martedì 5 novembre 2013

ingannos











ingannos

Ma cantos sun sos canes de istelzu
chi abitan sas terras de su mundu?
Chei su cucumeddu de suelzu

nde naschen donzi die tot’ in tundu:
tenias, parassitas, erighinas
corvos, utulzos apit’ in su fundu,

chena connoscher artes ne fainas
lean totue suzu ‘e terra anzena.
Velenu dan in contu ‘e meighinas

e suzan samben de ‘onzi vena,
comente su lagu de s’ Omodeo
bombitan a mata e diga piena.

Chie narat “pro a tie lu fato eo”
est falza sa idea e sa promissa,
rispunde: “mi dispiaghet, no ti creo,

che Giuda, limba tua paret issa”.
Porrende cussa manu paret dende
invece s’ idea mala gighet fissa,

a ojos bascios est abbaidende
comente poder su coro furare.
Penseris chi totue istan fuende

pro futire su tempus de intrare,
in trancamaglia in logu anzenu
e poder una mente anneulare.

De cantu nadu totu nd’est pienu:
dutores, professores, avocados,
ma sos pius famidos chena frenu

in sos partidos si che sun cuados,
politica chen’ arte bi sun fissos:
isciaos de s’ inari “namus ladros”

chi pessan in sos viscios solu a issos
chen’ aer de sa vida istudiadu.
Chie los at in sa domo ammissos

no pessat a un’ omin’ e istadu,
ma unu zolzi de poder brujare
posca chi piaghere li at dadu.

Sa zente chi andat a votare
pessat d’ esser alu in sa paltida,
su mundu est chilchende de ‘oltare

e gai che lis passat sa vida.
Comicos chi pienan de chiscuza
de nudda chi cheret meda timida,

proponen pro fortuna “s’ erva lutza”
betendeche su populu in sa runda.
Posc’ a s’ imperadore coa mutza

li creschet torra e leat s’ unda,
dae vint’ annos che sa tilighelta
paret chi morit ..ma est atera frunda.

Tot’ una farsa est custa chelta,
a manca b’ at pius pagu de nudda
su menzus ch’ est bessidu dae s’ iscelta

gighet sa conca aspida che chebudda.
A fin’ e custu.. sa soluzione
Oj’ e istrale … e coglidos in trudda…

Nessun commento:

Posta un commento