Sa gara de: "Su miraculu" (Tzuseppe Pintore)- "Su dubbiu" ( Lussuriu Cambiganu)- "S'iscentzia" (Frantziscu Masia)

Sa gara de: "Su miraculu" (Tzuseppe Pintore)- "Su dubbiu" ( Lussuriu Cambiganu)- "S'iscentzia" (Frantziscu Masia)

Si cunfrontana sos poetes:  Tzuseppe Pintore de Ortueri; Lussuriu Cambiganu de Pattada e Frantziscu Masia de Tula…

Giuseppe Pintore

Cheria chenza ponnere ostaculu

cantare custu tema nou nou.

Comente cheres a piaghere tou

su dubiu s'iscienzia su meraculu.

Non b'a bisonzu de faghe s'oraculu

pro chie si ponet in custu prou.

Ma fatu siat cun prinzipio sanos

ca sun cosas de totu sos umanos.

Lussuriu Cambiganu

eo semeno in penseri duda

La gito fatu e ando costante

Meraculos chi essin a s’istante

Est che sa limba chi abbarrat muda

S’iscenzia pro cantu est brillante

 Onz’intantu si mustrat che a Juda

Abbias d’asu ti dat sa zertesa

S’incras manzanu ,s’ anca est istesa.

Francesco Masia

Lu fatto pro cussos chi non fini sanos

e benomale che sun finidos in s’ispidale

reposende in bonu e morbidu cabidale

can passadu in gioventure mentzus beranos

visitados dae amigos,parentes e paesanos

 ana torradu a leare bonu caminu e viale

e daghi sun torrados a domo insoro e consolados

tottu ana pensadu chi gratzie a “s’iscentzia” fini sanados ..

Giuseppe Pintore

s'illusione tua es troppu manna

cun sa sientzia no faghes meraculu,

proite cando agatas un'ostaculu

no triunfas ne cantas in osanna.

Ses che su etzu chi lentu s'afanna

caminende apozadu a su baculu.

avantagiadu no mi pares tue

passu longu non bettas atr'ue.

 Lussuriu Cambiganu

Non b’at in megus dubbiu perunu

Chi vida no dat mai zeltesa

‘oe est goi cras est male presa

Meraculu no nd’ ides mancunu

S’iscenzia semper est in pretesa

De narrer “eo so su numer’ unu”

Pestanu tra s’arrogu e s’ignotu

Ischirrio dubbiu dae sempre notu

Francesco Masia

 Cantu ada fattu s’omine in su sou andare

si devede bidere cantu e bene b’ opereidi

ada devidu s’iscentziadu semper pensare

e fintzas a sa luna isse b’arriveidi

pro bos podere dae subra osservare

tottu cussu isse si lù gherreidi

e si s’iscentziadu meritada cuss’onore

est cà restada de miliones de inventziones creadore...

Giuseppe Pintore

Tue andas benis in sas istellas

de s'imbentu naras ses poeta,

m'arrivadu no ses a sa meta

proite totu cantu no sugellas.

Osselva in Lourdes ite cosa bella

inie a fatu idere bernardetta

fine su dubbiu incue enit mancu

sa fide manifesta liberu e francu.

Lussuriu Cambiganu

Totu a su penseri est cunzessu

Siat iscenzia che sa santidade

su chin no torrat in veridade

Est sa prepotenza ‘e su progressu

Finas s’ illusion’ e santidade

Est roba de unu mundu pelfessu

Etando pesso chi s’imperfescione

siat sa vera beneiscione.

Francesco Masia

tando Zichicchi non est’istadu

unu veru iscentziadu de alta mente

cà fidi omine e fidi consideradu

chi podiada istare de Republica presidente

tottu sos onores in vida l’ana dadu

e in universidades semper dotzente

ad’appidu bideas in totta sa sua pensamentosa vida

e in su progressu bos’ad’ imparadu fattendebos de guida...

Giuseppe Pintore

Zichichi cheret esse che a deu

narat puru miraculu e su mundu,

mira isse bi crede a parre meu

cando totu analizat a fundu.

 Ides faeddende de Galileu

divin'omine narat in su profundu.

sa sientzia mancu la separada

dae su trascendente gai narada.

Lussuriu Cambiganu

Tue Pintore ammie ses nende

Chi meraculu est un’ ispera

Ti naro chi comente imbreaghera

Cussa pessona morit caghende

In veridade dae manzanu a sera

Si bivet chin dolu tribulende

Cussos chi, meraculu an bidu

Mi paret disizu de sentidu..

Francesco Masia

Ti rispondo cun calma caru Pintore

cà mi naran chi de poesia ses bonu mastru

in s’iscenzia non risultada dubbia a incastru

né miraculu aggiuada bon’inventore

si non b’est sa bravura de operadore

 de inventu nd’essidi mannu impiastru

e podede sa natura fintzas bene cunformare

ma bi cheret semper s’omine a l’acconzare.

  

Giuseppe Pintore

Sa sienzia istudiat sa natura

chi es gia miraculu a contu sou,

nudda mi as nadu dae nou

ischire cheres totu s'ermosura.

pro faghe tue su meraculu tou

aboltas bessis fora de mesura

deo su meraculu c'apo in podere

aconzo totu cantu a piaghere.

Lussuriu Cambiganu

D’Ipocrate si faghet giuramentu

Pro dare cussienzia a meighina

Ma forzis est menzus testamentu

De fagher cando li porris s’ischina

Dutores t’occhin a su fogu lentu

Atacados a ‘inari ch’ erighina

Ebbai sun padres miraculosos

Cheren istrinas eppoi ti dan sos gosos..

Francesco Masia

fintzas a su bonu agricoltore

chi impittada trastos e attrezzos

li bessidi sulcos pius letzos

cando impostada su laore

oe impittada su trattore

 chi est cumpletu de aradu e istertzos

prima si faghiada a manu tottu

ma miraculu in cue non si nd’a connottu..

 Giuseppe Pintore

‎

Ma guasdi m'intendo gioviale

c'as tzittadu bellu s'argumentu,

sa cale nde so meda cuntentu

l'as fatu in manera geniale

 penza a su meraculu industriale

su setighentos origine a tentu

comente ides tue in cuss'impreu

bi e smpere su meraculu meu.

Lussuriu Cambiganu

A duellare bi l’azis sighida

Chilchende ‘ue poder ataccare

Cussas rejones chi no an a dare

Nudda ‘e bonu ma solu caddarida

Su dubbiu solu podet avvivare

A veridade chi mai ses bida

Ne in meraculu mai cumproadu

O iscientziados chi totu an luadu.

Francesco Masia

Bae chi a mie tue non m’ imboligas

mancari tenzas gana de mi m’imboligare

e mancu tue a mie mi morigas

mancari chi mi cheffas morigare

ponedi in conca de m’affrontare

 cun veridade e cun cosas nodidas

lassa in pasu dubbiu e miraculu dubitativu

cà ses faeddende cun d’unu chi in su faghere est attivu...

 Giuseppe Pintore

‎

Ma tando ses tue meraculadu

chi de s'atu tou ses attivu,

creia ca fisi unu iscientziadu

 invetzes de iscientzia ses privu.

cun sa laura cres de faghe su divu

ma luntanu no ses arrivadu

proite chi cumbatis chin megus

iscude sa conca e tortras in segus.

Lussuriu Cambiganu

A tie, oh Franziscu Masia

Ti naro chi no as seguresa

D’esser duttore oburu in majia

Semper cuscescia azis in coro presa

Tot’ un’ imbrogliu, una litania

 Chena cabu, ma sulu at pretesa

D’esser in custa terra imbonidora

Siat iscentzia, che jana in malora..

 Francesco Masia

Ai cantu sas mentes atzis meschinas

mancu Cristu naschende bos’acconzeidi

nademi si fini bellas e prodigas fainas

cussas chi sa natura bos’indicheidi?

nè su dubbiu e né miraculu b’appeidi

 a che ogare malas e insanas marighinas

ontzi orta chi miraculu s’adombraiada

pius bidea noa in conca sì mi poniada..

Giuseppe Pintore

‎Bae ca tue no nd'as cumandu

proite cue totu cumando deo,

pro cantu in longu e lagru su bandu

ettas, mira su chi fia semper seo.

So deo chi ti do tantos peleo

proite ses andende a s'isbandu.

Cando best'in mesu su meraculu

es ca no as superadu s'ostaculu.

  

Lussuriu Cambiganu

Sa duda t’apo nadu ch’ est sa sola

Chi ponet a cabu totu cantos

Chena illusiones e ne bantos

Semus in terra una bandarola

Ilfusta dae lagrim’ e piantos

 Chi nues e confine totu ‘ola

Semus in terra chin sa mente presa

De nudda ch’ at una sola zertesa.

Francesco Masia

Fintzas custu pro esempiu ti atto

chi parede unu cositta de niente

non teved’esser naschidu inteligente

chie ada fattu sa macchina de su tzelatto

Procopio Castelli isse veramente

l’ada inventada ei su numene sou fatto

si siscenzia e cussa conca non bi fid’ istada

cussa durche macchina, chie l’aiada inventada??

  

Giuseppe Pintore

Narali de parte mia a Procopio

chi de inbentare nde tene gana

chi lu fetta cun bidea sana

 ca tantu no lu semus is propio

deo sa dose ti la raddopio

penza tue a cuddu afidu e Cana

chi Procopio es che a mie divinu

tando chi jambet s'abba in binu.

Lussuriu Cambiganu

Meraculu est pro chie chen’ ispera

Dat a su divinu su destinu

No at de sa vida idea vera

E pessat a su fumu de continu

Onzi die passad’ in trallallera

Poi che ruet intr’ e unu pontinu

Fuende a respons’ e rialidade

Sa frunda est solu ‘e famidade..

Frantziscu Masia

Un’atteru  datu ti dò e mi l’agabbas

troppu mi ses fattende impedimentu

su chi non est in su etzu testamentu

l’ada iscrittu  Martini cun pinnas bagnadas

prima cussos iscrittos pariana baggianadas

fattas in complicadu arabicu accentu

isse pensadu b’ada cun intellettu sanu

e  dae tando ti l’acciappas tradottu in Italianu.

Giuseppe Pintore

Ateruna olta mi das gosu

pro su meraculu de religione.

Oe cumprendene sas persone

 su chi prima lu fi dificultosu.

Es meraculu presta attenzione

fines a cunsizare su dubbidosu.

Chie a sa duda a dadu moida

sa vida sua si che cola boida.

  

Lussuriu cambiganu

In veridade nudda b’at de prezisu

‘Emmancu est comente tue naras

Sa duda est che a bellu sorrisu

De chie isperiat de vida sas caras

Pesso chi mancu in su paradisu

 B’ at postu si custu no imparas

D’essere unu de sa tanta zente

In dubbios chi ti lean sa mente

Francesco Masia

Siscentzia est arrivada como cun sa tradotta

s’est assentada cà atteru deviat inventare

de miraculos s’est posta a dubitare

e veridade pragmatica sa pius connotta

setzis dai chito ambos duos a su lotta lotta

ma realtade non resessides a cambiare

in custu mundu fattu de qualunquismu

contada solu su ichire fagher e su realismu..

Giuseppe Pintore

Nudda mi dasa e nudda mi furas,

peroe cun sa duda andas male.

Chi t'agattas malaidu in s'ispidale,

 cando so duttores no agattan cura:

bias tantas santa una figura,

est'apparida e in forma naturale,

torra su moribundu de nou sanu

senza b'aere iscientifica manu.

Lussuriu Cambiganu

Ti dasso cussa sant’ illusione

Chi tantu faghet ben’ isperare

malaidos chi pessan de sanare

ponzende fatu a una pultascione

eo però sigo a dubbitare

 meraculos chena una rejone

ca finas Jesus foras dae tempiu

ch’ ogheit de cummerciu cuss’ iscempiu

Francesco Masia

mi la setzis morighende e restades morigados

fentomende credentzia e religione

de s’iscentzia restada sa rejone

e fintzas santos a cue si sun bettados

cando si neidi chi terra giraiada frastimos fin bettados

ipotitzende disgrascias e maleditzione

oe a Galileo l’ana onoradu e accreditadu

pro tottu cantu su chi aiada istudiadu e osservadu.

Giuseppe Pintore

In su tempiu afarios faghiana

e Gesus cue si fit airadu.

Amenta a lazaru a resuscitadu

cosa chi so duttores non podiana.

chi issos che Cristos istado fiana

 no l'aiana mancu crocifissadu.

Poi chi l'ana fatu crocifissu

a sas tres dies resuscitat'issu.

Lussuriu Cambiganu

Finzas a Jesus dubbiu est bennidu

Cando su sole in rughe fit brujende

A Babbu Mannu tando l’at pedidu

“proite lu fit abbandonende”

Niune est in su mund’ ischidu

 Solu presumu est lorumende

No b’at iscienza emmancu religione

Chi potat dare a sa duda rejone..

Francesco Masia

Cantas discussiones e diseos

fintzas a Gesucristu fentomende

bo la setzis ballende e cantende

mi parides bois  puru fariseos

setzis pontzende in mesu milli anneos

ma mi paret chi veridade setzis neghende

si s’omine non ada  conca intellettiva

a si ochire cun manos sua già b’arriva..

  

Giuseppe Pintore

Franziscu ti as leadu sa furia

guasi pares tue meraculosu.

Ma ses currinde cun sa fantasia

su mundu es pro te dificultosu.

Lussoriu puru ca lu es dudosu

su mundu li pare totu mala ria.

gai sezis donn'ora pianghende

in caligunu meraculu isperende.

Lussuriu Cambiganu

Meraculu est unu, unu zertu

Sa bennid’ a sa vida in bonora

Cand’ a su mundu sos ojos abertu

Narat: “ como est bennida s’ora”

Partit viagiu in destinu inzertu

De Ulisse chi caminat a infora

E suberat d’ Ercule sas colonnas

Chena toccare pius sas ispundas.

Francesco Masia

s’iscenzia a su dubbiu ponede ostaculu

medas s’attaccana a credentzia religiosa

e parede chi sa cosa pius meravitzosa

est cando s’avverada bonu miraculu

non importada pius contu e calculu

ma sa faina cussa pius rigogliosa

cà credentzia e  dubbios postos umpare

 paga  serenidade semper t’ana a dare

Francesco Masia

Tzuseppe e Lussuriu,

a su chi nades non bì creo

cà impitades eresia manna

forsi non fidi su filu de Arianna

chi ada indicadu retta via a Teseo?

a esempiu cussu fattu bò lu leo

pro indicare a bois puru sana gianna

intradebei seza dubbios e miraculos

cà s’iscentzia los’ada già fattos bonos calculos..

Giuseppe Pintore

A cuss'ottada fato unu restauru

proite ses torrende a campu meu.

Chi nde ogas in campu a Teseu

 mancu incue ti ponzo su lauru.

Cando fit in su labirintu feu

in perigulu cun su minotauru.

Lu salvat Arianna de s'ostaculu

cussu puru conta che meraculu.

Lussuriu Cambiganu

Onzunu si nde leat sa parte

Su tema sou chi l’est toccadu

In cuntierra como che a Marte

Ponimus totu comente dubitadu

Niune est zertu ma si leat s’arte

 De aer su cuadru pintadu

Finzas su pius mannu inventore

De dubbiu nde faghet onore

Francesco Masia

 Mi dispiaghede tzuseppe de s’abbagliu

su chi sutzedeidi fidi tottu calculadu

a Teseo Arianna ada cussitzadu

giustu modu chena fagher perun’imbagliu

li pontzeidi  in manu filu de ragguagliu

bessidu dae iscentifica conca e bogadu

si tue pensas chi cuss’idea fidi incolore

deo ti naro chi fidi dettada fintzas dae s’amore..

Giuseppe Pintore

A difende su tema ses presumiu

osselva su meraculu meravizosu.

Amenta cantu nd'a fatu Padre Piu

cun so malaidos semper premurosu.

Lussoriu ca lu e semper dudosu

nde so cumbintu ca l'at intesu e biu.

Nde tenzades o nono de piaghere

e su meraculu chi tene podere.

Lussuriu Cambiganu

Meraculos de mente ingannadores

Sun su sulenu de chie no toccat terra

Pro ilmentigare tragedias e dolores

Sa veridade in sonnios che serra

Finas sos santos padres pedidores

 A sos imbonidores faghen gherra

Cussos chi de sa virtude issoro

Miscian s’abba santa impare a s’oro

  

Francesco Masia

bos’ammiro cà peraula non bos trema

e bi setzis pontzende bon’intentu

de cussu so onoradu e cuntentu

istade attentos però mandighende crema

bois  mi parides che Cervantes in poema

cando ada fantasticadu in molinos a bentu

e s’eroe chi isse e tottu aiada inventadu

dae sa credentzia a sas palas s’est’appiccadu ..

Giuseppe Pintore

Tzeltamente bi sun sos impostores

es gai de cando esisti mundu

ma su meraculu es pius profundu

 pagu contana sos ingannadores.

Mira in Fatima cantos onores

tributana a Maria totu in tundu

e nde so cumbintu e seguru

c'apretziades s'eventu bois puru.

Lussuriu Cambiganu

Ch’ in die cras no b’at zertesa

Lu narat su diciu antigu

Iscientzia at sa pretesa

D’esser d’umanidade amigu

No idet cantu l’at offesa

 Chin gherras, e miseria a sigu

Pro cantu su progressu siat mannu

Ateretantu est istadu su dannu..

Francesco Masia

Tra miraculus dubbios e iscenas

bos bido chi bos setzis ammoddigados

non bidides chi sos tempos sun cambiados

e niue crede piusu a cussas penas

de ispidale istantzias sun pienas

e dae duttores imbarana pro esser curados

si aina imbaradu su miraculu fentomadu

pius de unu si che fidi mortu abbandonadu

Giuseppe Pintore

Su meraculu s'averat onzi die

a sa prima essida de su sole,

peroe cando calchi cosa dole

isperamos in su meraculu cre a mie

 pregas siat meraculada sa prole

chi sa vida che colen rie rie

proite chi amus calchi mancanza

in su meraculu e s'isperanza..

Lussuriu Cambiganu

In tundu a paraulas girende

Torrende a su mantessi logu

Semus che a molente fatende

Inghiriende sa mola dae nou

No est meraculu su chi ses bidende

 Ma brajas chi essin dae su fogu

Meraculu no est meighina

Cando sa linna si falat a chejina..

Francesco Masia 

Iscentziados, operadores e ischidos

cun credentes illusionados e devotos

non l’ischides chi dae niune setzis connotos

e gighides macchines dae cando setzis naschidos

sos miraculos parede chi niune los’appada bidos

e in inventziones noas semper b’ada rimbrottos

deo cun totta  s’iscentzia sana como resto

e a bò la mustrare e fagher connoschere m’appresto

Giuseppe Pintore

Finimolu su tema cun cuscenzia

ca es bennida s'ora e terminare.

Sempre bi siat bon'assistenzia

donni pena de la pode sanare.

E chi su meraculu cun s'iscienzia

caminen semper'a fiancu e pare

bi ponzan manu duttores e santos

pro ch'istemus bene totu cantos.

Lussuriu Cambiganu

Sa mente mia a s’ammentu anda

Shakespeare b’at postu duda

“Est o no est cust’ est sa dimanda”

Amleto, a sa risposta muda

Ponedeche onzi pretesa abbanda

E cussa oghe oztr’ancor’azuda

In veridade sa vida no est tota

Dae nois meda cheret connota..

Francesco Masia

Como chi 17 peromine  nd’amus postu

e custu tema cun passione affrontadu

cun bois a serentina mi so appentadu

ispero de aer fattu de alunnu cumpostu

non est’ istadu nemmancu onerosu costu

e  medas cosas cun bois appo imparadu

si lu cherides sighire tema, faghidelu a puntinu

deo bos saludo bos abbaido e mi ponzo in s’aventinu