,
no so ‘atiu.

Sos chi naran m’ assestin no mi ajuan,
sos aderentes m’ an postu in fastidiu,
senza fagher delitu o omicidiu,
che omicida m’ iden e m’ impudan,
sos ojos sun asciutos e sucutan,
su coro no iscramat e suspirat,
una corda m’ allenat e mi tirat,
no besso mai dae di safiu,
no so ‘atiu

ando e cuncruo sa descrizione
e pro desdicia e mala sorte mia,
cantu apo nadu e poder narrer dia
de su chi sufro no est paragone,
no so ‘atiu e in desolazione
vivo che santu ‘ezu in su cuzolu,
apo muzere e corco e drommo solu
atunzu, ijerru, beranu e istiu
no so ‘atiu e vivo che batiu.

EOLO DISPENSERI DE SOS VENTOS

Eolo dispenseri de sos ventos

Preguntali si an bidu a vida mia

Una friza crudele in coro sento

Su de no aer de issa nivitia

Eolo meu a tie mi lamento

Su c’ at dadu a sos ventos teoria

De vida mia notiscia mi porta

Ca no isco s’ est bia ne s’ est morta

Eolo dae s’ isola natante

Mandabi su entu maestrale

A inue lassadu apo s’ amante

A bider s’ istat bene o s’ istat male

Ca sa friza crudele penetrante

M’ est in su coro ferida mortale

Su ‘entu maestrale bei imbia

Ca no isco si est morta ne s’ est bia

Eolo a su cumandu at ubididu

Maestrale mandadu bi at su ‘entu

De vida mia notiscia m’ at batidu

A inue fia eo in su mamentu

S’ amante  mia nachi aiat bidu

Inue soliat fagher ausentu

Chin forte sentimentu e penas duras

Pianghende chin duas criaduras

Chin duas criaduras pianghende

Chi su coro faghian a tremare

Finas sos muros fini sucutende

Bagnados dae tantu lagrimare

Sas fizas fin sa mama preguntende

Cando su babbu li sdiat torrare

A lis dare risposta no podiat

Ca ora ne mamentu no ischiat

Ello a chie cherides chi pregonte

Si no sa mama chi presente l’an

Solas chei sas feras de su monte

Lassei cussas poveras orfanas

Chin su tristu bagnadu issoro fronte

Paren de Babileu sas fontana

De lagrimas si gromma oto rios

Ses sos issoro e duos sos mios

Fat’ an sos ojos sa divisione

Chi sospiros e lagrimas de coro

Duos mi nd’ apo gitu a sa presone

E se nd’ apo lassadu a cont’ issoro

Tentu m’ an innozente che anzone

Postu m’ an in cadenas che unu moro

In coro sos suspiros m’ alimentan

Cando de s’ innossenzia si ammentan

Sos suspiros mi lean sa potenzia

Sas lagrimas m’ incuria sa vista

Ca m’ an brivu de currispundenzia

No isco sa familia coment’ istat

Muzere e fizas tenide passenzia

A superare cust’ epoca trista

Deus no s’ istat de custa catura

Già pagata chin sa sua ira ventura

Deus gia pagat ca est giudice giustu

De sa fama leademi e unore

Si no faghet giustizia subr’ a custu

Dezi si no est babbu de amore

Cantu sento su dnnu e su fraustu

Sue m’ aer ingulpadu a grassatore

Segnore si de custu bos istades

Dezi est chi in chelu no regnades

O Deus innozente e infinitu

Istudadende  ‘Ois sa fiama

De custu arbitrariu manuiscritu

Chi an fatu pro giomper a sa brama

Muzere e fizas mias sun apitu

De che torrare su pastore a s’ ama

Ca a sa disperada solas sunu

Orfanas chena tenner a nesciunu.

A nesciunu no an, si no a Deus

Poveras pellegrinas furisteras

A boghes giuiende “babbu meu”

Sun pianghende peri sas garreras

Chin su coro nieddu tristu e feu

No paren pius cuddas si no ateras

Fatu de sas garreras a piantu

In chirca de su babbu amadu tantu

Amigos iscultantes dade atentu

A inue s’ innossenziat s’ inserrat

Si m’ est bennidu mai a pessamentu

Segnore contr’ a mie fatat gherra

Si a cussu b’ apo dadu assestimentu

Contrariu mi siat chelu e terra

Si  eo  cussiente  bei  fia

Chelu e terra contrariu mi siat

Pro finis caras fizas e muzere

Suplicade a su Deus Soberanu

Nandeli chi sa patria mi cheret

Incarceradu e dae issa lontanu

Ma no pro aer fatu male atere

Pro gualpa de unu barbaru tirannu

 Chi at dadu manu a fagher su prozessu

Pro s’ odiu malignu a su revessu.