duellu (Black..Pintore..Cambiganu)

duellu (Black..Pintore, Cambiganu)

Paola Black

‎---
Ch'oe m'azzis giamadu
in custu bellu situ
pro cantu sal' e piber' ammerare 
potto: est bettadu,
faghide contu lintu,
chin piagher' intro com'a cantare;
e bos saludo tottu
istranzu e connottu
a bogh'isparta pro bos abbrazzare...
...C'apprezio s'invitu,
respondo "presente" chi est graditu...

Inizio modulo

Lussorio Cambiganu 


L’ aio a disizu
De t’ider innoghe
Pro mi poder chin tegus cunfrontare
Apo lead’ imbizu
Respunder a sa ‘oghe
Chi t’ essit in su bellu poetare
Tue che Clori ermosa
As ispideru e posa
E poesia ischis unorare
In custu mamentu
Dimustras arte e zentile talentu

Giuseppe Pintore


 Como fatu su triu
podimos dare isfogu
a sa musa giucunda de Parnasu.
Chi faghimo su niu
non creo in custu logu
silentziu imponene so persuasu.
Cun Paula e Rinu
leamo su caminu,
pro bolare in alas de Pegasu.
e gai in allegria
passamos un'isuta in poesia.

o    

Paola Black ‎---


Cunfezionada l’ appo
a tempus duas bombas
chi sezis a cadd' o fanteria
como chi bos azzappo
chi semus in tres concas
l'iscopiamos custa in poesia
posc'in camin'idimos,
tando nos ponimos
de bona mut'ettare la cheria...
...ch'est trumba leiesa
sa chi sonat vittoria o resa...

Lussorio Cambiganu 


Tue che giulieta
Subr’ e su balcone
Isetas dae nois sa serenada
Romeo tie iseta
Su zinnu o su buccone
Poi ‘e t’aer bene saludada
Lanciadu as s’isfida
Chi como est partida
Idimus s’agatamus s’abojada
Tue propones s’arte
No isco si de Venus o de Marte

Giuseppe Pintore 


Be custos cirulios
mi tocana su coro
nde ruet in pitu su bonumore.
Cun so verso mios
chi nde faghes tesoro
a corona los ponzo che fiore.
sa rosas e gravellos
profumados e bellos
paren chi sunu pedinde amore.
T'apagan cosa ona
chi no lu ses gherrera che bellona.

Paola Black 


Nadem' inue
cuades su luminu
chi m'allumat intragnas a lu narre(r),
paret ch'incube(t)
in su fror' aberzinu
e posca ch' alluat totta sa carre;
b'at melas e nizzolas
c'app'in pett' e sunt solas
a issu chirchende de lu attrarre(r)...
...chi' m' 'achet cumpanzia
già l'at a piagher sa paga mia...

Lussorio Cambiganu 


Tue mi pares sola
E chilcas lughe ‘ia
Innoghe calecunu ch’ est pro casu??
A tie ti cossolat
Sa sola cumpanzia
Lu cheres rassu oburu romasu?
Tota custa zente
Idet in s’oriente
Su sole ch’ est bessende dae Parnasu
Finzas chi isto rizu
In poesia do ilfogu a ‘onzi disizu

Giuseppe Pintore ‎*

Comente podet esse
gai bella e galana
ancora no agattas un'isposu.
Deo non poto resesse
ca mi pones mattana
sa vida so passende sena gosu.
Ha cantu ia cherre
su coro a t'oferre
e t'amare sempere sena reposu.
chi as sentidu umanu
beni viola e dami sa manu.

Paola Black ‎--- 


Mi cherz'assigurada
che costoid'in banca
chi remunidu ben'est su valore,
si male prezisada
mi l'ido cussa tanca
tand'ambos bo lu nego cust'onore,
e sa cassett'aberta
no lasso a s'inzerta
pro no nde tenner posc'unu dolore...
...chi seru promittides
l'intrego sena duda chi faddides...

Lussorio Cambiganu 


Ses culumb’ e fiore
Essida dae s’ eranu
Pro totu in su coro bon’ achistu
Cale cheres amore
Serenu o triulanu
Lu cheres riccu, forte o med’ abistu?
Innoghe as ischirriu
Etache su ticchirriu
E pone in conca a unu su crabistu.
Siat bellu o bruttu
S ‘impoltu est su sentidu fungutu

Giuseppe Pintore ‎*

Ma conta sa virtude
e s'animu serenu
ca no importa su contu robustu.
So in bona salude
de voluntade pienu
pro chi ti fettas sa vida cun gustu.
tzeltu ca su inare
conta pero a t'amare
penzo chi lu siat pius giustu
pro ateru de restu
so tribaglinte umile e onestu.

Paola Black ‎---


Coro nd'app'unu solu
chi divider no poto
tra bois chi bo lu sezis gherrende,
chi nd' 'ia tent'istolu,
eo pess' e annoto,
a nemos fia dolu procurende;
peroe unu este,
resurtat pur'areste
c'a lu segar'in duos est timende...
...dagh'est gai reberde
chie lu domat no lu tevet perder...

Lussorio Cambiganu 


Faghes che a Elene
Chi at post’ in gherra
Sos gregos cuntra a sos troianos
Paride dae Atene
in coro si l’inserra
ebbai si sentin issos ingannados
a su mantessi modu
tue faghes su nodu
chin nois duos bezos malefadados
si cheres achipire
faghe prestus unu a nde pedire

Giuseppe Pintore ‎*


Gentile sennorina
perdona unu minutu
faghe ti cheria un'imbasciada.
ses bella e purpurina
duncas so resolutu
ispero chi perunu male bada.
ti dimando una cosa
ca ti chelzo a isposa,
si ater'unu non ta dimandada.
ti jiuto a s'altare
pro chi tota vida ti pot'amare.

Paola Black ‎---


In gherra no ponia
neunu, chi fit pro me,
ca no mi 'anto de bellesa mere;
pero' a costa mia
chèrfid' 'ia unu re
ch'acchipit in lett' 'e mesa dovere.
pro como agattadu
no nd'app' 'e fortunadu
fint tottu fumu solu e pruère...
...forzis unu de 'oi(s)
jambat s'idea mia chi est goi...

Lussorio Cambiganu 


Amus a fagher mediu
Ponimus tot’ impare
Cunzados de atere e dinari
No b’at perun’ impediu
Pro ti conchinare
Un’ abboju podimus fagher paris
In Grecia b’est sa crisi
Casteddu no bi fisi
Nos podimus ider in Thatari
Pro totu est aculzu
E de sa situascione opo su bulzu

Giuseppe Pintore ‎*


Si cheres unu re
innoghe las'agattadu
e tue as'a esse sa reina.
ca ses bella pro me
custu ti l'apo nadu
ses musa ispiradora genuina.
solu chi apo intesu
aterunu in mesu
ses postu e no es bona faina.
unu pagu m'es notoriu
mi paret chi si jammat Lussoriu.

Paola Black ‎---


s'amor'est zurpu nara(nt)
e creo siat beru
no pompiat ne illadinat nudda,
dae tes' 'onzi lara
cantat sonu sinzeru
ma cand'est prus accurzu nd'intrat tudda!
e cussu chi pariat
chi bonu già lu fiat
imbez'est una conca de chibudda...
... tand'isett'ancora
ch'un' 'onu mi nde tocchet in bonora...

Lussorio Cambiganu


 Eo l’apo s’idea
Mi paret brillante
A Paula ambos nos cojuamus
La faghinus che dea
Rejna a s’istante
A s’insula de Ilo no ch’ andamus
Cue sun bene idas
Sas feminas aldidas
Ebbai Pintore totu las leamus
E si bi nd’ at troppu
La reduimus chin su mazaroccu

Giuseppe Pintore 


no ca la chelzo pro me
no apo de dividire
ca no semus dividinde sa tanca.
custu mi deves cre
non podes arrivire 
manc'un'iscuta a li etare s'anca.
deo cun issa filo
tue andas a Ilo
e giras inie a dresta e a manca.
pero chi non d'agattas
pro sa chi cheres menzus la cumbattas.

Paola Black ‎---


Pepe mi praghes meda
peroe Rinu puru,
creidemi chi est dud'affannosa
un'at su cor' 'e seda
e s'atteru s'iscuru
mi cheret giai s' incras po isposa;
faghimos un'isfida
tando a s'imbunida
chi' m'attit a domo frutta suzzosa...
... e posc'app'a chirrare
cal'est su chi mi giughet a s'altare...

Lussorio Cambiganu 


Frutta ap’ a furare
Pro ti poder cumprire
Ma ite faghes si fin’ in galera?
Su rischiu ap’ azetare
Finas de che morire
Bastat chi mi fatas preghiera
Etando su sorrisu
Torrat in paradisu
‘ue totu s’aman chena gherrera
Eo ti lu naro como
Prefelzo de mi frazigare in domo.

Giuseppe Pintore ‎*

Ma no so timorosu
chi s'idea no e vana
ti providio de frutta gustosa.
Ti do lughe e gosu
pessighe cun banana
guasi sunu sa matessi cosa
lea sa chi preferi
e beni a ortueri
ca minde anto de t'aere isposa
su fruttu genuinu
amentadi chi ti lu da peppinu.

Lussorio Cambiganu 


Etando a testimonzu
Nessi m’as a leare
Pro poder ider cantu ses cuntenta
De virtude bisonzu
Su frut’ e manigare
Ti che lu git’ inie a sabor’ e menta
Però sa prima note
A Pintore nd’ iscote
Dae letu , ebbai de me s’ ammenta
No m’as chelfid’ a fante
Etando mi proponzo de amante

Paola Black ‎---

mi pariat fint duos
sos chi mi fint chircande,
ma unu 'ido si ch'est già fuidu,
at timidu sos ruos
daghi la fit furande
sa frutta de m'attir'a s'iscuridu;
tand'andet in bonora
o si c'adduret fora
su chi mi nd'attit Pep' est prus cumpridu...
... s'ancora mi pretende(t)
appo finid' e comporar'e bende(r)...

Giuseppe Pintore ‎*

Su coro in su sinu
mi ses pesadu a bolu
chi pigadu che so a s'empireu.
ma nara chi es Rinu
mi ponet oriolu
no mi devo fidare a parre meu.
in cussas abbas calmas
sun cuada sas almas,
ca so pro mi pesare a buleu.
si mantenza distante
chi no chel'imbio unu calmante.