sa corte (atrivende Cambiganu - Black)

Cortegende…..

        

        

 Omine

 Amada.. tue bella signorina
De coro e de alta simpatia
frutas donosa arte in poesia
Ti saludo a moda patadina.

Femina

 Eo ti responn' a sa leiesa,
cun d'una mia mudesta sestina
e ti recambio chenza pretesa
c'app' aggradessìu sa battorina...
...T'imbio grazi' a su cumprimentu
'in retardu ma  a coro cuntentu...

     

 omine

 S’atera ‘ia a tie ti mustreri
Sa mia simpatia singulare
Det esser chi a tie no ti feri
Su meu interessu a t’istimare
Isco chi eo pro te so furisteri
Chena perunu isetu de ti dare
Solu mi fagher mannu piaghere
De t’aer bon’ amiga in s’iscriere.

Femina

 E ti recambio atterettantu
ca ti cunfirmo su mattess' affettu,
puru deo sena perun' isettu
d' amistade tua mi nde fatt' 'antu...
...Est unu recreu s'amiganzia
mancar' attes' e in luntananzia...

 omine

 Ite mi naras de sa vida tue
Chi bives a palas de Marghine?
Est menzus de biver pasada in cue
Oburu in zitade de machine?
As mai pessadu, e si est si, inue
De ponner passos fora, chena fine?
Pesso chi siet inutile dimanda
De unu chi at bividu in randa.

Femina

 In coro porto ancora cuss' altura
chi Punta Palai est nomenada,
ma in Casteddu mi so coiada
pro distinu in edade madura.
De barantatres chi nd' appo lompìdu
sunt vint' annos de vida furistera;
chissai ch'a bezz' agatte manera
de torrare a-i cuss' amadu lìdu...
... Ca d' 'ortare sa car' a montes bramo
serrand' ogros in sa terra chi amo...

         

  omine

   

tue chi ses che frina de ‘entu
Mi das in sa calura su recreu
No isco proite nde so cuntentu
Cando abbaidas su situ meu
De su chi faghes eo so atentu
E mi solvo comente ‘ozu seu
Cando legio su tou pessamentu
Chi brillat che istedd’ in firmamentu

femina

 A mie faghent su mattess' effettu
sas rimas tuas de-i cust'ottada
chi parz' 'e abbrazzos inghiriada
cun amistad' e sinzeru affettu.
Cando sa poesi' as cumpilada
eo nd' intendo su sonu perfettu
prim' ancor' 'e l'aer accabbada
nd'appo giai cumpresu su cunzettu...
...sena timori' e perun' ingannu

omine

          

 forzis cheres de me una cantone
Pro ti fagher su coro toccheddare
Eo bi proo ma no b’at rejone
Sol’ una poesia pro t’antare
Su tempus passad’ est de passione
Restat modu sol’ e l’ammentare
Però a tie la fatto chin affettu
Chin versos de fiores a cuffettu

femina

Custu 'entu chi naras
minnetada tempesta
massimamente in zona de monte,
peroe si t'imbaras
a mie cun sa dresta
sa manu no ti lass'e fatto ponte
ch'attraessat su mare
e terra collinare:
arrivas salv' 'e san'a Supramonte...
...inie sa friscura
godimos fin'in tempus de calura...

omine

          

 In su giardinu
Chi fiorit sa rosa
B’ est vicinu
‘olende mariposa
De orofinu
Issa meravitzosa
In pann’ e linu
Recamat onzi cosa
Paula tue mi pares sa farfalla
Chi mi faghet andare ment’ in palla

Femina

Tand' àttil' a sa proa
chi cherz'iscumbattare
s'abber'una mescia bi essit 'ona;
resurtat liga noa
ancor' 'e arrodare:
affittet frutt'e no pir' ispadona,
ch'in bula no arresset
donz'uccone m'arreschet
e posca la digir'a luna nona...
...menzus lam'affilada
ch'intrat, bessit e dannu no nde dada...

omine

          

 Non timas tue de mi narrer cosa
Ca giae ses de sa gianna mia
Ses tue s’abba ‘e sa vena ‘ia
Ch’ isbramat sa rocca granitosa
In amore ses tue sa menzus ghia
chi dat sulenu a coro ‘ue reposat
tando impare a su corpus s’isposat
e biven in gosura e allegria.

   

   femina

              

Muntenedi coro e coratella,
ch' ancora ti servint, po caridade,
e lassami sos cortegiamentos;
n' est in cussu chi s' 'ient sos talentos
chi s'achistant e ligant s'amistade;
bi cherent umiles' e voluntade,
su rispettu, sos bonos sentimentos,
san' intellett' e acuta favella:...
...Tottus calidades chi as bundantes
e chi conchistant amig' e amantes...

omine

       

 Aite tue mi lassas a sa sola
In mesu ‘e tempestas de desertu
Cando aparis sempre mi cossolas
Su coro fit pro tene semper’ abbertu
Como imbeze in aeras che olas
andas in lidos de destinzu inzertu
comente fato como a cantare
si tue no mi das ite pintare.

femina

    

         
In custa vida de bassu tenore
s'idea est abberrer unu situ
de poesia piccante d' autore;
cuss'arte rendet mannu s' introìtu
gai za s'ispassiat su lettore,
ma chi nos paghent unu bon'affitu...
...chi nos prenimos buzzacc' e iscarzu,
dinari faghimos a remiarzu...

omine

          

 Paula ite mi naras
Ite su chi disizas
Forzis a tie poto apagare
No idimus sas caras
Nemmancu sa chizas
Un’ iscuta ti poto allegrare
Preferis su fiore
O su frut’ e amore
Narami ite podes leare
In cantu ist’ apitu
Mi costoo d' irgonza che 'eritu

femina

          

 Su frore lu ponz'eo
tue nde 'attis s'abba,
o un' abe de bona punghidorza
chi posca mi l'impreo,
ma s'irgonza m'accabba
chi sanu ses a sutt' 'e sa chintorza;
no timas su dovere
ch'est unu piaghere,
ma beni prima chi de sidis morza...
...ca l' 'ies chi su sol' est card' e artu,
chi no s'allizat su frore 'e martu... 

omine

          

 S’anzonedda mia
No ti lasso sedida
Ti porro abba dae sa funtanella
Ca già la gitto imbia
Pro te chi l’as pedida
Sa cosa remonida in sa nella
Si tremet che sa foza
in d’una nae ispoza
pro te s’aconzat e si faghet bella
si leat su locu 
alluta che fiama in su focu

femina

          

         
Da' ch'as bundante vena
est menzus la midire
po sos tempos chi b'at peus siccagna,
ch'a chircare s'anzena
no mi ponz'a pidire
dattu chi l'app'in domo sa cuccagna;
e tand' in contivizzu
muntene su disizzu
chi l'agatte friscu ch'abb' 'e muntagna...
...posca già mi nd'attatto,
c'a tempus sou su logu li fatto...

omine

          

 S’ amore in poesia
No aio toccadu
Est tema però chi mi dat sulenu
Disizos chi aia
Chi tue as provocadu
Nd’ essin dae fungutu chin s’ alenu
Totu sa fantasia
Ch’ amus impitadu
Nos at pelmissu de abbasciare frenu
Es solu chin sa mente
Chi si podet fagher su niente.

femina

         

         

Bi cheret card 'e fritta
sa rima pro zogare
e ponner in motu sa poesia,
chi salid' o durchitta
est bell'a la cantare
isastulada o cun malissìa;
ca s'agattas luminu
andande in caminu
su coro t'alluet a petta 'ìa...
...ch'est bonu su titone
già m'alluet fogu e fogulone...

omine

          

 Tue ses un’ amore
Ses sa menzus braja
calda che fiama sempre ‘ia
eo poveru cantore
che so rut’ in sa traja
de trapula ‘e disizu ch’est imbia
però custu cantare
mi faghet allegrare
comente dae meda no bidia
ses s’amente perfeta
finzas in poesia ‘e cualeta

femina

Chi pius de un' 'orta
chircas, semper a prontu
l'acciapas, e comente la cheres,
ca mi l'ido risorta
pro chi la tenzas contu
ti torrat milli e prus piagheres.
E cussas trimulias
ti dant su chi cherias
chi semus ambos de s'amore meres...
...nd'intendo sas campanas
m'istringhes sussurrendemi chi m'amas...

omine

          

 Tue ses abe semper oberosa
Chi coglit de su mundu su dulcore
Pasende un’ iscuta in su fiore
Leas su mele bi dassas una cosa
Est in natura de numen amore
Chi porris a sa menzus rosa
Onzi fiore t’ isettat in sa posa
Lezera . chi ti essit dae su core

femina

No la tenzo cuss' azza 
ne colorida roda,
ne fatt' 'e prumas vanitos' irfogu,
no so de cudda razza
chi sighidi sa moda
leande s' amirazion' a giogu;
'unneddas prus de una 
ma non d'uso mancuna 
sa ch'app'in doss'est pro li ponner fogu...
...ca est artifizale
no balet interess' e capitale...

omine

          

 Paula naramila sa rezeta
Pro fagher de sa vida una dulchesa
Pessas chi mele bastet in s’ispesa
Oburu unu mundu chi t’azetat?
Si tiat bastare solu gentilesa
A totu tio leare a sa brazeta
De s’odiu e s’ingannu cussu muru
Tot’ impare nd’ etamus ‘isse puru.

          

femina

 Semus tott' in d'una rotatoria
zira zira e faddimos s'essida;
s'ispesa puru resurtat salida,
no nd' 'alet sa fadiga motoria...
Tant'est semper sa matess'istoria,
perdet sa patente chie guida(t)...
...pero' est a gratis s'isperanzia
e cun cuss' achistamus sustanzia...

omine

     

 A bi proare nde alet sa pena
Finas si naras ch’ est illusione
In d’ unu mundu de confusione
Bastat de chilcare bona vena
Zertu no so de vida campione
Tio cherrer un’ iscut’ appena
De poder ider cantu in paradisu
Inchet a sa tristura su sorrisu

          

 femina

    

     

 Omine no tenzas troppu press' 'e controllare
chi già b'at tempus pro sa dispidida,
si po como ti toccat de chirrare
cun su chiliru cosa saporida:
piga su 'onu chi ti dat sa vida,
chi su malu già lu podes lassare...
...a chie l'at augurad'a tie,
chi b'andet issu intro de sa die... 

omine

     

 Su duche chi prim’ as presentadu
Paret fattu chi inzegnu e core
In su tempus chi l’as preparadu
As postu su talentu e su licore
Ebbai sa vida c’amus prestu nadu
S’agatat siat dulche che agriore
Ma si li das una bona manu
Fin’ issa ti la porrit a pianu

femina

    
Eppur' est tottu fruttu avansadu,
ch' in domo no b'at nudd' 'e che frundire
anzis s'ingredient' a lu cundire
est proppiu su coro chi as nadu;
e sena mancu timor' 'e faddire
cun bona lena l'appo preparadu...
...chi pariat isettende a mie
cussu durche ch'est piaghid'a tie...

omine

     

 Cantu de te amo sa faeddada
Ses bucantina che binu nieddu
Onzi ‘olta chi t’ido a s’acerada
Mi cogo siat core che chelveddu
Sa mente olat in sa passizada
‘ue bi colaio a piseddu
Cando alu sa vida fit giogu
E s’ardore brujaiat che fogu

femina

    
No isco chi siat bonu sinnale,
a torrar' in brios a sos chimbanta,
peroe si nd'as cuntentesa tanta
buffa cuss'abba frisc' 'e s' 'enale,
chi zertu no creo ti fettat male
de Venus sa cumpanzia accanta...
... e tando ti la miras e carignas
pritt'a no l'ider prus no ti rassignas...

omine

     

 Pro l’ider , l’ido finas a sa zega
Alu bi jompo e alu mi nd’ atato
Cando sa natura mi lu negat
Ater’ apentu tando eo agato
Pro como finas chin s’atrau segat
E su dovere in domo semper fato
Si poi s’ at a poder arressare
Pro atera cosa l’ ap’ a impitare

Femina

Giai chi a su fragu la connusches
mi paret chi ses nande tue Rinu,
no importat si attes' o vicinu
ca su prefumu tottu ti lu nusches;
e su sentidu paret chi t'offusches
cun pesseris d'amore malandrinu...
... peroe torra cun sos pes' in terra
ca de sa mela n'as attera perra...

          

 Omine

          

 Comente t’ apo nadu atera ‘ia
Si tratat de inzegnu peregrinu
Licentzia est de sa poesia
Chi ponet su disizu a puntinu
Sun olos de arcana fantasia
Postos in versos, ma no b’at continu
Est sa brama semper liberadora
Chi tentat che a Eva sa colora.

femina

Ma si no mi nde dana
a ibue and' eo
a m'attatar' 'e latte nettarinu,
cando nde tenzo gana
che pare già b'arreo
ca su crabigu fatto purpurinu;
log'a bi nd'at in cue?
chi si mi lassas sue(r)
che l'agabammos fin'a tardighinu...
... ah, ite bell'istentu
cant'una gai s'atteru cuntentu...

Omine

 Ma tue ses signora intelligente
Femin’ e domo med’ ispiritosa
Chena imbizos malos in sa mente
Abberta in poesia a donzi cosa
Mi das ispiru e gosu frecuente
Pustis mi torras e mi pones in posa
Che a fiore bellu profumadu
Eo no lu tocco ca est menzus miradu.

Femina

 Gai est s'iscrittu tou oh Rinu:
jambat colore segundu sa lughe,
che su cristall' est bell'adamantinu
ca donz'isfumadura bi la jughe(t).
A bortas cuas su frutt'in sa nughe
ch'ispinosu mi paret su corzinu...
...ma da ch'ispozu mi l' 'ido innante
tand' 'agatto valor' 'e diamante...

Omine

 Tue ses tue , Paula Nieddu
Niune s’assimizat a tie
Pro cantu siat bellu su faeddu
ses tue su sole ch’illuminat sa die
in firmamentu luminos’ isteddu
grascias ti porro pro su chi das a mie
sos versos chi a su bentus tendes
respiran su disizu chi riprendes

Femina

         
Una duda present'app' in sa mente,
chi nerzas abber' o sies brullande
pesso bisonzet chi ti lu dimande
si ses cott' 'e Pàula veramente.
Una dud'in sa ment'appo presente
sa resposta cheria chi mi mande(s)...
...Deo m'isetto siat una brulla
c'as buffad' 'in' e no abb' 'e s'ampulla... ;

omine

  No so unu puddu a zamparillottu
Nemmancu una pudda imbaddinada
Forzis cherveddu gia lu gitto cottu
Dae custa singulare dimandada
De te coglio aminu bellu tottu
E sa bellesa de sa faeddada
Ma alu no ap’ endidu su coro
Atere  ligat isse  a fil’ e oro.

fwmina

E tand'itt'at a esser 
su fogh' 'e su titone
chi s'alluminz' at fattu cust'effettu,
si b'appo a resesser
cand'in manu lu pone(s)
mi lu giutt'a su foghile derettu;
ca in mes' 'e su fogu
l'appo fattu su logu
e su calore mi torrat perfettu...
...inie si consumat
donzi fiamma ch'iss'ettott'allumat...

Omine

 Mastra puru de fagher geniosa
Mi naras chi su tempus ti lu donat
De It’ ateru ses balentiosa
in artes chi su mundu colorat?
femina ‘e verbu nebid’ ispantiosa
chi movet sensos e ammie gosat
si tantu ‘ene ischis cantare
it’ at a esser  su tou  amare.

Femina

Tand' est femina meda fortunada
sa chi t'at tent'a sa durche trobea,
ma già fit brullana s'idea mea
pero' mi fis tentand'a s'imboscada.
Chi siat cont' 'e cazza o "cazzada"
est un' istoria bell' e no fea ...
... est su fagher de s'umana zenia
de s'accoppiare sende ch' est bia... 

Omine

 It’est cussu mamentu
Chi ti faghet pessare
Chi pot’ a tie render felice
Est unu pessamentu
Chi mi faghet torrare
A s’amore de Dante a Beatrice
Totu sa poesia
Siat tua che mia
Est bella paris..e peruna vice
Nois in cust’ istante
Semus amigos, e poet’ amantes

          

  Femina

          

 Torras a s'undighina
chi est s'urtim' amore
de su poetare meu e tou
ca paret ch'incaminat
su pass' 'e s'amadore
pius in lestres'a s'iscopu sou:
ch'est a l'inghiriare
posc'a l'ammaliare
s'amadu bene semper dae nou...
...chin custa music' antiga e bella
ch'isolvet donzi fren'in sa favella...

Omine

 A primu manzanu
A fora in s’essire
A s’undighina tua rendo piaghere
Sa pinna leo in manu
Pro ti poder porrire
S’affetu , chi mi donas a dovere
Eo ti nde torro parte
In penseri et arte
De sos mamentos de dar’ e avere
Comente una rejna
Ti cumpro e in su coro t’ap’ ighina.